الەمدەگى ءاربىر حالىقتىڭ بەتكەۇستار تۇلعالارى مەن داڭقتى باتىرلارى بولادى. ولار ەل باسىنا ەكىتالاي كۇن تۋىپ, قيىندىقتارعا تاپ بولعاندا, كوپتىڭ ىشىنەن سۋىرىلىپ شىعىپ, وتقا دا, سۋعا دا تۇسەدى. قان توگىپ, جان بەرۋگە بەل بايلايدى. قازاقتان شىققان وسىنداي تۇلپار ءمىنىپ, تۋ ۇستاعان باتىرلاردىڭ ءبىرى جانە بىرەگەيى – باۋىرجان مومىشۇلى.
استانادا داڭقتى قولباسشى تۋرالى «باۋىرجان مومىشۇلى» ءفيلمىنىڭ تۇساۋكەسەرى ءوتىپ, ءبىرىنشى سەرياسى كورسەتىلدى. فيلمدە اسكەري قىزمەتتەگى جىگەرلى جىگىت باۋىرجاننىڭ سوعىس باستالىسىمەن وتانىن قورعاۋعا اتتانسام دەگەن ارمانى, گەنەرال پانفيلوۆپەن تانىسۋى, قولىنداعى كۇرەگى مەن قالامسابىن قارۋعا الماستىرعان ازاماتتىڭ قان مايدانعا دايىندىعى جانە باتالون كومانديرى رەتىندەگى العاشقى شايقاسى تاسپالانعان. ءىس-شارا بارىسىندا كوپشىلىك داڭقتى تۇلعانىڭ اشىق تا جارقىن ءوز داۋىسىن ەستىپ, رۋحتانىپ قالدى.
اتى اڭىزعا اينالعان قاھارمان جايلى تاريحي ءفيلمدى ءتۇسىرۋ يدەياسى «حابار» اگەنتتىگىنە تيەسىلى. باستاما اۆتورلارى بۇل جوبانى جۇزەگە اسىرۋدى تانىمال رەجيسسەر اقان ساتاەۆقا سەنىپ تاپسىرعان ەكەن. سيۋجەت نەگىزىنە جازۋشى الەكساندر بەكتىڭ ايگىلى «ۆولوكولامسك تاس جولى» پوۆەسى الىنعان. كينونىڭ ءتۇسىرۋ جۇمىستارى تالعاردا جانە مينسكىدە جۇرگىزىلدى. بايقاعانىمىز, شىعارماشىلىق توپ باۋىرجان مومىشۇلىنىڭ ءومىر جولىنا ارقاۋ بولعان ءتورت سەريالى ءفيلمدى اقيقاتتان بارىنشا اۋىتقىماي تۇسىرگەن. رەجيسسەر ۇلتتىق باتىرىمىزدىڭ بار بولمىسىن بەرۋگە تىرىسقان. باستى رولدە م.اۋەزوۆ اتىنداعى قازاق مەملەكەتتىك اكادەميالىق دراما تەاتردىڭ ءارتىسى ەركەبۇلان دايىروۆ وينايدى. جيىرما سەگىز جاستاعى ەركەبۇلان سەريالعا بايلانىستى ىرىكتەۋ سىنىندا-اق شىعارماشىلىق توپ جەتەكشىلەرى ونىڭ ءباھادۇر قولباسشىعا ۇقسايتىندىعىن اڭعارعان. ءوزىنىڭ ايتۋىنشا, اكتەر مومىشۇلىمەن ۇقساستىعى تۋرالى بۇرىن ەشقاشان ويلانباعان كورىنەدى. «شىنىمدى ايتسام, رولگە بەكىتىلگەن سوڭ, باۋكەڭنىڭ شىعارمالارىن جان-جاقتى زەردەلەي وقىدىم. ونداعى ماقساتىم, ەكراندا كىمنىڭ بەينەسىن جاساپ وتىرعانىمدى تەرەڭ ءتۇسىنۋ ەدى. تۇيىندەي كەلىپ قورىتقان ويىم, قازاقتا وسىنداي دارا ازاماتتىڭ بولعانىنا ماقتانۋىمىز كەرەك. كەيىنگى ۇرپاق باۋىرجاننىڭ بويىنداعى باتىرلىقتى, باتىلدىقتى ۇلتىن سۇيگەن, ءتىلىن قادىرلەگەن قاسيەتىن بويلارىنا دارىتسا ەكەن دەگەن نيەتپەن باتىر بەينەسىن كورسەتۋگە بار كۇش-جىگەرىمدى جۇمسادىم» دەيدى بىزبەن اڭگىمەسىندە.
باۋىرجان مومىشۇلىنىڭ جۇبايى جامالدىڭ وبرازىندا اسەل ساعاتوۆا وينايدى. «باۋىرجان اتامىزدىڭ جۇبايىن كينودا كەيىپتەۋ – مەن ءۇشىن ۇلكەن مارتەبە. ول كىسى ەرەكشە ادام بولعان. ونىڭ وتباسى تۋرالى ادەبيەتتە از جازىلادى. سوندىقتان, ول كىسى جايىندا جاقسىراق ءبىلۋ ءۇشىن كەلىنى زەينەپ اپامەن كەزدەسىپ, كوپ مالىمەتتەر الدىم. وسىنداي ەرەكشە اداممەن تىزە قوسىپ ءومىر سۇرگەنىنە قاراعاندا, مەنىڭ كەيىپكەرىم – وتە اقىلدى ايەل» دەيدى اسەل. ال فيلمدەگى گەنەرال پانفيلوۆ ءرولى ۆيكتور اشانينگە, لەيتەنانت قاسەنوۆ ءرولى سايات ەسەمباەۆقا بۇيىرعان. سونداي-اق, ماقسات ءسابيتوۆ, باقتيار قوجا, اسىلحان تولەپوۆ, دميتري سكيرتا سىندى ارتىستەر دە تۇسكەن.
كينوتۋىندىنىڭ پرەمەراسى ءساتتى ءوتتى. كورەرمەندەر كوڭىلدەرى تولقىپ, ەرەكشە اسەرگە بولەنگەندەرىن جارىسا جەتكىزىپ جاتتى. ەلى سۇيگەن ەردىڭ ءومىرى مەن قان مايدانداعى ەرلىگىن باياندايتىن سەريال 17 جەلتوقساننان باستاپ, «حابار» ارناسىنان كورسەتىلەتىن بولادى. تاريحي ءفيلمنىڭ كورەرمەنگە ۇنايتىندىعىنا شىعارماشىلىق توپتىڭ ەش كۇمانى جوق. ويتكەنى, كۇنى كەشە عالامتور جەلىسىندە جاريالانعان تەلەحيكايانىڭ رەسمي ترەيلەرىنىڭ ءوزى مىڭنان استام كورەرمەن جيناپ ۇلگەرگەن.
ەركەجان ساتىمبەك
