استاناداعى ۇلتتىق مۋزەيدە وزبەكستان رەسپۋبليكاسى ەلشىلىگىنىڭ ۇيىتقى بولۋىمەن «وزبەكستاننىڭ زاماناۋي كەسكىندەمەسى» اتتى كورمە اشىلدى.
بۇل كورمەگە اعايىن ەلدىڭ ايتۋلى قىلقالام شەبەرلەرى – فايزۋللا احماداليەۆ, حۋرشيد زياحانوۆ, نودير شوابدۋراحيموۆ, اليشەر اليكۋلوۆ, ۆالەريا ەنينا, ۆيكتوريا تروشينا, ديلوروم مامەدوۆا, باحتيور وبيدوۆ, ابدۋحاكيم كاريموۆ, ديلمۋرود يۋلداشەۆ, ۋمار راجابوۆ پەن بىرقاتار جاس سۋرەتشىنىڭ 38 تۋىندىسى قويىلدى.
كورمەنىڭ اشىلۋىندا ۇلتتىق مۋزەي ديرەكتورىنىڭ مىندەتىن اتقارۋشى الماز نۇرازحان ءسوز الىپ, شارانىڭ ماڭىزىنا قىسقاشا توقتالىپ ءوتتى.
كورمەگە قويىلعان تۋىندىلار شىنايى تابيعيلىعىمەن كوز تارتادى. ءاربىر سۋرەتشى ءوز جۇمىسىندا تۋعان ەلىنىڭ تاريحى مەن تابيعاتىن كوركەم شەبەرلىكپەن جەتكىزە بىلگەن. ءوز باسىم وزبەكستاندى كوزىممەن كورمەسەم دە, كارتيناداعى بەينەلەردەن سول ەلگە بارعانداي اسەردە بولدىم. داستۇرگە بەرىك باۋىرلاردىڭ سالت-ءداستۇرى دە تاماشا كورىنىس تاپقان.
ايتقانداي, وسى شارا اياسىندا «زاماناۋي وزبەكستان» اتالعان فوتوكورمە جۇرتشىلىققا ۇسىنىلدى. بۇعان ا.جۇماەۆ, ۆ.گونچارەنكو, ح.شوراحمەدوۆ, ۆ.شلوسبەرگ, ۆ.ۆياتكين, ۆ.سوكولوۆ سەكىلدى شەبەرلەردىڭ 100 فوتوسۋرەتى قويىلعان. بۇل سۋرەتتەردەن تاۋەلسىزدىك العاننان بەرگى وزبەك ەلىنىڭ تىنىس-تىرشىلىگىمەن جاقىنىراق تانىسا تۇسەسىز.
