جۋىردا «Elorda Aqparat» مەدياكومپانياسى قالالىق ءبىلىم باسقارماسىمەن بىرلەسىپ ىسكە اسىرعان «مەكتەپ جانە مەدياساۋاتتىلىق» اتتى جوبا اياسىندا احمەت بايتۇرسىنۇلى اتىنداعى №48 مەكتەپ-ليتسەيدىڭ مۇعالىمدەرىمەن جانە وقۋشىلارىمەن جۇزدەستىك.
سالتاناتتى زالداعى جيىنعا دەيىن مەكتەپتەگى ۇلت ۇستازى احمەت بايتۇرسىنۇلىنىڭ مۋزەيىن ارالادىق. مۋزەيدە احاڭنىڭ ءومىربايانى, ۇلتتىڭ بۇگىنى مەن كەلەشەگىنە ارناپ ءوزىنىڭ جازعان شىعارمالارى, ا.بايتۇرسىنۇلى تۋرالى الاشتانۋشى عالىمداردىڭ, زەرتتەۋشىلەردىڭ شىعارعان تۋىندىلارى, مۋزەيگە سىيلىققا جينالعان قۇندى ەكسپوناتتار بار. الايدا احاڭ تۋرالى وقۋشىلارعا اتاۋلى كۇندەردە عانا مالىمەت بەرىلىپ, ارنايى كۋرس يا بولماسا ءپان رەتىندە وقىتىلمايتىنىن تاريحشى مۇعالىمنىڭ اۋزىنان ەستىدىك. الاش قايراتكەرلەرىنىڭ ءومىرى مەن قىزمەتى, ۇلتقا تيگىزگەن پايداسى تۋرالى عالىمدار, مۇراسىن زەرتتەۋشىلەر كەم دەگەندە ايىنا 1-2 رەت ءدارىس وقىسا, الاشتىڭ يدەياسى مەن ۇستانىمىن ءبىلىپ, وسكەن ۇرپاعىمىز وياۋ, ءبىلىمدى, سانالى بولار ەدى دەگەن ويمەن اكت زالىنا بەتتەدىك.
ءبىزدىڭ توپتى «Elorda Aqparat» مەدياحولدينگى ديرەكتورىنىڭ ورىنباسارى راۋان ءسابيتۇلى باستاپ باردى. «Astana aqshamy» گازەتىنىڭ 3 بىردەي قىزمەتكەرى – گازەت قاتەگەرى شىنار جاقىپوۆا, ءفوتوتىلشىمىز سۇلتانباي سەيىت جانە وسى جولداردىڭ اۆتورى جارقىن جۇزدەسۋدىڭ كۋاسى بولدىق. اكت زالىنداعى كەزدەسۋدە راۋان ءسابيتۇلى وقۋشىلارعا اقپارات دەگەن نە, ونى قالاي ىزدەۋ كەرەك, ءار ادامنىڭ مەدياساۋاتتىلىققا دۇرىس نازار اۋدارۋى, الەۋمەتتىك جەلىلەردەن اقپارات الىپ, ونى پايدالانۋ سياقتى بالالارعا قىزىقتى سۇراقتارعا تۇشىمدى جاۋاپ بەردى. ءبىر تاڭعالعانىمىز, اۋەلدە اڭگىمەگە ارالاسپاي وتىرعان بالالار ءبىزدىڭ جاڭا مەديا, الەۋمەتتىك جەلىلەردەگى الۋان ءتۇرلى اقپارات, جۋرناليست ماماندىعىنىڭ قىر-سىرى, گازەتتىڭ وقىرمانعا كورىنبەيتىن «كۋحنياسى», قاعاز گازەتتەردىڭ سانى, ماماندىق تاڭداۋدا قاتەلەسپەۋ دەگەن جاۋاپتارىمىزدان كەيىن سۇراقتارىن قارشا بوراتتى.
اسىرەسە ءاليحاننىڭ «جۋرناليست قاۋىپتى ماماندىققا جاتا ما؟ سىزدەرگە ماماندىققا قاتىستى قاۋىپ تونگەن كەزدەر بولدى ما؟» دەگەن ساۋالى, جىگەردىڭ «جۋرناليست بولۋدى قالاي ارمانداۋ كەرەك؟ ءتىلشى بولۋعا جاستايىڭنان قالاي دايىندالۋعا بولادى؟ بولاشاق تىلشىگە قاجەتتى ءۇش كىتاپتى اتاپ بەرىڭىزشى…» دەگەن ساۋالى ءوز قۇربى-قۇرداستارىنىڭ دا, ءبىزدىڭ دە كوڭىلىمىزدەن شىقتى. ايدانا ەسىمدى وقۋشىنىڭ «جۋرناليست پەن بلوگەردىڭ قايسىسى بەدەلدى, قايسىسى مىقتى؟ ساۋاتتى اقپاراتتى كىم ءبىرىنشى تاراتادى؟» دەگەن سۇراعىنا دا ريزاشىلىق ءبىلدىرىپ, ماماندىق تاڭداۋدا قاتەلەسپەۋدىڭ جولدارىن ايتتىق. ەڭ ۇزدىك سۇراق قويعان بولاشاق تىلشىلەرگە «الاساپىران امەريكا» اتتى كىتابىمدى قولتاڭبامەن سىيعا تارتتىم. كەزدەسۋدىڭ باسىندا ءبىر بالا عانا جۋرناليستيكا ماماندىعىنا تاڭداۋ جاسايمىن دەپ وتىر ەدى, سوڭىنان 10-عا جۋىق بالا ءبىزدىڭ كاسىبىمىزگە قىزىعۋشىلىق تانىتىپ, ويىن وزگەرتتى. ءبىر بايقاعانىم, جوعارى سىنىپ وقۋشىلارىنىڭ ءوزى ماماندىق تاڭداۋدى 11-سىنىپقا قالدىراتىنى قىنجىلتتى.
سونداي-اق شاكارىم قۇدايبەردىۇلى اتىنداعى №56 مەكتەپ-ليتسەيدە دە ماعىنالى كەزدەسۋ ءوتتى. وندا «استانا اقشامى» گازەتى باس رەداكتورىنىڭ ورىنباسارى عالىم قوجابەكوۆ, جۋرناليستەر گۇلبارشىن وكەشقىزى مەن قاتەگەر ءامىر دوسحوجين كەزدەسۋگە جينالعان مۇعالىمدەر مەن جوعارى سىنىپ وقۋشىلارىنا قوعامداعى ءباسپاسوزدىڭ ماڭىزى, مەدياساۋاتتىلىق جونىندە اڭگىمەلەپ بەردى. شىعارماشىلىق قابىلەتى بار وقۋشىلارعا قولداۋ بىلدىرەتىنىن جەتكىزدى. مەكتەپ ديرەكتورى رومان فازىلۇلى جۋرناليستەرگە مەكتەپتىڭ تىنىس-تىرشىلىگىن تانىستىرىپ, شىعارماشىلىق بايلانىس ورناتۋعا ىقىلاستى ەكەنىن ءبىلدىردى.
