وتكەن جىلى استانا قالاسىندا جانتۇرشىگەرلىك وقيعا تىركەلدى. 24 جاستاعى بويجەتكەن ءوزىنىڭ ستۋدەنت قۇربىسىن اياۋسىز پىشاقتاپ, دەنەسىن كىلەمگە وراپ, جوعارى قاباتقا سۇيرەي وتىرىپ, سامالدىققا شىعارىپ تاستاعانى كوپشىلىكتىڭ ءالى كۇنگە دەيىن ەسىندە. وقيعا قالاي بولدى؟ تەرگەۋ جۇمىستارى قانشا ۋاقىتقا سوزىلدى؟ سوت قىلمىسكەرگە قانداي ۇكىم شىعاردى؟ استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ كومەگىمەن وسى وقيعانىڭ جاي-جاپسارىن بايانداماقپىز. بەلگىلى سەبەپتەرگە بايلانىستى ادام اتتارى وزگەرتىلىپ بەرىلدى.
قىزعانىش دەگەن قىزىل يت…
دينارا قالاداعى بەدەلدى جوعارى وقۋ ورنىنىڭ ستۋدەنتى ەدى. ساباعىن وتە جاقسى وقىدى. وقۋ ورداسىنىڭ باسشىلىعى قوعامدىق جۇمىستارعا بەلسەندى قاتىسقانىن ايتسا, قۇربىلارى اينالاسىنداعى جاندارعا ۇنەمى قامقورلىق تانىتاتىنىن العا تارتادى. الايدا مارقۇم وسى مىنەزىنىڭ وزىنە زيان تيەتىنىن بىلمەدى. بىراق بۇل ومىردە قاسىندا جۇرگەن جاننىڭ قاتىگەز بولاتىنىن, ءتىپتى, قىزعانىشتان ولتىرە سالاتىنىن ءبىلىپ كەتتى…
پۋشكين كوشەسىندە ورنالاسقان دينارانىڭ ۇيىندە ءتورت قىز بىرگە تۇردى. ارينە, قالادا پاتەرى جوق قۇربىلارى اي سايىن پاتەراقىسىن بەرىپ تۇرۋعا كەلىسەدى.
قاندى وقيعا بولعان كۇنى ۇيدە دينارا مەن قاليما عانا بولعان. اس ۇيدە وتىرعان ەكەۋى كەنەت سوزگە كەلىپ, ءبىر-بىرىنە رەنجىسىپ قالادى. وسى كەزدە قاليمانىڭ باسىنا قايداعى ءبىر وي كەلەدى. باس ارازدىعى ءۇشىن پاتەر يەسىن ءولتىرۋدى ويلايدى. ونىڭ كويلەگى كوك, تاماعى توق ەكەنىن كورە المايتىن. ءسويتىپ, قولىنداعى شىنى ىدىسپەن دينارانىڭ ماڭداي تۇسىنان ءبىر ۇرادى. قۇربىسىنان مۇنى كۇتپەگەن ول سورعالاپ اققان قاندى ءسۇرتۋ ءۇشىن تارتپانى اشىپ, مايلىق الماقشى بولىپ ەڭكەيە بەرگەندە, تەمىر بالعانىڭ ۇشكىر قىرى باسىنا كەپ تيەدى. ءيا, قاليمانىڭ ەكى كوزى قانتالاپ كەتكەن. قورقىنىشتى. ومىرىنە قاۋىپ تونگەنىن سەزگەن دينارا قوناق بولمەگە قاراي قاشادى. سول كەزدە قاليما قولىنا پىشاق الىپ, سوڭىنان قۋادى. تەك تىرىدەي قيناپ, ءولتىرۋدى ويلايدى. اقىرى, قولىنداعى پىشاقپەن دەنەسىنەن ءبىر ەمەس, 27 رەت سوققى جاسايدى. ىشكى ورگاندارى تۇگەل زاقىمدانعان دينارا وقيعا ورنىندا كوز جۇمدى.
تەرگەۋ قالاي جۇرگىزىلدى؟
تەرگەۋ بارىسىندا قىلمىسىن جاسىرۋ ءۇشىن قاليمانىڭ ارتىنشا پاتەردى جۋىپ-تازالاعانى بەلگىلى بولدى. قارا ءتۇستى پىشاقتى, قىزىل قانعا بويالعان كورپە-توسەكتى, باسقا دا زاتتاردى كوشەدەگى قوقىس جاشىكتەرىنە اپارىپ تاستاعان. ال جابىرلەنۋشىنىڭ ءمايىتىن كىلەمگە وراپ, سول ءۇيدىڭ 15-قاباتىنداعى دالىزدەن باسپالداققا قاراي وتەتىن بالكونعا ءسۇيرەپ اپارىپ, جاسىرىپ قويعان. پاتەرگە قايتا ورالعان قىلمىسكەر قازا بولعان دينارانىڭ قۇنى 45 000 تەڭگە تۇراتىن پالتوسىن, 25 000 تەڭگە تۇراتىن ەتىگىن, 180 000 تەڭگە تۇراتىن «ايفون 5س» ماركالى ۇيالى تەلەفونىن جانە 600 000 تەڭگە اقشاسىن جىمقىرىپ, وقيعا بولعان جەردەن بوي تاسالاپ كەتكەن.
ال كەلەسى كۇنى جۇمىستان قايتقان ەكى قۇربىسى ۇيگە كەلگەندە قاليمانىڭ دا, دينارانىڭ دا جوق ەكەندىگىن كورەدى. ولار قوناق بولمەدەگى توسەۋلى تۇرعان كىلەمنىڭ جوعالىپ كەتكەندىگىن, سونىمەن قاتار اس ءۇي بولمەسىنەن شىنى سىنىقتارىن بايقايدى.
جەدەل جۇرگىزىلگەن تەرگەۋ كەزىندە قاليما قۇرىقتالادى. ونىڭ ۇيگە كىرىپ-شىققان ۋاقىتى, ءبارى بەينەباقىلاۋعا جازىلىپ قالعان. ايعاق زاتتار دا جەتكىلىكتى. ءتىپتى, جاۋاپ الۋ كەزىندە مارقۇم دينارانىڭ پالتوسىن كيىپ العانىن كورگەن قۇربىلارى جاعاسىن ۇستادى. ال سوت ساراپتاماسى مارقۇمدى تىرىدەي قيناپ, ازاپتاعانىن دالەلدەدى. اقىرى قىلمىسىن مويىنداپ, پوليتسيا قىزمەتكەرلەرىنە بار شىندىقتى بايانداپ بەرۋگە تۋرا كەلدى.
«جاپ-جاس قىزدىڭ ويىنا مۇنشاما قاتىگەزدىك قايدان كەلگەن؟ جۇيكە اۋرۋىمەن اۋىرماعان با؟» دەگەن ساۋالدىڭ جاۋابىن ساراپشى ماماندار تەكسەردى. پسيحولوگ ماماننىڭ قاتىسۋىمەن وتكىزىلگەن سوت-پسيحياتريالىق ساراپتاماسى ونىڭ بۇرىن-سوڭدى قانداي دا ءبىر جۇيكە اۋرۋىمەن اۋىرماعاندىعىن, قىلمىس جاساۋ كەزىندە ءوزىنىڭ ءىس-ارەكەتىن باسقارىپ, جاۋاپ بەرە العاندىعىن جانە قىلمىس جاساعان كەزدە فيزيولوگيالىق اففەكت جاعدايىندا بولماعاندىعىن انىقتاعان.
سوت ۇكىمى
سوتتىڭ ۇكىمى بويىنشا قاليما اسا قاتىگەزدiكپەن ادام ولتiرگەنى جانە ءبوتەننىڭ مۇلكىن ۇرلاعانى ءۇشىن 16 جىل مەرزىمگە باس بوستاندىعىنان ايىرىلدى. الايدا قىلمىسكەر سوت ۇكىمىنە كەلىسپەي, اپەللياتسيالىق شاعىم ءتۇسىردى. استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 2016 جىلعى 2 اقپانداعى قاليماعا قاتىستى ۇكىمى وزگەرىسسىز قالدىرىلدى.
گۇلميرا ايماعانبەت
