قازاق كسر حالىق ءارتىسى (1979), كسرو حالىق ءارتىسى (1986), مەملەكەتتىك سىيلىقتىڭ لاۋرەاتى (2012), قازاقستاننىڭ ەڭبەك ەرى (2021), وپەرا ءانشىسى ء(انشى-ۆوكاليستەردىڭ بۇكىلوداقتىق جانە حالىقارالىق كونكۋرستارىنىڭ بىرنەشە مارتە جۇلدەگەرى, اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ ءانشىسى) الىبەك دىنىشەۆ تسەلينوگراد وبلىسىنىڭ تىڭگەرلەرىمەن العاش رەت 1976 جىلى جۇزدەسكەن ەدى.
ءانشى ەسىل وڭىرىنە ەكىنشى رەت 1985 جىلى 23 اقپان كۇنى كەلىپ, وداقتار ءۇيىنىڭ كولوننالى زالىندا «ماسكەۋ جۇلدىزدارى» فەستيۆالىنە قاتىستى. كەيىن ءبىر ايدان سوڭ ماسكەۋدەگى جەكە كونتسەرتتىك باعدارلاماسىن رەسپۋبليكامىزدىڭ ورتالىق جانە سولتۇستىك وبلىستارىندا ەل يگىلىگىن ەسەلەپ ارتتىرىپ جۇرگەن ەڭبەك ادامدارىنا تانىستىرادى. ال 1985 جىلدىڭ ناۋرىز ايىندا تسەلينوگراد قالاسىندا جارقىن تالانتىمەن, قۇلاقتان كىرىپ بويدى الار اۋەزدى انىمەن جۇرتشىلىقتىڭ ىستىق ىقىلاسىنا بولەنگەن ءانشى «كوممۋنيزم نۇرى» گازەتىنىڭ ارناۋلى ءتىلشىسى ماكەن مەرگەنباەۆاعا بەرگەن سۇحباتىندا «…قاي ماماندىقتا بولسىن تابىس سىرى ەڭ الدىمەن ەرىنبەي ەڭبەكتەنۋدە بولسا كەرەك. ال ءانشى ءۇشىن تۋما تالانت ازدىق ەتەدى. انشىگە ەڭ الدىمەن سۇلۋلىق سىرىن سەزىنەر سەزىمتال جۇرەك كەرەك, ويتكەنى سىرلى سازدى اسەم ءان سەرگەك جۇرەكتەن شىقپاسا, جۇرەككە جەتپەيدى. بۇعان ەڭبەكسۇيگىشتىك قوسىلسا عانا ونەر ادامى ءوزىنىڭ حالىق الدىنداعى پارىزىن وتەي الماق. مەن ونەر جولىنداعى ازدى-كوپتى تابىسىم ءۇشىن ەڭ الدىمەن مۋزىكا ونەرىمىزدىڭ ءىنجۋ-مارجانى – حالىق اندەرىنە قارىزدارمىن دەر ەدىم. سودان سوڭ اباي اندەرىن ەرەكشە اتار ەدىم, جالپى كلاسسيكالىق شىعارمالاردى ءسۇيىپ ورىندايمىن» دەپ وقىرمانداردى ءوز رەپەرتۋارىمەن تانىستىرادى, گاسترولدىك ساپارىنىڭ ماقساتى مەن الداعى جوسپارى تۋرالى بولىسەدى.
عازيزا يساحان
