– بۇگىن ساياسيلانعان قوعامدا ءومىر ءسۇرىپ جاتىرمىز. حالىق ەلدە بولىپ جاتقان جاعدايلاردى نازاردان تىس قالدىرماي, بارلىق ساياسي ۇدەرىستەردى باقىلاۋدا ۇستاپ وتىر. تۇسىنبەيتىن ماسەلەلەر بولسا, ولاردىڭ جاۋابىن مەملەكەتتىك قىزمەتكەرلەردىڭ اۋزىنان ەستىسەك دەيدى. بۇل وتە دۇرىس تا, جاقسى. وسىنداي جاعدايدا شەنەۋنىكتەردىڭ اشىق بولعانى وتە قاجەت. ولار ادامدارمەن ديالوگ قۇرا ءبىلۋى ءتيىس.
قازاقستان پرەزيدەنتى قاسىم-جومارت توقاەۆ ءوزىنىڭ العاشقى جولداۋىندا بيلىك پەن قوعام اراسىندا تۇراقتى ديالوگ ورناتۋ ارقىلى عانا قازىرگى گەوساياسي احۋالعا بەيىمدەلگەن ۇيلەسىمدى مەملەكەت قالىپتاستىرۋعا بولاتىنىن اتاپ ءوتتى. ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋدى بارىمىزگە ورتاق مىندەت ەتىپ قويدى. ال ول ءۇشىن كابينەتتەردە تىعىلىپ وتىرماي, حالىق اراسىنا شىعىپ, ەلمەن اڭگىمەلەسىپ, قاجەتتى اقپاراتتى جەتكىزە ءبىلۋ كەرەك.
«جابىق كابينەتتەردىڭ» ۋاقىتى ءوتتى. قازىرگى زاماندا مەملەكەتتىك ورگاندار باسىمدىقتى اشىقتىق پەن حالىقتىڭ مۇڭ-مۇقتاجدىقتارىن شەشۋ ءۇشىن جەدەل ارەكەتكە بەرۋ كەرەك. بۇل تۇرعىدان مەملەكەت باسشىسى اشىقتىق ارقىلى جەرگىلىكتى بيلىك ورگاندارى جۇمىسىنىڭ تيىمدىلىگىن ارتتىرۋ تۋرالى وتە دۇرىس ايتتى.
ەلدەگى وزەكتى ماسەلەلەردى, ءار ادامنىڭ پروبلەمالارىن پرەزيدەنت قانا شەشپەيدى, ول ءۇشىن ەلىمىزدە ءارتۇرلى مينيسترلىكتەر, دەپارتامەنتتەر مەن ۆەدومستۆولار جۇمىس ىستەيدى. بىراق شەنەۋنىكتەر «قۇلاعىنىڭ بىتەلىپ قالعانى» سونشا, كەيدە قاراپايىم باسشىدان ءۇنىڭدى پرەزيدەنتكە جەتكىزۋ وڭايىراق سياقتى كورىنەدى.
بۇگىندەرى بەلگىلى ءبىر لاۋازىمدى قىزمەتتى اتقارۋ ازدىق ەتەدى. ءارتۇرلى جاعدايلار مەن وقيعالارعا پىكىرىڭدى باتىل ايتىپ, حالىقتىڭ پروبلەمالارىنان ىرگەنى اۋلاق سالماي, تۋىنداعان ماسەلەلەردى شەشۋگە تىرىسۋ كەرەك. ءار مەملەكەتتىك قىزمەتكەردىڭ باستى مىندەتى – وسى. ءار شەنەۋنىك حالقى مەن مەملەكەتىنىڭ گۇلدەنۋىنە قىزمەت ىستەپ وتىرعانىن ءتۇسىنۋى كەرەك.
