ەلوردانىڭ بايقوڭىر اۋدانى اۋماعىندا كوكتەمگى سانيتارلى تازالاۋ جۇمىستارى قىزۋ قولعا الىندى. سونىڭ ىشىندە ەلوردا تۇرعىندارى كوپ سەرۋەندەيتىن قوعامدىق ورىندار مەن ساياباقتارداعى ەسكەرتكىشتەردىڭ تازالىعىنا ەرەكشە كوڭىل بولىنۋدە. قازىر اۋدان اۋماعىندا ورنالاسقان بارلىق ەسكەرتكىشتەردى جۋ جۇمىستارى جۇرگىزىلۋدە. بۇل اۋداندا ۇلتىمىزدىڭ كورنەكتى تۇلعالارىنا ارنالعان بارلىعى 10-عا جۋىق ەسكەرتكىش ورنالاسقان.
كوشەلەر تازالانىپ قالدى
جالپى كۇن جىلىنىپ, كوكتەمنىڭ لەبى بىلىنگەن ساتتەن باستاپ بايقوڭىر اۋدانىندا كوپىرلەردى, قوعامدىق كەڭىستىكتەردى, اۋلالاردى جانە قالالىق ينفراقۇرىلىمنىڭ وزگە دە نىساندارىن سانيتارلىق تازالاۋ جۇمىستارى جۇرگىزىلىپ جاتىر. كوممۋنالدىق قىزمەتتەر قوقىستان تازارتىپ, ەرىگەن قار سۋىن ارنايى تەحنيكامەن سورىپ الادى. سول سياقتى تروتۋارلاردى, اسفالتتى, قورشاۋلاردى جۋمەن اينالىسۋدا.
بۇگىنگى تاڭدا اتالعان تازالىق جۇمىستارى اۋداننىڭ بىرقاتار كوشەلەرىندە جۇرگىزىلدى. بۇل جۇمىسقا 150-دەن استام ارنايى تەحنيكا مەن 200-دەن اسا ادام جۇمىلدىرىلدى. اۋداندى سانيتارلىق-تازالاۋ جۇمىستارى ءالى دە جالعاسادى.
ايرىقشا اتاپ وتەرلىگى, 16 ءساۋىر كۇنى جالپىقالالىق سەنبىلىك وتەدى. ودان, ارينە, بايقوڭىر اۋدانىنىڭ باسشىلىعى مەن تۇرعىندارى دا تىس قالمايدى. اۋدان اكىمى ەرلان جاۋلىباەۆ اۋداننىڭ بىرقاتار اۋماقتارىن ارالاپ, اباتتاندىرۋ ماۋسىمىنا دايىندىق جۇمىستارىن پىسىقتادى. وسى جىلى جايلاستىرىلاتىن قوعامدىق كەڭىستىكتەردىڭ ورىندارى مەن ونداعى سانيتارلىق-تازالىق جۇمىستارىن تەكسەردى. الداعى ەكولوگيالىق ايلىق اياسىندا وتكىزىلەتىن سەنبىلىككە بايلانىستى دايىندىق جۇمىستارىن قاداعالادى. اۋدان اكىمى جاۋاپتى ماماندارعا ءتيىستى تاپسىرمالار جۇكتەدى. ارالاۋ بارىسىندا اۋدانداعى كەيبىر شاعىن جانە ورتا بيزنەس ورىندارىندا بولىپ, قاسبەتتەر, سونداي-اق اۋماقتارىنداعى تازالىق جۇمىستارىن رەتكە كەلتىرۋ بويىنشا ەسكەرتۋلەر جاسادى. اۋداندى ارالاۋ كەزىندە تۇرعىنداردىڭ تاراپىنان سۇراقتار قويىلدى. سايكەسىنشە, اۋدان اكىمى ءتيىستى جاۋاپتاردى بەرىپ, قويىلعان ساۋالدار بويىنشا اتقارىلاتىن جۇمىستاردى اتاپ ءوتتى.
بيىل «جاستار» شاعىن اۋدانىن اباتتاندىرۋ جالعاسادى. وتكەن جىلى مۇنداعى ت.حۋسەين 2/2, ج.تاشەنوۆ 17/1, ا.باراەۆ 10/1 مەكەنجايلارىنداعى اۋلالار اباتتاندىرىلدى. بيىل ءتيىستى جۇمىس «حالىق قاتىساتىن بيۋدجەت» باعدارلاماسى اياسىندا جۇرگىزىلەدى.
اباتتاندىرۋ جوسپارى
بايقوڭىر اۋدانى بويىنشا بۇل باعدارلاماعا قاتىسۋعا كەلىپ تۇسكەن وتىنىشتەر مەن جوبالاردى ءتيىستى كوميسسيا 14 ساۋىرگە دەيىن قارايدى. سودان كەيىن تۇرعىنداردان كەلىپ تۇسكەن ۇسىنىستارعا داۋىس بەرۋ كەزەڭى باستالادى. وسى ايدىڭ اياعىندا سونىڭ قورىتىندىلارى شىعارىلىپ, جوبالاردى ىسكە اسىرۋ قولعا الىنادى.
وسى جىلى ش.ءۋاليحانوۆ كوشەسىنەن رەسپۋبليكا داڭعىلىنا دەيىنگى ارالىقتاعى ا.باراەۆ كوشەسى اباتتاندىرىلادى. مۇنداعى باستى ماقسات وسى كوشەنى جاسىل جەلەككە وراپ, تۇرعىندار دەمالاتىن ايماقتاردى قۇرۋ. نۇر-سۇلتان قالاسى ۋربانيستيكا ورتالىعىنىڭ باسشىسى ەلنار بازىكەن جۋىردا بۇل جوبانى بايقوڭىر اۋدانى اكىمىنىڭ ورىنباسارى ماقسات ساماتۇلى, اۋدان اكىمدىگىنىڭ قىزمەتكەرلەرى, «استانا كوگالداندىرۋ قۇرىلىسى» لاندشافت شەبەرحاناسىنىڭ جەتەكشىسى گۇلنۇر بەكمۇحامبەتوۆامەن بىرگە تالقىلادى.
شەتكى ايماقتارعا – ەرەكشە كوڭىل
اۋدان باسشىسى ەرلان جاۋلىباەۆ اۋدانداعى ماسەلەلەردى تۇرعىندارمەن بىرگە شەشۋگە تىرىسىپ جاتىر. وسى كۇندەرى ونىڭ حالىقپەن كەزدەسۋلەرى وتۋدە. جەكە قابىلداۋلارى دا ۇيىمداستىرىلعان. اسىرەسە, شەتكى ايماقتار سانالاتىن «ءوندىرىس», «كيرپيچنىي», «كازگورودوك» تۇرعىن الاپتارى حالقىنىڭ ماسەلەلەرىنە ەرەكشە كوڭىل ءبولىنىپ جاتىر.
وسى اپتادا «ءوندىرىس» تۇرعىن الابىنىڭ تۇرعىندارىمەن كەزەكتى كەزدەسۋىندە كارىز جۇيەسى, سانيتارلىق-تازالىق جۇمىستارى, اباتتاندىرۋ جانە قوعامدىق كەڭىستىكتى جايلاستىرۋ, الەۋمەتتىك ماسەلەلەرى ءسوز بولدى. اتالعان ماسەلەلەر بويىنشا ءتيىستى نورمالارعا سايكەس اتقارىلۋى كەرەك جۇمىستاردى اۋدان اكىمدىگىنىڭ جاۋاپتى ماماندارى تۇرعىندارعا ءتۇسىندىردى. اۋدان اكىمىنىڭ تاپسىرماسىمەن بىرقاتار ماسەلەلەر جوسپارعا ەنگىزىلدى. اۋدان تۇرعىندارىنان كەلىپ تۇسكەن بارلىق ماسەلەلەردى تولىققاندى قامتۋ ماقساتىندا تۇرعىندارمەن تۇراقتى كەزدەسۋلەر ءالى دە جالعاسادى.
ال 13 ساۋىردە ەرلان جاۋلىباەۆ «كيرپيچنىي» تۇرعىن الابىنىڭ تۇرعىندارىمەن كەزدەسەدى. اۋدان اكىمىنىڭ وسى اپتاداعى جەكە قابىلداۋىنا كەلگەن تۇرعىنداردىڭ جول بەلگىلەرىن ورناتۋ جانە جولداردى تەگىستەۋ, ساياباقتاردى سالۋ, پاركينگ, جارىقتاندىرۋ, اباتتاندىرۋ جانە الەۋمەتتىك كومەك بويىنشا وتىنىشتەر مەن ۇسىنىستارى تىڭدالدى. اكىمدىك پەن حالىق اراسىنداعى ءوزارا قارىم-قاتىناستى ارتتىرۋ ماقساتىندا اۋدان اكىمى ازاماتتاردى اپتا ساي̆ىن قابىلداي̆دى. قابىلداۋعا +7 (7172) 55-75-19 باي̆لانىس ءنومىرى ارقىلى جازىلۋعا بولادى.
مەكتەپ سالىنىپ, ەمحانا جوندەلدى
اۋدان تۇرعىندارى مەكتەپ, بالاباقشا, سپورت نىساندارىن سالۋ, سۋمەن جابدىقتاۋ جانە ت. ب. ماسەلەلەر بويىنشا ءوتىنىش ايتقان. وتكەن جىلدىڭ قىركۇيەگىندە «ءوندىرىس» ەلدى مەكەنىندە بەس قاباتتى مەكتەپ اشىلدى. بۇل نىسان مەملەكەت باسشىسىنىڭ تاپسىرماسى بويىنشا قازىرگى №23 ورتا مەكتەپ اۋماعىنا سالىندى.
ەسكى مەكتەپتە اسحانا, اكت زالى, مۇعالىمدەر بولمەسى, ادىستەمەلىك كابينەت بولماعان ەدى. اتالعان پروبلەمالاردىڭ ءبارى, سول سياقتى تىعىزدالعان رەجيم ماسەلەسى دە شەشىلدى. بيىل «كيرپيچنىي» ەلدى مەكەنىندە تاعى ءبىر مەكتەپ سالىنباق. سونداي-اق جەكە ينۆەستور ەسەبىنەن بالاباقشا قۇرىلىسى دا باستالماق.
اۋدان اۋماعىن سۋمەن جابدىقتاۋ, گازداندىرۋ, اۋلالاردى اباتتاندىرۋ ماسەلەلەرى دە نازاردان تىس قالعان جوق. ماسەلەن, بىلتىر سورعى-سۇزگى ستانساسىنىڭ (سسس) قۇرىلىسى باستالسا, 3-سسس جۇمىسىنىڭ ءبىرىنشى كەزەڭى بيىل كۇزدە قولعا الىنادى. وسى جۇمىستار 2023 جىلى تولىق اياقتالادى دەپ جوسپارلانىپ وتىر.
سورعى-ءسۇزۋ ستانساسى قالانىڭ الداعى ۋاقىتتا قۇرىلىس جۇمىسى جۇرەتىن اۋداندارىن اۋىز سۋمەن قامتاماسىز ەتۋگە, سونداي-اق سۋمەن جابدىقتاۋدىڭ قازىرگى قۋاتىن ارتتىرۋعا مۇمكىندىك بەرەدى. جاڭا جوبانىڭ قۋاتتىلىعى – تاۋلىگىنە 105 مىڭ تەكشە مەتر. بۇل – قالانىڭ تىنىس-تىرشىلىگىن قامتاماسىز ەتۋ ءۇشىن وتە ماڭىزدى ستراتەگيالىق نىسان.
گازداندىرۋ ماسەلەسى دە جۇرگىزىلىپ جاتىر. بايقوڭىر اۋدانىن گازداندىرۋ جۇمىسى 2022 جانە 2023 جىلدارعا بولىنگەن. بيىل «ءوندىرىس» ەلدى مەكەنى, ال 2023 جىلى «كيرپيچنىي», «قازقالاشىق» ەلدى مەكەندەرىندە گاز تاراتۋ جەلىلەرىنىڭ قۇرىلىسى باستالادى.
سوڭعى ەكى جىل ىشىندە اۋدان اۋماعىنداعى ەلدى مەكەندەردە 160-تان استام كوشەگە اسفالت توسەلىپ, اۋلالار مەن قوعامدىق كەڭىستىكتەر اباتتاندىرىلدى. قازىر جارىقتاندىرۋ جۇمىستارى جۇرگىزىلىپ, جاڭا اۆتوبۋس مارشرۋتتارى ىسكە قوسىلدى. «ۇيدەگى دارىگەر» جانە ت. ب. بىرقاتار نىسان پايدالانۋعا بەرىلدى.
بايقوڭىر اۋدانىنداعى ۇلكەن جاڭالىقتىڭ ءبىرى – «ءوندىرىس» تۇرعىن الابىندا دەنە شىنىقتىرۋ-ساۋىقتىرۋ كەشەنى سالىندى. وندا قالا تۇرعىندارى سپورتپەن تەگىن اينالىسىپ, ءتۇرلى ۇيىرمەلەرگە قاتىسا الادى.
وسىنداعى دەنە شىنىقتىرۋ-ساۋىقتىرۋ كەشەنىندە №7 بالالار مەن جاسوسپىرىمدەر سپورت مەكتەبى ۇيىرمەلەر اشىپ, وتكەن ايدا بۇعان قابىلداۋدى باستادى. بۇل – سامبو (ۇلدار, قىزدار) 10-13 جاس; كيوكۋشينكاي كان كاراتە (ۇلدار, قىزدار) 12-13 جاس; گرەپپلينگ (ۇلدار, قىزدار) 14-15 جاس; كيكبوكسينگ (ۇلدار, قىزدار) 10-13 جاس; تاەكۆوندو (ۇلدار, قىزدار) 8-9 جاس; قازاق كۇرەسى (ۇلدار, قىزدار) 10-12 جاس; دجيۋ-دجيتسۋ (ۇلدار, قىزدار) 12-17 جاس.
ال «كيرپيچنىي» دارىگەرلىك امبۋلاتورياسى كۇردەلى جوندەۋدەن وتكىزىلىپ, پايدالانۋعا بەرىلدى. مەديتسينالىق مەكەمە «دوستىق» العاشقى مەديتسينالىق-سانيتارلىق كومەك كورسەتۋ ورتالىعىنىڭ فيليالى رەتىندە اشىلدى. ەمدەۋ ورتالىعى چەحوەۆ كوشەسى, 14ا مەكەنجايىندا ورنالاسقان.
جاڭارتىلعان امبۋلاتوريادا ەرەسەكتەر مەن بالالارعا العاشقى مەديتسينالىق-سانيتارلىق كومەك, ۋدز-دياگنوستيكا, كۇندىزگى ستاتسيونار, فيلتر-كابينەت, ەم-شارا كابينەتى جانە ۆاكتسيناتسيا كابينەتى سياقتى مەديتسينالىق قىزمەتتەر كورسەتىلەتىن بولادى.
تۇيىندەي ايتقاندا, اۋداندا ءار سالادا ءارتۇرلى جۇمىس ءجۇرىپ جاتىر. ءبىر اتاپ وتەرلىگى, بايقوڭىر – قالانىڭ ەڭ جاس اۋدانى. ونىڭ اشىلعانىنا جاقىندا ءتورت جىل عانا بولدى. بەسىنشى بەلەسىنە اۋدان زور جەتىستىكتەرمەن جەتەتىنىنە سەنىمدىمىز.
