«اراي» ەلوردالىق ساياباعىندا بالالاردى قورعاۋدىڭ حالىقارالىق كۇنىنە ارنالعان بالمۇزداق فەستيۆالى ءوتتى. استانا اكىمدىگى قولداۋ ءبىلدىرىپ, «KAZBRANDS» قوعامدىق قورى مەن «بايتاق بولاشاق» ەكولوگيالىق اليانسى بىرىگىپ ۇيىمداستىرعان شارا استانادا تۇڭعىش رەت ءوتىپ وتىر. وعان «گورمولزاۆود كوكشەتاۋ», «ەميل», «شين-لاين», «دەپ. قوستاناي», «ICEMASTER», سونداي-اق رەسەيلىك, پولشا, يتالياندىق ماركالى «COPAITALIA», «BOMBINO», «پريما موروجەنوە» بالمۇزداق وندىرۋشىلەرى قاتىستى.
فەستيۆال اياسىندا ەلوردا تۇرعىندارى مەن قوناقتارىنا «تاتتىقۇمارلار پاتشالىعى» مادەني-ساۋىقتىرۋ باعدارلاماسى ۇسىنىلدى. وندا بالالار انيماتورلاردىڭ, ارتىستەردىڭ ونەرىن تاماشالاپ, بالالار اتتراكتسيونداردا وينادى. بۇل عانا ەمەس, ەرەسەكتەرگە جانۇيالىق بي كەشى دە ۇيىمداستىرىلدى. فەستيۆالدىڭ تاعى ءبىر ەرەكشەلىگى, بۇل كۇنى ورەندەرگە بيە سۇتىنەن جاسالعان بالمۇزداق ۇسىنىلدى. تورەگەلدى شارمانوۆ اتىنداعى قازاق تاماقتانۋ اكادەمياسىنىڭ زەرتحاناسىندا جاسالعان بۇل بالمۇزداقتار بۇگىندە ۇلكەن سۇرانىسقا يە. «KAZBRANDS» قوعامدىق قورىنىڭ «بالمۇزداق-برەند-2017» اتالىمىن جەڭىپ العان ءوزىمىزدىڭ ونىمنەن ءدام تاتقان فەستيۆالدە بالالار ءۇيى مەن ينتەرناتتارىنىڭ, از قامتىلعان وتباسىلارىنىڭ بالالارىنا ەرەكشە كوڭىل ءبولىنىپ, ولارعا بالمۇزداقتار تەگىن تاراتىلىپ, سىيلىقتار بەرىلدى.
ۇيىمداستىرۋشىلاردىڭ ايتۋىنشا, باس قالادا جۇمىس ىستەيتىن بالمۇزداق ءوندىرۋشى كومپانيالاردىڭ بارلىعى فەستيۆالگە قاتىسۋعا نيەت ءبىلدىرىپتى. الايدا ولاردىڭ اراسىنان تەك 10 كومپانيا عانا تىركەلگەن. بۇل كۇنى بالمۇزداق ءوندىرۋشى كومپانيالار ەلوردالىق بالالار, جەتىمدەر, ينتەرنات ۇيلەرىنە 1 000 دانامەن ءوز ونىمدەرىن تاراتسا, بۇل الاڭدا ساعات تۇسكى 12-گە دەيىن تەگىن بالمۇزداقتار تاراتىلدى.
گۇلجان
راحمان
