جاستار سارايىندا استانا قالاسى تەحنيكالىق جانە كاسىپتىك ءبىلىم بەرۋ كوللەدجدەرى تۇلەكتەرىنە ارنالعان بوس ورىندار جارمەڭكەسى ءوتتى. قالالىق ءبىلىم باسقارماسى, جۇمىسپەن قامتۋ جانە الەۋمەتتىك باعدارلامالار باسقارماسى مەن استانا قالاسىنىڭ كاسىپكەرلەر پالاتاسى ۇيىمداستىرعان شاراعا ءوندىرىس كاسىپورىندارىنىڭ, قىزمەت كورسەتۋ ورتالىقتارىنىڭ 70-تەن اسا ءىرى كومپانيالارى قاتىستى.
«بۇل جارمەڭكە جاستاردى, اسىرەسە, ءبىتىرۋشى تۇلەكتەردى تابىس تابۋعا اپاراتىن جول بولادى دەپ ەسەپتەيمىن. نەگىزگى ماقساتىمىز – قالامىز بويىنشا ەڭبەك نارىعىنىڭ تالاپتارىن ەسكەرە وتىرىپ, تەحنيكالىق جانە كاسىپتىك ءبىلىم بەرۋ وقۋ ورىندارىنىڭ بيىلعى تۇلەكتەرىن جۇمىسقا ورنالاستىرۋعا, جۇمىس ورنىمەن قامتاماسىز ەتۋگە ىقپال ەتۋ» دەيدى كاسىپتىك ءبىلىم بەرۋ جانە كادرلار دايارلاۋ ءبولىمىنىڭ باسشىسى سالتانات باسىعاراەۆا.
جارمەڭكەگە قۇرىلىس جانە كوممۋنالدىق شارۋاشىلىق, ءوندىرىس, مونتاج, پايدالانۋ جانە جوندەۋ, بايلانىس, تەلەكوممۋنيكاتسيا جانە اقپاراتتىق تەحنولوگيالار, كولىك, قىزمەت كورسەتۋ, ءبىلىم بەرۋ, قۇقىق, مەديتسينالىق, ونەر جانە مادەنيەت, مەترولوگيا, ستاندارتتاۋ جانە سەرتيفيكاتتاۋ, ەنەرگەتيكا, مۇنايگاز جانە حيميالىق ءوندىرىس, اۋىلشارۋاشىلىق, اۋىل شارۋاشىلىعى, ۆەتەريناريا جانە ەكولوگيا ماماندىقتارى بويىنشا بارلىعى 6408 كوللەدج تۇلەكتەرى قاتىستى.
جۇمىس بەرۋشىلەر تەحنيكالىق جانە كاسىپتىك ءبىلىم بەرۋ ۇيىمدارى تۇلەكتەرىنىڭ قىزىعۋشىلىقتارىن, قابىلەتتەرىن ەسكەرە وتىرىپ, ماماندىعى بويىنشا جۇمىسقا ورنالاسۋ تۋرالى اڭگىمە جۇرگىزىپ, كەڭەستەر بەردى.
جۇمىسپەن قامتۋ جانە الەۋمەتتىك باعدارلامالار باسقارماسىنىڭ ماماندارى كوللەدج بىتىرۋشىلەرىن ارالاس ماماندىقتى قالاي الۋعا بولاتىنى جونىندە, «جۇمىسپەن قامتۋ جول كارتاسى – 2020» مەملەكەتتىك باعدارلاماسى بويىنشا سۇراقتارعا جاۋاپ بەرىپ, جۇمىسپەن قامتۋ ماقساتىندا مالىمەتتەر بازاسىنا ەنگىزدى.
گۇلجان
راحمان
