اقمولا توپىراعى – تالاي تالانتتى ومىرگە اكەلگەن تاريحي ولكە. اسىرەسە كەشەگى تىڭعا تۇرەن سالعان كۇردەلى جىلداردا بۇل ايماقتان اقىن-جازۋشىلار ارىلعان جوق. قازاق ادەبيەتىنىڭ ءىرى وكىلدەرى وزدەرى باستاپ تسەلينوگراد جەرىندەگى قاراپايىم حالىقتىڭ, اۋىل تۇرعىندارىنىڭ تۇرمىس-تىرشىلىگىمەن تانىسىپ, ولاردىڭ ءومىر جولى مەن جانكەشتى ەڭبەگىن قالامنىڭ قارىمىمەن بۇقاراعا پاش ەتتى.
قازاق قالامگەرلەرىنىڭ تسەلينوگرادقا ەڭ كوپ ات باسىن بۇرعان كەزەڭ 1970-1975 جىلدار ەكەن. وسى جىلداردا ولكەدە بىرنەشە سەمينار-كەڭەس ءوتىپ, جەرگىلىكتى جاس تالانتتاردى قولداۋ باعىتىندا شىعارماشىلىق فەستيۆال ۇيىمداستىرىلىپتى. جەرگىلىكتى حالىقتىڭ ەسىندە كوبىرەك قالعانى – 1970 جىلدىڭ تامىز ايىندا تسەلينوگراد قالاسىندا قازاقستاندىق اقىن-پروزايكتەر اپتالىعىنىڭ ءوتۋى. بۇعان تىڭ ولكەسى قالامگەرلەرىنىڭ ايرىقشا دايىندالعانى اڭعارىلادى. وسى ساپاردا قازاقتىڭ بەلدى قالامگەرلەرى ديحان ءابىلوۆ, عالي ورمانوۆ, ساعىنعالي سەيىتوۆ, جۇبان مولداعاليەۆ, قاسىم قايسەنوۆ, تاعى باسقالار اپتا بويى بىرنەشە رەت وقىرماندارمەن كەزدەسىپ, تىڭ ەڭبەككەرلەرىنە وزدەرىنىڭ شىعارمالارى مەن الداعى شىعارماشىلىق جوسپارلارىن تانىستىرىپتى. شىعارماشىلىق اپتالىقتىڭ جەمىستى بولعانى سونشا, وسىدان كەيىن كوپ كەشىكپەي جۇبان مولداعاليەۆ تاتار اقىنى مۇسا جالەل تۋرالى ءوزىنىڭ اتاقتى «جىر تۋرالى داستان» جانە «مەن قازاقپىن» پوەمالارىن ومىرگە اكەلسە, مايدانگەر اقىن ساعىنعالي سەيىتوۆ «ءومىر ورنەكتەرى» مەن «توعىسقان تاعدىرلارىن» جازدى.
سۋرەتتە 1970 جىلى ديحان ءابىلوۆ, عالي ورمانوۆ, قاسىم قايسەنوۆ, جۇبان مولداعاليەۆ, ساعىنعالي سەيىتوۆتىڭ تىڭ ولكەسىندەگى اقىن-جازۋشىلار اپتالىعى كەزىندە جاس قالامگەرلەرمەن كەزدەسۋ ءساتى.
عازيزا يساحان
