ەلوردا اكىمىنىڭ ورىنباسارى باقتيار ماكەن قالاداعى ءىرى ساۋدا ورتالىقتارى مەن بازار باسشىلارىمەن كەزدەسۋ وتكىزدى. وعان ەلوردادا ىندەت جۇقتىرۋ جايتتارىنىڭ جيىلەگەنى سەبەپ بولدى ءارى بۇل شوب وكىلدەرى مەن ازاماتتاردىڭ كارانتين ءتارتىبىن ورەسكەل بۇزۋىمەن بايلانىستى.
نەگىزگى قاۋىپسىزدىك ەرەجەلەرىن ەلەمەۋ COVID-19-دىڭ ەكىنشى تولقىنىنا اكەلۋى مۇمكىن. شوب وكىلدەرى مەن قالا تۇرعىندارى سانيتارلىق نورمالاردىڭ ساقتالۋىنا ۇلكەن جاۋاپكەرشىلىكپەن قاراۋى كەرەك.
«ءار ايماق ءوز دەڭگەيىندە شەشىم قابىلدايدى. ءبىز سونداي-اق بيزنەستىڭ جۇمىس ىستەگەنىن قالايمىز. ول – حالىقتىڭ ەڭبەكپەن قامتىلۋى, تابىس جانە ەكونوميكانىڭ وركەندەۋى. بىراق كاسىپكەرلەر ءوز تاراپىنان تالاپتاردى ورىنداۋى كەرەك. كەيبىر ساۋدا ورتالىقتارى بەتتۇمشا تاعۋ ءتارتىبىن ساقتامايدى جانە تەمپەراتۋرانى تەكسەرمەيدى. قابىلدانىپ جاتقان شارالارعا تۇسىنىستىك تانىتۋدى سۇرايمىز. ءبىزدىڭ ورتاق مىندەتىمىز ەڭ الدىمەن, اۋرۋدىڭ قايتا ءورشۋىن الدىن الۋ» دەدى نۇر-سۇلتان قالاسى اكىمىنىڭ ورىنباسارى باقتيار ماكەن.
«پروفيلاكتيكالىق جۇمىستارعا قاراماستان, كاسىپكەرلىك سۋبەكتىلەرى كارانتين ءتارتىبىن ءجيى بۇزادى. سونىڭ سالدارىنان قالادا اۋرۋ سانى ارتىپ كەلەدى. وعان قوسا مەكتەپ جاسىنداعى جانە ءبىر جاسقا دەيىنگى بالالار اراسىندا دا ناۋقاسقا شالدىعۋ فاكتىلەرى تىركەلۋدە» دەدى باس سانيتارلىق دارىگەر جاننا پىراليەۆا.
جيىن سوڭىندا ساۋدا ورتالىقتارىنىڭ دەمالىس كۇندەرىندەگى جۇمىسىن قايتا قالپىنا كەلتىرۋ قالاداعى ەپيدەميولوگيالىق جاعدايعا جانە شوب-تىڭ سانيتارلىق نورمالاردى ساقتاۋىنا بايلانىستى بولاتىنى ايتىلدى. ءاربىر ازاماتتىڭ جاۋاپكەرشىلىگى ەپيدەميولوگيالىق جاعدايعا اسەر ەتەدى. باقتيار ماكەن ەلوردالىقتاردى كارانتين شارالارىن قاتاڭ ساقتاۋعا شاقىردى.
