كەشە مەكتەپ تۇلەكتەرى مەن اتا-انالار ءۇشىن اسا ماڭىزدى ءبىلىم بايگەسى – ۇلتتىق بىرىڭعاي تەستىلەۋ باستالدى. ەلوردالىق 1244 تۇلەك تەست تاپسىردى. سوعان وراي, استانا قالاسى ءبىلىم باسقارماسىنىڭ باسشىسى ەلميرا سۋحانبەرديەۆا ءباسپاسوز ءماسليحاتىن وتكىزدى.
ۇلتتىق بىرىڭعاي تەستىلەۋ ءۇش جوعارعى وقۋ ورنىنىڭ عيماراتىندا وتەدى. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە – 1750, قازاق مەملەكەتتىك زاڭ ۋنيۆەرسيتەتىندە – 781, ال س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە – 1057 وقۋشى سىناق تاپسىردى.
ۇبت كەزىندە تۇلەكتەرگە قارا جانە كوك ءتۇستى قالام, قارىنداش جانە وشىرگىش قولدانۋعا رۇقسات ەتىلگەن. ال قويۋ گەلدى قالام پايدالانۋعا, ەمتيحان ماتەريالىن رۇقساتسىز اشۋعا جانە ايىرباستاۋعا, وقۋلىق, شپارگالكانى اۋديتورياعا الىپ كىرۋگە جانە ەلەكتروندى قۇرىلعىلاردى پايدالانۋعا تىيىم سالىنعان. ەرەجە بۇزىلعان جاعدايدا تۇلەكتى تەست تاپسىرۋدان شەكتەيدى.
سۇبەلى ءسوز
ەلميرا سۋحانبەرديەۆا, استانا قالاسى ءبىلىم باسقارماسىنىڭ باسشىسى:
– استانا بويىنشا 4042 وقۋشى مەكتەپ ءبىتىردى. ونىڭ ىشىندە 3588-ءى تەست تاپسىرادى. 358 وقۋشى – حالىقارالىق وليمپيادالار مەن عىلىمي جوبالار بايقاۋىنا قاتىسىپ, ءوز ءبىلىمىن دالەلدەگەندەر. ءتيىستى مەجە 50 بالل, ال جوعارى وقۋ ورىندارىنا تۇسەم دەۋشىلەر 70 بالل جيناۋى كەرەك. بالالاردىڭ كوڭىل-كۇيلەرى جاقسى. ءبىرىنشى كۇنى ەشقانداي قۇقىق بۇزۋشىلىقتار تىركەلگەن جوق.
ەلميرا سۋحانبەرديەۆانىڭ ايتۋىنشا, مەكتەپ بىتىرۋشىلەردى ۇلتتىق بىرىڭعاي تەستىلەۋگە ازىرلەۋ بارىسىنا پسيحولوگتار دا اتسالىسقان. پسيحولوگيالىق بەيىمدەۋ ماقساتىندا سىناق تۇرىندە تەستىلەۋ وتكەن. وعان قوسا, وسىعان دەيىن تەست سۇراقتارىنا قاتىستى سىن-ەسكەرتپەلەر بيىل ەسكەرىلگەن. ايتۋلى ءبىلىم بايگەسىنىڭ وتكىزىلۋ بارىسىن اتا-انالارى مەن ۇستازدارى عيمارات سىرتىنا ورناتىلعان تەلەەكران ارقىلى قاداعالاي الادى.
ەركەجان ساتىمبەك
