بىرلىگى بەكەم ەلدىڭ ىرىسى مول
ەلباسى نۇرسۇلتان نازارباەۆتىڭ جىل سايىن حالىققا ارنايتىن جولداۋلارىنىڭ قايسىسىن الىپ قاراساڭىز دا, الەۋمەتتىك ماڭىزدىلىعى مەن بەلگىلى مەرزىمدە ناقتى مىندەتتەر مەن ماسەلەلەردىڭ شەشىلۋىن قامتاماسىز ەتۋگە باعىتتالعانىن بايقايمىز. باس قۇجاتتىڭ بيىلعىسىنان دا وسى تۇرعىدان سيپاتتى كورىپ وتىرمىز: الەمدە ورىن العان ساياسي شيەلىنىستەرمەن قاتار كەلگەن جاھاندىق قارجى داعدارىسىنىڭ قارساڭىندا ىلگەرىلەۋدىڭ جوسپارى باياندالعان.
ءيا, جولداۋ جولدارىنان كوپ نارسەنى ۇقتىق, باعدارىمىزدىڭ ايقىندىعىنا كوزىمىز جەتە ءتۇستى, كەلەشەگىمىزدىڭ كەمەل بولاتىنىن بىلدىك. ەندىگى كەزەكتە, حالىق بولىپ جۇمىلىپ, جولداۋدى ىسكە اسىرىپ, قولداۋىمىز كەرەك.
«نۇرلى جول – بولاشاققا باستار جول» اتتى باس قۇجاتتىڭ باستى ەرەكشەلىگى جاھاندىق كونيۋكتۋرالار وزگەرىسكە ۇشىراپ, قارجىلىق داعدارىس قاۋپى تۋىنداعان تۇستا الەۋمەتتىك سالانى ۇلتتىق قور ارقىلى قۋاتتاندىرىپ, «قازاقستان – 2050» ستراتەگياسىن ودان ءارى قالىپتاستىرۋ بولىپ قالا بەرمەك.
مەملەكەت باسشىسى وسى جولداۋدا بارلىق قازاقستاندىقتار اراسىنداعى سەنىمدى نىعايتىپ, تولىسقاندىقتىڭ جاھاندىق سىنىنان ءوتۋ ءۇشىن جۇدىرىق بولىپ بىرىگۋدى, ءوزارا بىرلىكتى نىعايتۋدى ەرەكشە اتاپ ءوتتى.
ۇلت كوشباسشىسى ءوز سوزىندە: «تۇراقتىلىق پەن كەلىسىم دەگەنىمىز نە؟ ول وتباسىلىق ءال-اۋقات, قاۋىپسىزدىك, باسپانا. بەيبىتشىلىك – ول اكە مەن انا قۋانىشى, اتا-انالار دەنساۋلىعى جانە ءبىزدىڭ بالالارىمىزدىڭ باقىتى. بەيبىتشىلىك – ول تۇراقتى جۇمىس, جالاقى جانە ەرتەڭگى كۇنگە دەگەن سەنىم. بەيبىتشىلىك پەن تۇراقتىلىق – كۇن سايىنعى ەڭبەكپەن قورعاپ, نىعايتۋدى قاجەت ەتەتىن جالپىحالىقتىق جەتىستىك» دەدى.
شىن مانىندە ەل تاۋەلسىزدىگىنىڭ ارقاسىندا, ەلدەگى سان ۇلت پەن ۇلىستىڭ ءوزارا بىرلىگىنىڭ ارقاسىندا اتا-بابامىز اڭساپ كەتكەن ماڭگىلىك مۇراتتارعا قول جەتكىزدىك, ەۋرازيا كىندىگى, ەلىمىزدىڭ جۇرەگى بولعان, اسەم شاھار – استانانى تۇرعىزدىق.
وزدەرىڭىز بىلەسىزدەر, قۇراننىڭ «يبراحيم» سۇرەسىنىڭ 7-ءشى اياتىندا اللا تاعالا: «مەنىڭ بەرگەن نىعمەتتەرىمە شۇكىرلىك ەتسەڭدەر, البەتتە ولاردى ارتتىرا تۇسەمىن» دەپ ەسكەرتەدى.
حالقىمىز قانشاما اۋمالى-توكپەلى زامانداردى دا, نەشە ءتۇرلى ناۋبەتتەرگە دۋشار ەتكەن بوداندىقتى دا باستان وتكەردى. اللا تاعالاعا شۇكىر, ايتەۋىر «مىڭ ءولىپ, مىڭ تىرىلگەن» ۇلتىمىز تاۋەلسىزدىككە قولى جەتىپ, اتا-بابا دىنىمەن دە قايتا قاۋىشتى.
اللاعا سانسىز ماداقتار بولسىن, ەلىمىزدە مەشىت-مەدرەسەلەر سانى جىل سايىن كوبەيىپ كەلەدى. قازىرگى تاڭدا استانا قالاسىنىڭ وزىندە 8 مەشىت, 1 مەدرەسە قىزمەت جاساۋدا. مەشىتتەرىمىز جاماعاتقا تولى. «استانا» مەدرەسەسىندە قازىرگى تاڭدا جالپى سانى 120 شاكىرت ءبىلىم الىپ جاتىر.
سونداي-اق بيىلعى وقۋ جىلىندا ءورىستىلدى يمامداردى دايىندايتىن ارنايى ورىس توبى اشىلدى. اتالعان توپتا كەلەشەكتە حالىققا ناسيحات جۇرگىزىپ, اسىل ءدىنىمىزدىڭ قۇندىلىقتارىن ورىس تىلىندە جەتكىزەتىن بولاشاق 14 تەولوگ-ماماندار, يمامدار دايارلانۋدا.
«ماڭگىلىك ەل» يدەياسىن قالىپتاستىرۋدا, ءححى عاسىرداعى ءتۇرلى كەدەرگىلەردى ەڭسەرىپ, باسەكەگە قابىلەتتى الەمدەگى 30 ەلدىڭ قاتارىنان ورىن الۋ جولىندا اتا-بابامىزدان ميراس بولىپ كەلە جاتقان ءداستۇرلى ءدىنىمىزدىڭ ورنى وتە زور.
سەبەبى, «قازاقستان-2050» سترەتەگياسىندا ەلباسىمىز: «ءبىز – مۇسىلمانبىز, ونىڭ ىشىندە – ءابۋ حانيفا مازھابىن ۇستاناتىن سۇننيتتەرمىز» دەپ, ۇلتتىق قۇندىلىقتارعا نەگىزدەلگەن حانافي ءمازحابىنىڭ ماڭىزدىلىعىنا ەرەكشە توقتالعان ەدى.
بيىل استانا قالاسىندا اسىل ءدىنىمىزدى داستۇرىمىزبەن ناقىشتايتىن ءبىر قاتار اۋقىمدى ءىس-شارالار ۇيىمداستىرىلدى.
ەلباسىمىز: «جالپىۇلتتىق يدەيانى ومىرشەڭ ەتەتىن – ەلدىڭ بىرلىگى. اۋىزبىرشىلىك قاشقان, الاۋىزدىق تاسقان جەردە ەشقاشان دا جالپىۇلتتىق يدەيالار جۇزەگە اسقان ەمەس. قازاقستاننىڭ شىققان شىڭى مەن باعىندىرعان بيىكتەرىنىڭ ەڭ باستى سەبەبى – بىرلىك, بەرەكەسى» دەپ, بارشا قازاقستاندىقتاردى ءوزارا بىرلىك پەن تاتۋلىقتى تۋ ەتىپ, بيىك ماقساتتاردى ەڭسەرۋگە ۇندەدى.
قازاقتا «ەلدىڭ قامىن ەر ويلار, ەردىڭ قامىن ەل ويلار» دەگەن اتالى ءسوز بار. اسىل ءدىنىمىزدىڭ شاريعات شارتتارىنىڭ ءبىرى دە – باسشىعا مويىنسۇنۋ, باعىنۋ بولىپ تابىلادى. ولاي بولسا, بىرلىگى جاراسقان ەلىمىزدىڭ ابىرويىن ودان سايىن اسقاقتاتا تۇسەتىن ەلباسى جولداۋىنا, قازاقستان مۇسىلماندارى ءدىني باسقارماسىنىڭ 2020-شى جىلعا دەيىنگى تۇجىرىمداماسىنا قولداۋ كورسەتىپ, جۇمىلا ىسكە اسىرۋىمىز قاجەت.
لايىم, اللا تاعالا تاۋەلسىز ەلىمىزدىڭ كوگىندە جەلبىرەگەن كوك بايراعىن باياندى ەتىپ, نۇرلى بولاشاققا باستار تۋرا جولدان اداستىرماسىن!
ناۋرىزباي قاجى وتپەنوۆ,
قازاقستان مۇسىلماندارى ءدىني باسقارماسىنىڭ نايب ءمۇفتيى,
«نۇر استانا» ورتالىق
مەشىتىنىڭ باس يمامى