وسى جىلى نۇر-سۇلتان قالاسىنىڭ ءماسليحاتىندا بارلىعى 17 سەسسيا ءوتتى. وندا 80-گە جۋىق ماسەلە قارالدى. سونىڭ ىشىندە قالا تىرشىلىگىنە قاتىستى, جەدەل شەشۋدى قاجەت ەتەتىن ماڭىزدى ماسەلەلەر از بولعان جوق. ءماسليحات دەپۋتاتتارى ءارتۇرلى مەملەكەتتىك ورگاندارعا 72 دەپۋتاتتىق ساۋال جولدادى. جىلدىڭ قورىتىندىسى تۋرالى ءبىز قالالىق ءماسليحات حاتشىسىنىڭ مىندەتىن اتقارۋشى ءماجيت شايداروۆپەن اڭگىمەلەستىك.
ىندەت جۇمىسقا كەدەرگى كەلتىرگەن جوق
– ءماجيت زەينوللاۇلى, ءوتىپ بارا جاتقان جىل جەڭىل بولمادى. الەمدى جايلاعان ىندەت كوكتەمدە قازاقستانعا جەتتى. وسى جاعدايدا قالاي جۇمىس ىستەدىڭىزدەر؟ پاندەميا بيىلعا جوسپارلانعان جۇمىستاردى ورىنداۋعا كەدەرگى كەلتىرگەن جوق پا؟
– راس, وسى جىل ءبىراز سىناق اكەلدى. پاندەمياعا بايلانىستى جىلدىڭ باسىندا ەلىمىزدە توتەنشە جاعداي جاريالانىپ, كارانتين ەنگىزىلدى. جۇمىسىمىزدى ءارتۇرلى شەكتەۋلەردى ەسەپكە الىپ, جۇرگىزۋگە ءماجبۇر بولدىق. قاشىقتىقتان جۇمىس رەجيمىنە كوشتىك. بىراق ءبىر ايتا كەتەرلىگى, 2018 جىلدان باستاپ ونلاين فورماتتا جيىنداردى وتكىزە باستاعان ەدىك. بۇل جاعىنان تاجىريبەمىز بولدى. سوندىقتان جاڭا جاعدايداعى جۇمىسقا تەز بەيىمدەلدىك. بىلتىر بەكىتىلگەن جىلدىق جوسپارىمىزعا سايكەس ارەكەت ەتتىك. بارلىعىن ۋاقىتىندا ورىندادىق. سەسسيالار مەن تۇراقتى كوميسسيالار وتىرىسى, قوعامدىق تىڭداۋلار قويىلعان مەرزىمدەرىنەن شەگەرىلگەن جوق.
توتەنشە جاعداي رەجيمى ەنگىزىلگەندە, ءماسليحات دەپۋتاتتارىنىڭ جۇمىسى كۇشەيتىلگەن تارتىپتە جۇرگىزىلدى. دەپۋتاتتاردىڭ كوپشىلىگى قاۋىپتى ىندەتتىڭ تارالۋىنا قارسى قۇرىلعان شتابتار قۇرامىنا كىردى. بلوكبەتتەردى ارالادى. كەيبىر دەپۋتاتتار ءدارى-دارمەكتەردى شاھاردىڭ شەتكى ايماقتارىندا تۇراتىن ناۋقاستارعا تاسىمالداۋعا قالا ەمحانالارىنا كولىكپەن كومەكتەستى. تاۋلىك بويى جۇمىس ىستەگەن مەديتسينا قىزمەتكەرلەرى وتباسىلارىنا جاردەمدەستى.
قوعامدىق تىڭداۋلار پايداسى زور
– قىسىلتاياڭ كەزەڭدە ءدارىحانالاردا ءدارى-دارمەكتىڭ جەتىسپەۋشىلىگى ماسەلەسى كوپ ايتىلدى. ءماسليحات دەپۋتاتتارى وسى ءىستى تەكسەرگەنىن بىلەمىز. ناتيجەسى قانداي بولدى؟
– ءيا, تۇرعىنداردان كوپتەگەن شاعىمدار ءتۇسىپ, ءبىز قالاداعى بىرقاتار ءدارىحانالاردى ارالادىق. سوندا كەيبىر ءدارىحانادا ءدارىنىڭ قىمباتتاتىلعان باعامەن ساتىلعانىن انىقتادىق. بۇعان قوسا, وسى ىسكە فارماتسەۆتيكالىق ءبىلىمى جوق ازاماتتاردىڭ, بىلايشا ايتقاندا, الاياقتىق جولمەن پايدا تاپقىسى كەلگەندەردىڭ ارالاسقانىن دا بىلدىك.
– قالالىق ءماسليحات جۇمىسىنىڭ ناتيجەسىندە باس قالامىزدا كوپتەگەن ماسەلە شەشىلىپ جاتىر. ەندى بيىل ەلوردانىڭ دامۋىنا قاتىستى اتقارعان ىستەرىڭىز تۋرالى ايتىپ وتسەڭىز.
– وسى جىلى ەلوردا ءماسليحاتىنىڭ دەپۋتاتتارى قالا دەڭگەيىندەگى عانا ەمەس, رەسپۋبليكالىق دەڭگەيدەگى بىرقاتار ماسەلەلەردىڭ شەشىلۋىنە اتسالىستى. اتاپ ايتقاندا, بىرنەشە زاڭعا, نورماتيۆتىك-قۇقىقتىق اكتىلەرگە وزگەرىستەر مەن تولىقتىرۋلار ەنگىزىلۋى ءۇشىن ۇسىنىستارىمىزدى ايتتىق. ارينە, باستى ماقساتىمىز ەلوردانىڭ الەۋمەتتىك-مادەني دامۋىنا اتسالىسۋ بولدى. زاڭدارعا كەلسەك, «قازاقستان رەسپۋبليكاسىنىڭ استاناسى تۋرالى», «جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭدارىنا «قوعامدىق كەڭەستەر تۋرالى» ەرەجەگە قاتىستى ۇسىنىستارىمىزدى جەتكىزدىك.
ءماسليحات سەسسيالارمەن قاتار تۇراقتى كوميسسيالار وتىرىستارىن, قوعامدىق تىڭداۋلاردى وتكىزەتىنىمىزدى بىلەسىزدەر. بيىل قوعامدىق تىڭداۋلار كەزىندە جەرگىلىكتى پوليتسيا قىزمەتىنىڭ جۇمىسى, قالانىڭ شەتكى ايماقتارىنىڭ قازىرگى جاعدايى مەن دامۋى, ساۋدا سالاسىندا بىرىڭعاي مەملەكەتتىك ساياساتتى ىسكە اسىرۋ سياقتى ماسەلەلەر قارالدى.
سونداي-اق كوشپەلى وتىرىستاردى وتكىزۋ جاعىنان دا تاجىريبەمىز بار. وسى جىلى ەففەرەنتتى تەراپيا جانە گەموكوررەكتسيا ورتالىعىنا, قاۋىپتى قالدىقتاردى قايتا وڭدەيتىن شاعىن زاۋىتقا, مەملەكەتتىك-جەكەمەنشىك ارىپتەستىك اياسىندا سالىنعان 360 ورىنعا ارنالعان جاڭا بالاباقشاعا, ەلوردانىڭ تۇراق كەڭىستىگىنە, توتەنشە جاعدايلار دەپارتامەنتى مەن ءبىلىم باسقارماسىنىڭ نىساندارىنا بارىپ, جاعدايمەن تانىستىق. قالانى گازدانداندىرۋ جۇمىسى قالاي جۇرگىزىلىپ جاتقانىن دا كوردىك.
تۇرعىندار شاعىمدارى ەسكەرۋسىز قالمايدى
– جالپى وسى جىلى تۇرعىنداردان قانداي ماسەلەلەر بويىنشا كوپ شاعىم ءتۇستى؟ شاھار حالقىن قانداي ماسەلەلەر الاڭداتادى؟
– بيىل 119 شاعىمدى قابىلدادىق. بۇلار كوبىنەسە وزەكتى تۇرمىستىق جانە كوممۋنالدىق ماسەلەلەرگە قاتىستى بولدى. ءبىز ءتيىستى تالداۋ جۇرگىزىپ, تۇرعىنداردىڭ كوپشىلىگى باسپانا الۋ, جولداردى جوندەۋ, جول بەلگىلەرىن ورناتۋ, كوممۋنالدىق قىزمەتتەر جۇمىسىنا بايلانىستى شاعىمداناتىنىن انىقتادىق.
ءماسليحات دەپۋتاتتارى بيۋدجەتتى تالقىلاعاندا تۇرعىنداردىڭ ءالجۋاز توپتارىنا اتاۋلى الەۋمەتتىك كومەكتى تاعايىنداۋعا, حالىقتى جۇمىسپەن قامتۋعا, كولىك جانە جىلۋ ەنەرگەتيكالىق ينفراقۇرىلىمنىڭ دامۋىنا, قالانى اباتتاندىرۋعا, ءبىلىم نىساندارىن وركەندەتۋگە جانە باسقا دا كوپتەگەن ماڭىزدى ماسەلەلەرگە كوپ كوڭىل ءبولدى.
– ناقتى قانداي ماسەلەردىڭ شەشىلۋىنە اتسالىستىڭىزدار؟
– بيىل ءماسليحات دەپۋتاتتارى الەۋمەتتىك باعىتتاعى بىرقاتار ماڭىزدى ماسەلەلەردىڭ شەشىلۋىنە وڭ اسەرىن تيگىزدى. سونىڭ ىشىندە قالا تۇرعىندارىنىڭ كەيبىر ساناتتارىنا الەۋمەتتىك كومەكتىڭ مولشەرلەمەسىن بەلگىلەۋگە جانە ولاردىڭ ساناتتارىن ايقىنداۋعا وزگەرىستەر مەن تولىقتىرۋلار ەنگىزۋگە اتسالىستى. ەرەكشە قاجەتتىلىگى بار بالالاردى ۇيدە وقىتۋعا جۇمسالاتىن شىعىنداردى وتەۋ ءتارتىبى مەن مولشەرىن بەلگىلەدى. امبۋلاتوريالىق جاعدايدا ەمدەلەتىن ازاماتتاردىڭ جەكەلەگەن ساناتتارىن ءدارى-دارمەكپەن, ارنايى مەديتسينالىق ونىمدەرمەن, مەديتسينالىق ماقساتتاعى بۇيىمدارمەن قوسىمشا قامتاماسىز ەتۋ ماسەلەلەرىن شەشىپ بەردى. ۇلى وتان سوعىسىنداعى جەڭىستىڭ 75 جىلدىعىن مەرەكەلەۋگە بايلانىستى ازاماتتاردىڭ جەكەلەگەن ساناتتارىنا قوسىمشا كومەك كورسەتۋگە اتسالىستىق.
شەتكى ايماقتار –اردايىم نازاردا
– الداعى ءۇش جىلعا ارنالعان بيۋدجەتتى تالقىلادىڭىزدار. وسى ماسەلەدە الدا اتقارىلۋى ءتيىس قانداي جۇمىستارعا كوبىرەك نازار اۋداردىڭىزدار؟
– قالادا ورتا مەكتەپتەر قۇرىلىسىنا قاتىستى بىرقاتار ماسەلەلەر بار. كەيبىر ءبىلىم مەكەمەلەردە وقۋشىلار سانى شامادان تىس كوپ. بالاباقشا ماسەلەسى دە وزەكتى. سونىڭ ىشىندە 3-6 جاسار بالالاردى مەكتەپالدى دايارلىق پەن وقىتۋ ماسەلەلەرى اسا ماڭىزدى. مۇمكىندىگى شەكتەۋلى جانداردى تەحنيكالىق جانە كومەكشى قۇرالدارمەن قامتۋ دا – اتقارىلۋى ءتيىس جۇمىس. دەنساۋلىق ساقتاۋ نىساندارىنىڭ ءتاريفى كىم-كىمدى بولسىن مازالاماي قويمايدى. مەملەكەتتىك-جەكەمەنشىك ارىپتەستىك ارقىلى قارجىنى ءتيىمدى جۇمساۋ دا – باقىلاۋعا الىناتىن ءىس.
قالانىڭ شەتكى ايماقتارىنا ءالى دە جولدار مەن جارىق كەرەك. تۇرعىن الاپتاردا مەديتسينالىق جانە سپورت نىساندارى دا جوقتىڭ قاسى. قوعامدىق كولىك قاتىناسىنان دا تۇيتكىلدەر بار. ىشكىورامدىق اۋماقتاردى اباتتاندىرۋ, كوگالداندىرۋ, سانيتارلىق تازالاۋ سياقتى ماسەلەردى كوتەردىك. بۇل جۇمىستار نازارىمىزدا الدا دا قالا بەرەدى.
ءماسليحات دەپۋتاتتارى قوعامدىق جانە قايىرىمدىلىق باعىتتاعى ءىس-شارالارعا ۇنەمى بەلسەندى قاتىسادى. از قامتىلعان وتباسىلارعا ماتەريالدىق كومەك كورسەتۋگە اتسالىسادى. ءارتۇرلى ماڭىزدى شارالاردى وتكىزۋگە دەمەۋشىلىك كورسەتىپ تۇرادى.
– اڭگىمەڭىزگە راقمەت!
