جۋىردا: «مەكتەپ وقۋشىلارىنىڭ 70 پايىزى 15 جاسقا دەيىن جىنىستىق قاتىناسقا تۇسەدى» دەگەن اقپارات تارالدى. قازاقتىلدى الەۋمەتتىك جەلىلەردى قولدانۋشىلار بۇعان بىردەن نارازىلىق تانىتتى. ارىپتەسىمىز بولات ءمۇرسالىم: «ەگەر جوعارى سىنىپتاردا وقيتىن وقۋشىلاردىڭ 70 پايىزى سونداي بولسا, ءبىزدىڭ بولاشاعىمىز قانداي بولادى؟» دەگەن ساۋال تاستادى قوعامعا.
تاعى ءبىر ۇيىم – قوعامدىق پىكىردى زەرتتەۋ ورتالىعى جاسوسپىرىمدەردىڭ رەپرودۋكتيۆتى دەنساۋلىعى جانە جىنىستىق ءومىرى تۋرالى الەۋمەتتىك زەرتتەۋ قورىتىندىلارىن جاريالادى. ساۋالناماعا قاتىسقان 15-19 جاس ارالىعىنداعى 4360 قىزدىڭ 16,7 پايىزى جۇكتى بولعانىن ايتىپتى. ورتالىقتىڭ مالىمەتتەردى تالداۋ جانە وڭدەۋ ءبولىمىنىڭ جەتەكشىسى ايجان شابدەنوۆا: «كوپشىلىگى جۇكتىلىكتەن كەيىن بالا تۋعان. 22 رەسپوندەنت تۇسىك جاساتقان, 16 پايىزىنىڭ بالاسى ءتۇسىپ قالعان. ءجاسوسپىرىم قىزداردىڭ 2 پايىزى ۇيىندە تۇسىك جاساتقانى انىقتالدى» دەگەن اقپارات تاراتتى.
ول جاستاردىڭ ۇشتەن ءبىرىنىڭ بەلسەندى جىنىستىق قاتىناسپەن ءومىر سۇرەتىنىن ايتادى. مىناداي مالىمەتتەردى وقىعاندا تىپتەن جاعا ۇستايسىڭ: جاستار اراسىنداعى جىنىستىق قاتىناسقا العاش تۇسەتىندەردىڭ ورتاشا جاسى – 16,5 جاس. زەرتتەۋ كورسەتكەندەي, بوزبالا مەن بويجەتكەندەردىڭ 21 (!) پايىزى 18 جاسقا دەيىن جىنىستىق قاتىناستىڭ «ءدامىن» تاتادى. جىنىستىق قاتىناس كەزىندە ءاربىر بەسىنشى بوزبالا مۇشەقاپ قولدانباعان. قوش دەلىك.
سوندا مۇنداي سۇرىقسىز ستاتيستيكانى كورگەن اتا-انا بالاسىن مەكتەپكە قالاي جىبەرەدى؟ بۇعان ايتار بىرەر ءۋاجىمىز بار. بىرىنشىدەن, ستاتيستيكاعا سەنىمىمىز ازايدى. ونىڭ قالاي ءادىل, شىنايى جۇرگىزىلەتىنىن ەشكىم بىلمەيدى. ەكىنشىدەن, ساۋالناماعا 15-17 جاستاعى بوزبالا مەن بويجەتكەندەردى عانا قاتىستىرۋ قاجەت. سەبەبى, 18-19 جاس – كامەلەتتىك جاس, ياعني, تۇرمىسقا شىعۋعا رۇقسات بەرىلەدى. ۇشىنشىدەن, بەيرەسمي زەرتتەۋلەردى ءبىز رەسمي قۇجاتتارمەن سالىستىرا بەرمەيمىز. مىسالى, ۇلتتىق ەكونوميكا مينيسترلىگى شىعارعان «قازاقستاننىڭ ەرلەرى مەن ايەلدەرى» اتتى باياندامادا 2017 جىلى ەلىمىزدە 15 جاسقا دەيىنگى – 16, 15-18 جاس ارالىعىنداعى – 1418 ءجاسوسپىرىم تۇسىك جاساتقانى جازىلعان. بۇل – رەسمي مەديتسينالىق مەكەمەلەر بەرگەن مالىمەت. بىراق, جوعارى سىنىپ وقۋشىلارىنىڭ ءبارى «توسەكقۇمار», «مورالدان جۇرداي» دەپ كۇستانالاپ وتىرعان جوق. جالعان ستاتيستيكانىڭ ءوزى جاسوسپىرىمدەردى بۇزىلۋعا ۇندەيدى. «مەكتەپ وقۋشىلارى بۇزىلعان» دەپ كۇن سايىن قاقساي بەرسەك, ارسىزدىققا ءوزىمىز يتەرمەلەيمەيمىز بە؟ وتكەندە «ەلىمىزدە 16 جاستان باستاپ قىزدارعا اتا-اناسىنىڭ كەلىسىمىنسىز تۇسىك جاساتۋعا رۇقسات بەرەيىك» دەگەن وتە تۇرپايى, اقىلعا قونىمسىز ۇسىنىس ايتىلدى. داۋاسىز دەرتتىڭ ەمى بىرەۋ عانا, ول – ۇلتتىق تاربيەنى كۇشەيتۋ.
