اقمولا – س.سەيفۋلليننىڭ ومىرىندە ەرەكشە ورىن العان قالا. قوعام جانە مەملەكەت ىسىنە ارالاسقان, قايراتكەر بولىپ قالىپتاسقان اقمولا جەرىندە ونىڭ قالدىرعان ءىزى, قىمبات مۇراسى از ەمەس. س.سەيفۋللين مۋزەيىن اشۋ ماسەلەسى 1984 جىلدان قوزعالىپ, تەك 1988 جىلى قوعامدىق پىكىردىڭ دۇمپۋىمەن حالىق يگىلىگىنە اينالدى.
قازاقستان رەسپۋبليكاسى مينيسترلەر كەڭەسى 1988 جىلى 21 قاڭتاردا تسەلينوگرادتا ساكەن سەيفۋللين مۋزەيىن اشۋ جونىندە قاۋلى قابىلدايدى.ال 28 قاڭتاردا مادەنيەت مينيسترلىگى ءتيىستى بۇيرىق شىعارادى. اقمولالىقتار مەن قالا قوناقتارى دومبىرانىڭ اۋەزدى ۇنىمەن سول جىلدىڭ 20 اقپانىندا ايازدى كۇنى اقىن الەمى, الداسپان ازاماتتىڭ عۇمىر كوشى بەدەرلەنگەن مۋزەيدىڭ اشىلۋ سالتاناتىنا جينالادى. تسەلينوگراد قالالىق اتقارۋ كوميتەتىنىڭ توراعاسى امانجول قۋانىشۇلى بولەكباەۆ لەنتانى قيۋ قۇرمەتىنە يە بولادى. تسەلينوگراد وبلىستىق پارتيا كوميتەتىنىڭ ءبىرىنشى حاتشىسى اندرەي براۋن دا بۇل شاراعا قاتىسادى.
اقىن مۇراجايى كۇنى بۇگىنگە دەيىن بۇقاراعا قىزمەت ەتىپ كەلەدى. ەكسپوزيتسياسى التى زالدا ورنالاسقان. وندا 5 مىڭنان استام زات قويىلعان. بۇل, نەگىزىنەن, جازۋشىنىڭ ايەلى مەن تۋىستارى مۇراجايعا تاپسىرعان جەكە زاتتارى, بىرەگەي فوتوماتەريالدار, كىتاپتار, ەشكىمگە بەلگىسىز قۇجاتتار, مۇراعات قۇجاتتارىنىڭ كوشىرمەلەرى, گازەت قيىندىلارى, سونداي-اق جازۋشىنىڭ شىعارماشىلىعى مەن ومىرىنە ارنالعان مۇسىندەر مەن كارتينالار, ونەر تۋىندىلارى.
سۋرەتتە ساكەن سەيفۋللين مۋزەيىنىڭ اشىلۋ ءساتى.
عازيزا يساحان
