1970 جىلى بۇكىل كەڭەس وداعى حالىقتارى نەمىس-فاشيست باسقىنشىلارىن تالقانداۋدىڭ 25 جىلدىعىن اتاپ ءوتتى. جەر-جەردە ۇلى وتان سوعىسىنىڭ ارداگەر جاۋىنگەرلەرىمەن كەزدەسۋ كەشتەرى ءوتتى.
ۇلى جەڭىستىڭ شيرەك عاسىرلىق تورقالى تويى قارساڭىندا تسەلينوگراد قالاسىندا اقمولا ءوڭىرىنىڭ تۋمالارى, ەل باعىنا تۋعان قاھارمان باتىرلارمەن ارناۋلى ورتا وقۋ ورىندارى, جوعارى وقۋ ورىندارىنىڭ وقىتۋشىلارى, ستۋدەنتتەرى كەزدەستى. باسقوسۋدا باتىرلار: مايبالىق اۋىلىنىڭ تۋماسى, كالينين مايدانىنداعى رجەۆ قالاسىنىڭ تۇبىندە, ۆورونەج, ستەپنوي 2, ۋكراينا ءى مايداندارىندا جاۋمەن ايقاسقا تۇسكەن قايسار ۇشقىش, 144-گۆارديالىق شابۋىل اۆياتسيا پولكىنىڭ ەسكادريليا كومانديرى, ەكى مارتە كەڭەس وداعىنىڭ باتىرى تالعات بيگەلدينوۆ, اقتوبە (قازىرگى راحىمجان قوشقارباەۆ اۋىلى) اۋىلىنىڭ تۋماسى, 150-اتقىشتار ديۆيزياسىندا ۆزۆود كومانديرى بولىپ, بەلارۋس, پولشا, گەرمانيانى ازات ەتۋگە قاتىسقان, بەرليندەگى رەيحستاگقا جەڭىس تۋىن تىككەن قازاقتىڭ ەرجۇرەك ازاماتى راقىمجان قوشقارباەۆ, اقكول اۋدانىنىڭ تۋماسى (بۇرىنعى الەكسەەۆكا), كراسنودار ولكەسىن, ۋكراينا, مولداۆيا, باتىس بەلورۋسسيا, پولشانى ازات ەتۋگە قاتىسقان 301-اتقىشتار ديۆيزياسى 1052-اتقىشتار پولكى پۋلەمەت روتاسىنىڭ كومانديرى, كەڭەس وداعىنىڭ باتىرى ساعادات نۇرماعامبەتوۆ سوعىس كەزىندەگى «تار جول, تايعاق كەشۋگە» تولى جاۋىنگەرلىك ءومىرىن بايانداپ بەردى. كەزدەسۋ اسەرلى ءوتتى, اقمولالىق باتىرلاردىڭ ەرلىگى ۇرپاقتان-ۇرپاققا اڭىز بولىپ تارالدى.
سۋرەت 1970 جىلى جەڭىستىڭ 25 جىلدىعى مەرەكەسى قارساڭىندا تۇسىرىلگەن.
عازيزا يساحان
