جۋىردا وسكەمەن قالاسىندا ومىردەن ەرتە وتكەن «دارىن» مەملەكەتتىك جاستار سىيلىعىنىڭ لاۋرەاتى, رەجيسسەر, اقىن رۇستەم ەسداۋلەت اتىنداعى ءى رەسپۋبليكالىق جاستار جانە ستۋدەنتتەر فەستيۆالى ءوتتى.
استانا, الماتى, قاراعاندى, كوكشەتاۋ, سەمەي سىندى قالالاردان بىرقاتار تەاتر ۇجىمدارى قاتىسقان فەستيۆالدە ەلورداداعى قازاق ۇلتتىق ونەر ۋنيۆەرسيتەتىنىڭ «اكتەر جانە رەجيسسۋرا» كافەدراسىنىڭ جانىنان اشىلعان «ستۋدەنتتەر زەرتحاناسى» ۇجىمى باس جۇلدەنى يەلەندى.
استانالىقتار قازىلار القاسىنىڭ نازارىنا ي.ساپاربايدىڭ «سىعان سەرەناداسى» سپەكتاكلىنىڭ جەلىسىمەن قويىلعان «ءشامشى» مۋزىكالىق دراماسىن ۇسىندى. شىعارمانىڭ قويۋشى رەجيسسەرى وسى وقۋ ورنىنىڭ اعا وقىتۋشىسى, قر ەڭبەك سىڭىرگەن قايراتكەرى سايلاۋ قاميەۆ بولدى.
«ۇجىمىمىز 3-كۋرس ستۋدەنتتەرىنەن قۇرالعان. سپەكتاكلگە باس-اياعى 18 ادام قاتىستى. قويىلىمدا 12 ءان شىرقالدى. «سىعان سەرەناداسى» مۋزىكالىق دراماسى بۇدان بۇرىن بىرنەشە تەاتردا قويىلعان. ءبىز ونى باسقاشا تراكتوۆكادا بەرۋگە تىرىستىق. ءشامشىنىڭ شىعارماشىلىعىنا ەمەس, باس كەيىپكەردىڭ جاندۇنيەسىنە ۇڭىلدىك. كومپوزيتوردىڭ قۋانىشى مەن كۇيزەلىسىن, جالپى پسيحولوگيالىق پورترەتىنە ەكپىن بەردىك. ونىمەن ءساتسىز شىقپادى دەپ ويلايمىن. ءشامشىنىڭ ءرولىن ەرحان ماۆلەنبەرديەۆ اتتى تالاپكەر اكتەر سومدادى. يزولدانى ايدا جانۇزاقوۆا الىپ شىقتى. ءشامشىنىڭ اناسىنىڭ ءرولى جادىرا بەكتەنباەۆاعا بەرىلدى. وسىنىڭ ءبارى بولاشاعىنان ۇلكەن ءۇمىت كۇتتىرەدى» دەيدى سايلاۋ قاميەۆ.
جالپى, حالىق سايلاۋ قاميەۆتى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرى جانە «بايتەرەك» توبىنىڭ ءانشىسى رەتىندە تانيدى. ءارتىستىڭ رەجيسسەرلىك ءىزدەنىستەرى دە جامان ەمەس. كەزىندە ول كاسىبي ساحنادا قويعان «قىز جىبەك», «قوزى كورپەش-بايان سۇلۋ» ميۋزيكلدەرىنە ونەرتانۋشىلار جاقسى باعاسىن بەرگەن. سونداي-اق, قىرعىز جازۋشىسى, دراماتۋرگ مار بايدجيەۆتىڭ «جەكپە-جەك» سپەكتاكلىن ساحنالادى.
امانعالي قالجانوۆ
