حاجىمۇرات راحيموۆ 1924 جىلى اقمولا قالاسىندا ومىرگە كەلگەن. وسى جەردە مەكتەپ ءبىتىرىپ, سودان سوڭ مۇعالىمدەردىڭ ءۇش ايلىق كۋرسىن ءتامامدايدى, ەڭبەك جولىن ۇستازدىقتان باستايدى. تۇتقيىلدان سۇراپىل سوعىس باستالىپ زامانداستارىمەن قاتار ءوزى سۇرانىپ, قولىنا قارۋ الىپ قان مايدانعا اتتانادى.
گۋرەۆ وبلىستىق «سوتسياليستىك قۇرىلىس» گازەتىنىڭ جاۋاپتى حاتشىسى, «ەسىل پراۆداسى» گازەتىندە ءبولىم مەڭگەرۋشىسى, جاۋاپتى حاتشى بولىپ ىستەگەن. تسەلينوگراد (اقمولا) وبلىستىق اتقارۋ كوميتەتىندە اعا نۇسقاۋشى, وبلىستىق تەلەۆيزيادا رەداكتور قىزمەتتەرىن اتقارعان. العاشقى شىعارمالارى 1940 جىلدان كورىنە باستادى, كسرو جازۋشىلار وداعىنىڭ مۇشەسى. كسرو مەدالدارىمەن, 2-دارەجەلى وتان سوعىسى وردەنىمەن ماراپاتتالعان.
1953 جىلى قازاق مەملەكەتتىك ۋنيۆەرسيتەتى فيلولوگيا فاكۋلتەتىنىڭ جۋرناليستيكا ءبولىمىن بىتىرگەن.
تالاي قيىندىقتى باستان كەشىرگەن تاعدىرلى جازۋشى ءوز كوزىمەن كورگەن, جاقسى بىلەتىن ومىرلىك جايلارعا قالام تەربەگەن. جازۋشىنىڭ جيىرماسىنشى عاسىردىڭ باس كەزىندەگى اقمولا ءوڭىرىنىڭ قوعامدىق, الەۋمەتتىك ەرەكشەلىكتەرىن, سول ءداۋىردىڭ شىندىعىن بايانداعان «سەڭگىر سىرلارى» تريلوگياسى, وسى تريلوگيانىڭ زاڭدى جالعاسى 1997 ج. جارىق كورگەن «قاسىرەت قۇرساۋى» رومانى, ەكىنشى دۇنيەجۇزىلىك سوعىس تاقىرىبىنا ارنالعان «پولك تۋى», «قىزعالداقتار», «باۋىرلاستار بەيىتى» پوۆەستەرى جانە باسقا شىعارمالارىنداعى وقيعالار تارتىمدى, ايتار ويى بار.
حاجىمۇرات راحيموۆتىڭ جەكە ارحيۆ قورى استانا قالاسىنىڭ مەملەكەتتىك ارحيۆىندە ساقتاۋلى.
عازيزا يساحان
