جۋىردا «بالاپان» تەلەارناسى ەفيرىنەن اقىن بايانعالي ءالىمجانوۆ: «شەتەلدىك مۋلتفيلمدەرگە, فانتاستيكالىق كەيىپكەرلەرگە قىزىعىپ قاجەتى جوق. ونداي قاھارماندار قازاقتىڭ فولكلورىندا تولىپ جاتىر. سونى ۇلگى ەتۋ قاجەت» دەپ ەدى. كەشە مادەنيەت جانە سپورت مينيسترلىگى وكىلدەرى «ەتنواۋىل» ۇلتتىق-مادەني كەشەنىنە جۋرناليستەرگە ءباسپاسوز تۋرىن ۇيىمداستىردى.
سوندا ءجۇرىپ, بايانعالي ءالىمجانوۆ ايتقان كەيىپكەرمەن كەزدەستىك. وسىندا وتەتىن مادەني شارالاردىڭ نەگىزگىسى رەتىندە «الپامىس» تەاترالدى-تسيرك شوۋى 1 ماۋسىمنان باستاپ 3 اي بويى كورسەتىلەدى. 70 ءارتىس قاتىساتىن قويىلىمنىڭ دايىندىعىمەن تانىستىق.
الدىمەن الپامىس نايزا, قالقانىمەن ونەر كورسەتتى. قاسىندا قىر قىزدارى بيلەپ ءجۇر. «سۋعا سالسا باتپايتىن, وتقا سالسا جانبايتىن» اۋە گيمناستتارى اسپانداعى اۋانى اينالا سەكىرىپ, ونەر كورسەتتى. بۇل تاماشا شوۋدى مادەنيەت جانە سپورت مينيسترلىگى ارنايى وتكىزىپ وتىر. زالدا 1000-عا تارتا كورەرمەن كەرەمەت قويىلىمدى تاماشالاي الادى. بۇل جونىندە مينيسترلىكتىڭ ءباسپاسوز حاتشىسى ايدار قىرىقباەۆ: «شاراعا 7 مەملەكەت ءوز وكىلدەرىمەن, ونەرپازدارىمەن كەلەدى. شوۋدان بولەك, بۇل اۋىلدا ءۇش اي بويى اۋدارىسپاق, تەڭگە ءىلۋ سىندى ۇلتتىق ويىندار وينالادى. ات سپورتىنان جارىستار وتەدى. ءبىزدىڭ سپورتشىلار دا, ونەرپازدار دا ساقاداي-ساي» دەدى.
ءباسپاسوز تۋرى بارىسىندا 2500 شارشى مەترگە جايىلعان ايماقپەن, «شەبەرلەر اۋىلى» سەكتورى, «سپورتتىق-تسيركتىك شارالار» مەكەنى, «كونتسەرتتىك زال», «دەمالىس اللەياسى», «ءداستۇرلى قازاق جانە شىعىس تاعامدارى مەيرامحاناسى», «ۇلتتىق ءداستۇر-سالت» سەكتورى, «جىبەك جولى شىعىس بازارى», «اڭشىلىقتىڭ ءداستۇرلى تۇرلەرى» ورىندارىمەن تانىستىق. ءبارى دايىن, سوڭعى تەكسەرۋ جۇمىستارى ءجۇرىپ جاتىر.
وسى ءىستىڭ باسى-قاسىندا جۇرگەن «قازاق اۋەندەرى» اق ۆيتسە-پرەزيدەنتى ساكەن شاكەەۆ: «شوۋ رۋحاني جاڭعىرعانىمىزدى بايقاتادى. الپامىستى باستى كەيىپكەر رەتىندە تەگىننەن تەگىن العانىمىز جوق. ءبىزدىڭ بالالار بەتمەندى ەمەس, ءوزىنىڭ الپامىسىن ۇلگى تۇتۋى ءتيىس. قازاق تاريحىنىڭ ەڭ كونە جانە جۇمباق بەتتەرىنەن باستاۋ الاتىن باتىر تۋرالى عاجاپ اڭىز جەلىسى ەجەلگى بوزوق قالاسىنىڭ بويىندا وتەدى» دەپ اتاپ ءوتتى.
الپامىستىڭ رولىندە – دارحان كامبىشەۆ وينادى. شوۋدىڭ تىلسىم سازعا تۇنعان مۋزىكا اۆتورى – جانبولات ءادىلوۆ. ول – «ۇلىتاۋ» توبىنىڭ كوپتەگەن كومپوزيتسيالارىن جازعان ونەرپاز. ال رەجيسسەرى – سەرگەي كوزين.
ءبىر ەرەكشەلىگى, كورەرمەن ءۇشىن «تراپەتسيا مەكتەبى» جۇمىس ىستەيدى. مۇندا ءوزىن اۋەدە سىناپ كورگىسى كەلگەن ادام اشىق اسپان استىندا قالىقتاۋعا جانە اۋادا گيمناستيكالىق تريۋكتەر جاساۋعا مۇمكىندىك الادى.
«ەتنواۋىل» سونادايدان كورىنگەندە-اق, قازاق ەكەنىڭدى تانىتادى. رۋحتانىپ كەتەتىنىڭ انىق. ال الپامىس سول رۋحقا جىگەر ۇستەي تۇسەتىنى ءسوزسىز.
