سايلاۋ الدىنداعى ۇگىت-ناسيحات شارالارى جونىندە «الكون +» جشس ديرەكتورى امان ايۋپوۆپەن اڭگىمەلەستىك.
– ءماسليحات دەپۋتاتى بولۋداعى ماقساتىڭىز قانداي؟
– مەن قاراپايىم وتباسىدان شىققان اۋىل بالاسىمىن. وتباسىندا ۇلگى تۇتار ۇلكەندەرىمىز جاستايىمنان باتىلدىققا, شىدامدىلىق پەن ماقساتقا جەتۋ جولىندا تاباندى بولۋعا ۇيرەتىپ, بويىما اسىل قاسيەتتەردى ءسىڭىردى. ەلوردادا 22 جىل بۇرىن ىسكەر جىگىتتەردىڭ باسىن قۇراپ, شاعىن كومپانيا اشتىق. جاڭا كاسىپپەن اينالىسۋعا بەلدى بەكەم بۋىپ, ىسكە كىرىسىپ كەتتىك. بۇگىندە شاعىن كاسىپورىن ءوز ءىسىن دالەلدەدى. ءبىزدىڭ كومپانيا اليۋميني جانە مەتالل-پلاستيك كونسترۋكتسيالارىنىڭ ەلىمىزدەگى ەڭ ءىرى وندىرۋشىسىنە اينالدى. ەلوردامىزدىڭ ساۋلەتىن كەلىستىرىپ, اسەم شاھارعا اينالدىرۋدا ۇلكەن ۇلەس قوسۋدامىز.
– سايلاۋدا Nur Otan پارتياسى جەڭىسكە جەتسە, حالىقتىڭ جاعدايى قانشالىقتى وڭالادى؟ ۇمىتكەرلەر ەل سەنىمىن اقتاي ما؟
– بىرەر جىل بۇرىن قالا تۇرعىندارى مەن «نۇر وتان» پارتياسىنىڭ سەنىمىنە يە بولىپ, ەلوردا ءماسليحاتىنىڭ دەپۋتاتى بولىپ سايلاندىم. دەپۋتاتتىق جۇمىسىمنىڭ جەمىستى ناتيجەلەرى جانە حالىقتىڭ قولداۋى ماعان كۇش بەرىپ, بيىل قايتا سايلاۋعا تۇسۋگە, پرايمەريزگە قاتىسۋىما نەگىز بولدى. جالپى, باستاعان ءىستى سوڭىنا دەيىن جەتكىزۋ – مەنىڭ باستى ماقساتىم. سوندىقتان دا الداعى جىلعا جوسپارلار كوپ. تۇرعىنداردىڭ ءومىر ساپاسىن ارتتىرىپ, قالامىزدى جانعا جايلى ەتۋدە ايانباي ەڭبەك ەتەمىز. پارتيانىڭ باعدارلاماسىندا كەلەلى ىستەر قامتىلعان. جوسپار جۇيەلى تۇردە ورىندالسا, ارينە ءۇمىت اقتالادى, ەلدىڭ تۇرمىس ساپاسىن ارتتىرۋعا ىقپال ەتەدى.
– ءوزىڭىزدى قانداي ماسەلەلەر تولعاندىرادى؟ بۇگىنگى ەرەكشە نازار اۋدارار تۇسىمىز قايسى؟
– باسپانا ماسەلەسى – ءبىرىنشى ورىندا. تۇرمىسى تومەن وتباسىلار مەن كوپبالالالى انالار جاعدايى, ءبىلىم ساپاسىن ارتتىرۋ, مەديتسينا سالاسى مەن جۇمىسسىز جاستار جايى ويلاندىرادى. ءار مامان ءوز سالاسىندا ايانباي ادال ەڭبەك ەتسە, بۇل ماسەلەلەر وڭ شەشىمىن تابادى.
نۇر-سۇلتان قالاسىنداعى Nur Otan پارتياسى سايلاۋ قورىنىڭ قاراجاتىنان تولەندى.