مەملەكەت باسشىسى ەلەكتروندىق-وپتيكالىق قۇرىلعىلار شىعاراتىن «قازاقستان اسەلسان ينجينيرينگ» قازاق-تۇرىك بىرلەسكەن كاسىپورنى قىزمەتىمەن دە تانىستى. كەلەشەكتە زاۋىت كۇندىز جانە تۇندە كورۋگە ارنالعان اسكەري وپتيكالىق قۇرىلعىلار جاساپ شىعارادى.
جوبانىڭ قۇنى – 4,5 ملرد تەڭگە. 2014-2015 جىلدارى لينزالار ءوندىرىسى بويىنشا مونتاجداۋ جۇمىستارى جۇرگىزىلمەك. كەلەسى جىلى تولىق وندىرىستىك قۋاتقا كوشكەن كەزدە زاۋىت ءجۇز ادامدى جۇمىسپەن قامتيدى. ال, بولاشاقتا ازاماتتىق جانە اسكەري سالادا قولدانىلاتىن ەلەكتروندىق پلاتتار شىعارۋ اۋقىمىن ارتتىرماقشى.
مەملەكەت باسشىسى قازاقستاندا مۇنداي جوعارى تەحنولوگيالىق ءوندىرىس قۇرۋدىڭ ماڭىزدىلىعىن ەرەكشە اتاپ ءوتتى. كاسىپورىندى ارالاۋ بارىسىندا استانا قالاسىنىڭ اكىمى يمانعالي تاسماعامبەتوۆ «استانا – جاڭا قالا» يندۋستريالىق پاركى – ارناۋلى ەكونوميكالىق ايماعى جۇمىسىنىڭ ناتيجەلەرى تۋرالى باياندادى. ەلوردا باسشىسىنىڭ ايتۋىنشا, ارناۋلى ەكونوميكالىق ايماقتا ينۆەستيتسيالىق قۇنى 181 ملرد تەڭگەنى قۇرايتىن 49 جوبا تىركەلگەن. سونىڭ ون ءبىرى جۇمىسىن تابىستى جالعاستىرىپ كەلەدى. «جالپى العاندا, پارك اۋماعىنداعى كاسىپورىندار 2010-2013 جىلدار ارالىعىندا 182 ملرد تەڭگەنىڭ ءونىمىن ءوندىردى. بۇل – جالپى قالالىق ءوندىرىس كولەمنىڭ 36 پايىزى. ەگەر 2010 جىلى قالانىڭ ءوندىرىس ءونىمى 111 ملرد تەڭگەنى قۇراسا, يندۋستريالدى پارك نىساندارى پايدا بولعالى بەرى بۇل كورسەتكىش ەكى ەسەگە ءوستى. ال, ولاردان تۇسەتىن سالىق ءتۇسىمى 18 ملرد تەڭگەنى قۇراپ وتىر» دەيدى ي. تاسماعامبەتوۆ.
گۇلميرا ايماعانبەت
