نۇر-سۇلتان قالالىق ءماسليحاتىنىڭ التىنشى شاقىرىلىمىنىڭ كەزەكتەن تىس سەسسياسى «Zoom» سەرۆيسىنىڭ بەينەماجىلىس بايلانىس پلاتفورماسىندا ءوتتى. قالا اكىمى التاي كولگىنوۆ ەلوردانىڭ الەۋمەتتىك-ەكونوميكالىق دامۋى جونىندە ەسەپ بەردى.
«جىلدى قورىتىندىلاعالى تۇرمىز, الەمدىك پاندەميا ەكونوميكاعا دا, كۇندەلىكتى تىرشىلىگىمىزگە دە ءوز اسەرىن تيگىزدى. بىراق مەملەكەت باسشىسىنىڭ دەر كەزىندە قابىلداعان شەشىمى مەن ەلباسىنىڭ «ءبىز بىرگەمىز» اكتسياسى اياسىندا دارىگەرلەر, ەرىكتىلەر دە بار – ءبارىمىز بىرگە جۇمىس اتقاردىق. پرەزيدەنت جارلىعىنا بايلانىستى وزدەرىڭىزدىڭ الدارىڭىزدا ەسەپ بەرگەلى تۇرمىن, جاسالعان جۇمىستار – ورتاق جۇمىس, ورتاق يگىلىك» دەپ ءسوزىن باستاعان قالا اكىمى التاي كولگىنوۆ جىل بويعى جاسالعان جۇمىستارعا شولۋ جاسادى.
ەلوردانىڭ ەپيدەميولوگيالىق جاعدايى, زەرتحانالاردىڭ كوبەيگەنى, ازاماتتاردى ەمدەۋگە قاجەتتى جابدىقتارمەن قامتاماسىز ەتىلۋى جايىندا ايتا كەلىپ, حالىقتىڭ جاڭا جىلدا ۇيدە بولىپ, ساقتىق شارالارىن ساقتاۋدى ەسكەرتتى. پاندەميا كەزىندە قاراجاتتىڭ ۇنەمدەلگەنى جانە ول اقشانىڭ الەۋمەتتىك جوبا مەن كومەكتەرگە جۇمسالعانى دا ايتىلدى. «مەملەكەت باسشىسىنىڭ تاپسىرماسىمەن نۇر-سۇلتان قالاسى اكىمدىگىنىڭ جەرگىلىكتى بيۋدجەتىن 43 ميلليارد تەڭگەگە وڭتايلاندىردىق. ۇنەمدەلگەن قاراجات ەڭ الدىمەن COVID-19 ىندەتىمەن كۇرەسكە, دەنساۋلىق ساقتاۋ جۇيەسىن دامىتۋعا, ءدارى-دارمەك پەن مەديتسينالىق جابدىقتار ساتىپ الۋعا جۇمسالدى» دەدى اكىم. حالىقتىڭ الەۋمەتتىك قولداۋعا ءزارۋ بولىگىن قولجەتىمدى باسپانامەن قامتاماسىز ەتۋ, قاراپايىم ازاماتتاردى تۇرعىن ۇيمەن قامتۋ, ۇلەسكەرلەر ماسەلەسىن بىرتىندەپ شەشۋدە مەملەكەت قامقورلىعى, ەسكى ۇيلەر مەن جاتاقحانالاردى ءسۇرۋ, گازداندىرۋ, جاڭا مەكتەپتەر سالۋ, الەۋمەتتىك نىسانداردىڭ اشىلۋى, تۇرعىن ءۇي ورامدارىنىڭ ماسەلەلەرى, «جانۇيا» وتباسىلىق ورتالىعى ماڭىزدى ءرول اتقارىپ وتىرعانىن ايتتى.
الەۋمەتتىك وسال توپتارعا مەملەكەت قارايلاسادى
№19 وكرۋگى بويىنشا دەپۋتات قاراقات ابدەن اكىمنىڭ ەلوردانىڭ الەۋمەتتىك-ەكونوميكالىق دامۋى جونىندەگى ەسەبىن قولداي وتىرىپ, سوڭعى كەزدەرى قولايسىز وتباسىلار سانى كوبەيىپ, بالالاردىڭ 80 پايىزى جەتىم ەكەنىن, اجىراسۋ مەن تۇرمىستىق زورلىق-زومبىلىق دەڭگەيى وسكەنىن ايتا كەلىپ, قوعام تاراپىنان قولداۋدى قاجەت ەتەتىن وسىنداي توپقا كومەك بەرۋ قالاي ءجۇرىپ جاتقانىن سۇرادى.
بۇل ساۋالعا نۇر-سۇلتان قالاسىنىڭ اكىمى التاي كولگىنوۆ «الەۋمەتتىك وسال توپتارعا مەملەكەت ۇلكەن جۇمىس جاساپ جاتىر. اسىرەسە, اتا-انا قامقورلىعىنسىز قالعان بالالاردىڭ ەڭ ءبىرىنشى كوتەرەتىن ماسەلەسى – تۇرعىن ءۇي. كەلەسى اپتادا كەزەكتەگى ازاماتتارعا تۇرعىن ءۇي بەرگەن كەزدە سونىڭ 20 پايىزىن زاڭعا سايكەس وسى توپقا بولۋگە نازار اۋدارامىز. از قامتىلعان وزگە دە ساناتتار بار. بۇل ورايدا وتباسى ينستيتۋتىن نىعايتۋ كەرەك, جاستار ساياساتىنىڭ مىندەتتەرىن كەڭەيتۋگە بايلانىستى ايتساق, ۋاقىت بىزدەن جاڭا شەشىمدەر قابىلداۋدى تالاپ ەتەدى. جاستاردى جۇمىسپەن قامتۋ ماسەلەسى ءبىزدى تولعاندىرادى. قوسىمشا ءبىلىم بەرۋ, سپورتتى دامىتۋ, باسپانامەن قامتۋ ماسەلەلەرى بار. وتكەن جىلى ءبىز جۇمىس ىستەيتىن جاستارعا ارنالعان باسپانا سالىپ, 1050 پاتەر بولدىك, بيىل جاعدايعا بايلانىستى 350 پاتەر ءبولىندى, كەلەر جىلى دا 1050 پاتەر بەرىلەدى دەگەن جوسپار بار. «ارنايى ەلوردا جاستارى دەگەن باعدارلامانى تالقىلاپ ءجۇرمىز, دەپۋتاتتار الدىنا كەلەمىز, ءوز ماسەلەلەرىمىزدى ءوز قۇزىرەتىمىزدە شەشەمىز. قاي قۇزىرەتتى قاي باسقارما كەڭەيتۋ كەرەك, ۇسىنىستار بەرىڭىزدەر»دەپ جاۋاپ بەردى.
«بۇكىر كوپىر» 2021 جىلى جوندەلەدى
№11 سايلاۋ وكرۋگىنىڭ دەپۋتاتى ميراس شەكەنوۆتىڭ قالا تۇرعىندارى اراسىندا «بۇكىر كوپىر» اتالىپ كەتكەن (بوگەنباي باتىر داڭعىلى) كوپىردىڭ ماسەلەسى قالاي شەشىلەتىنى تۋرالى قويعان سۇراعىنا التاي كولگىنوۆ بۇل ماسەلەنىڭ نازاردا ەكەندىگىن ايتتى. «بۇعان دەيىن ول كوپىرگە كەشەندى زەرتتەۋ جۇرگىزىلدى. تەحنيكالىق قورىتىندى كوپىردىڭ ءبىر بولىگى اپاتتىق جاعدايدا ەكەنىن كورسەتتى: جۇك كوتەرگىشتىگى مەن قىزمەت ەتۋ مەرزىمىن تومەندەتەتىن اقاۋلار بولدى. قازىرگى ۋاقىتتا 60-تان استام بالكالار بولشەكتەلگەن. كولىكتەردىڭ قوزعالىسى كوپىردىڭ سول جاعىندا ۇيىمداستىرىلعان. جۇمىستى 2021 جىلى اياقتاۋدى جوسپارلاپ وتىرمىز» دەدى ا.كولگىنوۆ.
«جاعالاۋداعى» جاقسىلىقتار
№12 سايلاۋ وكرۋگىنىڭ دەپۋتاتى رامزيا ۋمەرباەۆا جۋىردا «جاعالاۋ» اۋدانىن ارالاۋ بارىسىندا بالالارعا ارنالعان قوسىمشا ءبىلىم بەرۋ ورىندارى مەن جاڭا بالاباقشالاردى كورگەنىن, ول جەردە ادامعا قاجەتتى عيماراتتاردىڭ بارلىعى قول سوزىم جەردە بولعانى ءۇشىن اكىمگە العىس ءبىلدىردى.
ءوز كەزەگىندە قالا اكىمى ا.كولگىنوۆ بۇل جوبالارعا حالىق تاراپىنان سۇرانىس بار ەكەنىنە, جۋىردا ر.قوشقارباەۆ كوشەسىندە تۇرعىن ءۇي كەزەگىنە تۇرعاندار ءۇشىن تۇرعىن ءۇي بەرىلەتىنىن, ول ءۇيدىڭ ءبىرىنشى قاباتتارى بالالاردى دامىتۋ ورتالىقتارىنا ارنالعانىن ايتتى. ونىڭ ايتۋىنشا, سويلەۋى كەش دامىعان بالالاردىڭ اتا-انالارى دا وسىنداي ارنايى دامىتۋ ورتالىقتارىن اشۋدى سۇراعان. ءۋاليحانوۆ كوشەسىندە دە ەكى بىردەي رەابيليتاتسيالىق ورتالىق اشىلعانىن مىسالعا الدى.
جىلى ايالداما قاجەت
الەۋمەتتىك جەلى ارقىلى دا قالا اكىمىنە سۇراقتار قويىلىپ, ۇسىنىستار ايتىلدى. اكىمدىكتىڭ جۇمىسىنا ريزاشىلىق بىلدىرگەندەر دە بولدى. مىسالى, قالا تۇرعىنى بيبىگۇل يسكاكوۆا اكىمدىكتىڭ بيىل كوپ جۇمىس اتقارعانىنا العىسىن بىلدىرگەن. سونداي-اق قالا تۇرعىنى سامال جاروۆا نازارباەۆ ۋنيۆەرسيتەتى ايالداماسىنا جىلى ايالداما ورناتۋدى سۇرادى. قوسشى اۋىلى تۇرعىندارىنىڭ وتىنىشىنە وراي اكىم جىلى ايالدامانى سالۋعا ۋادە بەردى. «جەلتوقسان ايىنىڭ سوڭىنا دەيىن 12 جىلى ايالدامانى ءبىتىرۋىمىز كەرەك. سامال جاروۆا قويعان ايالدامانى جوسپارعا بەكىتەمىز» دەپ جاۋاپ بەردى ول.
قالا ماڭىنداعى اۋىلدار – نازاردا
№17 سايلاۋ وكرۋگىنىڭ دەپۋتاتى امان ايۋپوۆ ەلوردانىڭ الماتى اۋدانىنا قاراستى «جەلەزنودوروجنىي» كەنتىنىڭ ماسەلەسىن كوتەردى. «گاز كەلدى, بىراق كوممۋنيكاتسيا جوق. جول مەن كاناليزاتسيا ماسەلەسى شەشىلمەگەن. بۇل ماسەلەنى ەكونوميكا بولىمىنە جولداعانمىن, بىراق ولار اكىمدىككە سىلتەپ وتىر. ەكىنشى ماسەلە – يلينكادا ينتەرنەت جەلىسى قيىندىق تۋدىرىپ وتىر. دەپۋتات رەتىندە حالىقپەن كەزدەسكەن كەزدە حالىق وسى ماسەلەنى سۇرادى» دەدى دەپۋتات.
اكىم التاي كولگىنوۆ «جەلەزنودوروجنىي» كەنتىندە قازىرگى ۋاقىتتا گاز جۇرگىزۋگە بايلانىستى قولايسىزدىقتار ورىن الىپ وتىرعانىن, ونىڭ ۋاقىتشا قيىندىق ەكەنىن, الداعى كەزدە شەشىمىن تاباتىنىن ايتتى. «ينتەرنەتكە كەلسەك, بالالار ينتەرنەت ارقىلى وقۋعا كوشكەننەن كەيىن وعان دەگەن سۇرانىس جوعارىلادى. ءبىز قوسىمشا روۋتەرلەر ساتىپ الدىق. ءبىر-ەكى كۇن بۇرىن «قازاقتەلەكوم» وكىلدەرىمەن كەزدەستىم, كۇن تارتىبىندە كونتەنتتى كوبەيتۋ ماسەلەسى تۇر. كەي جەرلەرگە قوسىمشا انتەننالار قوندىرىلادى» دەپ جاۋاپ بەردى.
وڭتايلاندىرۋ مۇمكىندىگى قاراستىرىلا ما؟
زەينوللا شىبكەنوۆ №10 سايلاۋ وكرۋگى بويىنشا ماسەلە كوتەردى. – ءوز وكرۋگىمە قاتىستى ايتسام, جولدىڭ بويى ءالى شەشىلمەي جاتىر. كەراميكالىق كومبيناتتان كوكشەتاۋعا شىعاتىن التى جولاقتى جول بازاردىڭ قاسىنا كەلىپ تۇرىپ قالدى. ەگەر سونى تەزىرەك بىتىرسە, جولداعى قانشاما جۇكتەمەنى ازايتار ەدى. تاعى ءبىر شەشىلمەي جاتقان ماسەلە – №23 مەكتەپكە قوسىمشا عيمارات سالىپ جاتىر, قاسىنداعى №34 مەكتەپتى سۇرەمىز, جاڭادان سالامىز دەپ جاتىر, ول اۋداندا وقۋشىلار جوق دەۋگە بولادى, ەگەر قۇرىلىس جۇرسە وقۋشى كوپ بولار ەدى. باستان-اياق اۋقىمدى جوندەۋ جاساپ, ەكى مەكتەپتى قوسسا ۇلكەن ماسەلە شەشىلەر ەدى. ويتكەنى ەسكىنى سۇرۋگە, قايتا سالۋعا كوپ اقشا جۇمسالايىن دەپ وتىر. ال بىزگە كوشەلەردى رەتكە كەلتىرۋ كەرەك, كوپتەگەن كوشە تۇيىق بولعاندىقتان كەپتەلىس بولادى, اباي كوشەسى دە سونداي, دۇكەنۇلى ءالى بىتپەي جاتىر, اقوردا جاقتا دا كەپتەلىس بولاتىن بولدى. قاراساي باتىر كوشەسىن ءتورت جولاقتان كەڭەيتىپ, 6 نە 8 جولاق قىلىپ سالۋعا بولار ەدى.
التاي كولگىنوۆ: – جول ماسەلەسى – ول ۇيلەردى سۇرۋمەن بايلانىستى شەشىلەتىن ماسەلە, وعان قىرۋار قاراجات كەرەك. سونىمەن بىرگە بايقوڭىر اۋدانىنداعى اينالما جولعا كەلسەك, ول جەردە جەكە جانە كوممەرتسيالىق نىساندار, تۇرعىن ۇيلەر بار, ونىڭ ءبارىن ءسۇرۋ ءۇشىن ۇلكەن قاراجات قاجەت بولادى. ال مەكتەپ ماسەلەسىنە كەلسەك, №23 مەكتەپتى پرەزيدەنتتىڭ ءوزى بارىپ اشتى, ول جەردە بالالار ءۇش اۋىسىمدا وقىپ جاتقاندىقتان قوسىمشا قۇرىلىس سالدىق, كەلەشەكتە, ءسىز ايتقانداي, وڭتايلاندىرۋ مۇمكىندىگىن قاراستىرۋعا بولادى. بىراق ول مەكتەپتەن ۇنەمدەلگەن اقشا مىنا جولعا جەتپەيدى. ونى جوسپارعا قوسامىز. ول جەرگە اينالما جولدى سالۋ ءۇشىن تەمىرجولدىڭ ۇستىنەن كوپىر ءوتۋ كەرەك. ماسەلە شەشىلەدى, بىراق ۇلكەن جوبا-جوسپار قاجەت, – دەگەن اكىم ودان ءارى دۇكەنۇلى كوشەسىندە جاسالعان جۇمىستارعا توقتالىپ ءوتتى.
كولگە ەشكىم تيىسپەيدى
№22 وكرۋگ بويىنشا دەپۋتات سەرگەي سولودوۆنيكوۆ ەسىل اۋدانىن كەڭەيتۋ جۇمىستارى بويىنشا سۇراعىن قويىپ, تۇرعىنداردىڭ نەشە ءتۇرلى سيرەك قۇستار كەلىپ قوناتىن تابيعي توعانعا تيمەۋ تۋرالى ۇسىنىستارىن جەتكىزدى. «كولگە ەشكىم تيىسپەيدى. تالدىكولدىڭ وزىندە كوڭىل كوتەرۋ اۋماعى سالىنادى. ونى كوگالداندىرىپ, حالىق سەرۋەندەيتىن جاعداي جاسايمىز. سول جاعالاۋدا ۇيلەر كوپتەپ سالىنباي تۇرعاندا, مۇندا سارقىن سۋلار جينالاتىن بولعان. ەكولوگياعا زيان كەلمەۋى كەرەك دەگەن پىكىرىڭىزگە قوسىلام. ءبىز ءالى دە بۇل ماسەلەنى قارايمىز» دەپ جاۋاپ بەردى اكىم.
كوۆوركينگ ورتالىقتارى كەرەك
№14 وكرۋگ دەپۋتاتى ەرلان سىدىقوۆ ۇلەسكەرلەر ماسەلەسىنىڭ كوبىرەك شەشىلگەنىنە بايلانىستى اكىمگە العىس ايتتى. مەكتەپ جەتىسپەۋشىلىگى دە شەشىمىن تاباتىنىنا سەنىم ءبىلدىردى. ونىڭ ۇسىنىسى قالانىڭ اباتتاندىرىلۋىنا قاتىستى بولدى. «قالا حالقىنا پاركتەر مەن سكۆەرلەر سالىنا باستاعانى قۋانتادى. بىراق بىزدە كليماتقا بايلانىستى سول پاركتەر تەك التى اي عانا پايدالانىلادى. سونىڭ ءبىر بۇرىشىنان جەڭىل ساۋلەتتىك ۇلگىدە كوۆوركينگ ورتالىقتارىن, سپورت زالدارىن, بالالار وينايتىن جابىق الاڭ سالىپ قويسا حالىق بارار ەدى, توڭعاندا, جاڭبىر جاۋسا كىرىپ-شىعار ەدى» دەدى دەپۋتات.
اكىم ا.كولگىنوۆ بۇل ۇسىنىستى قولدايتىنىن ايتتى: – بىلتىر «تەلمان» جاقتاعى پاركتىڭ جاعدايىن كوردىك, ءشوپ وسكەن, شامدار سىنعان, ورىندىقتار سىنعان, ادام كوپ بارمايدى دەگەن ءسوز. سوسىن ول جەرگە جوندەۋ جۇرگىزدىك, الاڭ سالدىق, ۇلكەن كىسىلەرگە وتىراتىن ورىندار قارالدى, قازىر ول پارككە ادامدار كوپ بارادى. پاندەميا كەزىندە پاركتەردىڭ كەرەگىن تۇسىندىك. ءسىزدىڭ تۇجىرىمىڭىز ءۇشىن پاركتەردە ورىن قالدىرىلعان. كاسىپكەرلەردەن ۇسىنىستار بار. قولدايمىز. ءبارىمىز بيۋدجەتتەن الا بەرمەي, بيزنەس جاسايتىن جەردە مۇمكىندىك جاساۋىمىز كەرەك.
№8 اۋماق وكرۋگىنىڭ دەپۋتاتى التىنشاش تابۋلدينا ءوز اۋماعىندا بىلتىر اتقارىلعان جۇمىستارعا توقتالا كەلىپ, شيەلى جانە ۇيالى كوشەسىندە كاناليزاتسيا ماسەلەسى بارىن ايتتى. «اگروگورودوك» اۋدانىندا ۇيلەر سۋىق جانە ۇيلەردىڭ استىنا سۋ جينالعان. كەلەر جىلى اعىن سۋ كاناليزاتسياسىن جاساعان كەزدە سول كوشەلەردىڭ دە ماسەلەسىن ەسكەرسەڭىز ەكەن» دەپ ءوتىنىش ءبىلدىردى.
ۇسىنىستار اياقسىز قالمايدى
«اگروگورودوك» تۇرعىندارىنىڭ ماسەلەسىن بىلەمىن. تۇرعىندارمەن كەزدەسكەندە «ءبىز وسى جەردىڭ ادامدارىمىز, ءبىزدى ۇمىتپاڭىز» دەپ ايتقانى ەسىمدە. شيەلى, ۇيالى كوشەلەرىندە جارىقتاندىرۋ جاسادىق, جول توسەلىپ جاتىر. بىراق ءسىز ايتقان ماسەلەنى 2021 جىلى جاسايمىز دەپ تاپ قازىر ۋادە بەرە الماسپىن. قازىر ءبىز باستالعان جۇمىستاردى ءبىتىرۋىمىز كەرەك».
الەۋمەتتىك جەلى ارقىلى كەلگەن سۇراقتار ىشىندە سامال شاروۆا قوسشى اۋىلىنىڭ 90 پايىزى ەلوردادا جۇمىس ىستەيتىنىن ايتا كەلىپ, قوسشى اۋىلىنا قاشان گاز جۇرگىزىلەتىنىن سۇرادى. سونداي-اق گاريت نۇرسۇلتانۇلى «ۇلى دالا, 19-ءۇيدىڭ ماسەلەسى بويىنشا اكىمدىكتىڭ بارلىق ءتيىستى باسقارمالارىنا شاعىم تۇسىرىلسە دە ناقتى جۇمىس اتقارىلمادى. وسى تۇرعىن ءۇي بويىنشا مەمل. ەكسپەرتيزا, تەحباقىلاۋ سياقتى قۇزىرلى ورگاندارىنان تۇراتىن كوميسسيادان ناقىت شەشىم قابىلداۋىن سۇرايمىز» دەپتى.
اكىم قوسشىنى گازداندىرۋ جوسپارعا سايكەس جۇرگىزىلەتىنىن ايتتى. سونىمەن بىرگە «ۇلى دالا ۇيىندە قانداي ماسەلە بارىن انىقتاپ الىپ, ءتيىستى ادامدارعا تاپسىرامىز» دەپ جاۋاپ بەردى.
15-وكرۋگ بويىنشا دەپۋتات يليا مەششەرياكوۆتىڭ قىلمىستىڭ الدىن الۋ, ونىڭ ىشىندە ناشاقورلىققا قاتىستى پروفيلاكتيكالىق جۇمىستار تۋرالى سۇراعىنا جاۋاپ بەردى.
سونداي-اق سەسسيادا نۇر-سۇلتان قالاسىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ق.ماڭقاراەۆتىڭ ەسەبى تىڭدالدى.
