قر باس پروكۋراتۋراسىندا «كاسىپكەرلىك سالاسىنداعى پروكۋراتۋرا قاداعالاۋى» بيزنەستى قورعاۋ جونىندەگى ىىى فورۋم ءوتتى. فورۋمدى قازاقستان رەسپۋبليكاسىنىڭ باس پروكۋرورى قايرات قوجامجاروۆ جۇرگىزدى.
كەيىنگى كەزدە قۇقىق قورعاۋ قىزمەتكەرلەرى ءبىر كوزدەن ساتىپ الۋدا جوعارى ۇلەستى قارپىپ قالعىسى كەلەتىن تاپسىرىس بەرۋشىلەردى قاتاڭ قاداعالاۋعا الا باستادى. دەگەنمەن بيىلعى تەكسەرىس كورسەتىپ وتىرعانداي, ءالى دە تاۋارلار مەن قىزمەتتىڭ 80 پايىزى ءبىر كوزدەن ساتىپ الىناتىندىعى دالەلدەنىپ وتىر. وعان سەبەپ – كەلىپ تۇسكەن تاپسىرىستار ەسكەرىلمەي, بەلگىلەنگەن كونكۋرستاردىڭ نەگىزسىز وتكىزىلمەيتىندىگى. مۇنداي جاعداي ادەيى ەكى-ءۇش قايتالانعاننان كەيىن, ساتىپ الۋ ەشقانداي بالاماسىز جۇزەگە اسىرىلادى. ءسويتىپ, بەلگىلى ءبىر ادامدارمەن كوتەرىڭكى باعاعا كەلىسىمشارت جاسالاتىنى تۋرالى قازاقستان رەسپۋبليكاسى باس پروكۋرورىنىڭ ورىنباسارى مارات احمەتجانوۆ باياندادى.
«اتالعان ماسەلەنى باس پروكۋراتۋرا ۇكىمەتتىڭ الدىنا قويىپ وتىر. بۇدان بىلاي ءبىر كوزدەن مەملەكەتتىك ساتىپ الۋدىڭ جوعارى ۇلەسىن يەمدەنگىسى كەلەتىندەر قۇقىق قورعاۋ ورگاندارىنىڭ قاتاڭ باقىلاۋىندا بولادى» دەدى ول. سونداي-اق مەملەكەتتىك ساتىپ الۋ سالاسىندا 800-دەن اسا زاڭ بۇزۋشىلىق انىقتالىپ, 600-دەن اسا جاۋاپتى ادام ءتۇرلى دەڭگەيدە جازاعا تارتىلىپتى.
كەيىنگى كەزدە بۋحگالتەرلىك قۇجاتتارمەن جۇمىس ىستەۋدى وڭتايلاندىرۋ, اتاپ ايتقاندا, كاسىپكەرلەرگە ونىڭ كوشىرمەسىمەن دە قىزمەتتى جالعاستىرۋعا بولاتىن مۇمكىندىكتەر بەرۋ جايلارى دا قاراستىرىلۋدا. مىنە, وسىنداي قولعا الىنعان وڭ وزگەرىستەر بيزنەستىڭ ىشكى مۇمكىندىكتەرىن كەڭەيتىپ, اكىمشىلىك كەدەرگىلەر مەن نەگىزسىز تەكسەرۋلەردى جويادى ءارى ەلىمىزدەگى كاسىپكەرلىكتىڭ كەڭىنەن ورىستەۋىنە جول اشادى دەگەن سەنىم مول.
قازاقستان رەسپۋبليكاسىنىڭ باس پروكۋرورى قايرات قوجامجاروۆ كوتەرىلىپ وتىرعان ماسەلەگە بايلانىستى وتكىزىلگەن تالقىلاۋدى قورىتىندىلاي وتىرىپ, بيزنەس سالاسىندا ءالى دە شەشىمىن تاپپاعان بىرقاتار جايتتاردىڭ بار ەكەنىنە قاتىسۋشىلاردىڭ نازارلارىن اۋداردى, ولاردى جويۋ ءۇشىن بىرلەسىپ, ناقتى جۇمىس ىستەۋ قاجەت ەكەنىن ايتتى. سونداي-اق قىلمىستىق جازالاردىڭ مەرزىمى ازايتىلىپ, ولاردىڭ بالاما تۇرلەرى ەنگىزىلگەنىن, بيزنەس سۋبەكتىلەرىن سوتقا دەيىن قاماۋعا الۋعا تىيىم سالۋ بەلگىلەنىپ, زالالدى وتەگەن كەزدە ولاردى قىلمىستىق جاۋاپكەرشىلىكتەن بوساتۋ قاراستىرىلعانىن دا جەتكىزدى.
