بيىلعى ۇلتتىق بىرىڭعاي تەستىلەۋ اياقتالعاننان كەيىن ۇلتتىق بىرىڭعاي تەستىلەۋ ورتالىعى ديرەكتورىنىڭ مىندەتىن اتقارۋشى ديدار سماعۇلوۆ ءوزىنىڭ Facebook-تەگى پاراقشاسىندا «ۇلتتىق بىرىڭعاي تەستىلەۋ بارىسىندا 90375 ۇيالى تەلەفون, 28344 كالكۋلياتور جانە 1867 شپارگالكا تاركىلەندى» دەپ جازدى. بۇل جازبانى كورىپ ءوز باسىم قاتتى تاڭعالدىم.
بيىل ۇبت-عا قاتىسۋعا 117242 تالاپكەر ءوتىنىش بىلدىرگەن. ەگەر ءبىر وقۋشى بىردەن ۇيالى تەلەفون جاسىرىپ كىردى دەسەك, 90 مىڭ تالاپكەر كوشىرۋگە ارەكەت جاسادى دەگەن ءسوز. ونىڭ ىشىندە بايقاتپاي الىپ كىرىپ, كوشىرگەندەر قانشاما, ونى قازىرشە ەشكىم بىلمەيدى. جاقسى وقيتىن تۇلەكتەر كوز مايىن تاۋىسىپ, كۇنى-ءتۇنى كىتاپقا تەسىلىپ, ءوز كۇشىمەن 100 بالل جيناسا, وقۋدى ماڭدىرماعاندار ۇبت-دا ۇيالى تەلەفونمەن كوشىرىپ, ودان وزىپ كەتىپ جاتسا, ادالدىق, ادىلدىك دەگەن قايدان قالادى؟
ۇبت باستالاردان بۇرىن ءبىلىم جانە عىلىم ءمينيسترى اسحات ايماعامبەتوۆ ۇلتتىق تەستىلەۋدە ۇيالى تەلەفونمەن ۇستالعان تۇلەكتەرگە شارا قولدانىلاتىنىن ايتقانىمەن, قازىرگە دەيىن تەلەفونمەن ۇستالعانى ءۇشىن ەشبىر تالاپكەر جازالانعان جوق. تۇلەكتەردىڭ كوپشىلىگى كوشىرۋگە ارەكەت جاساعانىن بىلگەن ديرەكتوردىڭ مىندەتىن اتقارۋشىنىڭ ءوزى «قۇرمەتتى اتا-انالار, بالالاردى ۇبت جۇيەسىن الداۋعا ەمەس, ادال باسەكە جانە ناعىز بىلىممەن جارىسۋعا تاربيەلەيىك» دەگەننەن ارى اسپاعانىنا قاراعاندا, ۇبت-داعى بارماق باستى, كوز قىستىلىققا قازىرشە قاتاڭ شارا قولدانىلمايتىن سەكىلدى.
ارينە, قاتاڭ شارا قولدانىلماعان سوڭ, ادىلەتسىزدىك ەشقاشان توقتامايدى. ماسەلەن, كورشى ەل قىتايدا سوڭعى كەزدە شىققان ءتۇزىم بويىنشا ەمتيحاندا كوشىرمەك تۇگىل ۇيالى تەلەفون الىپ كىرىپ بارا جاتىپ ۇستالسا, ەمتيحانعا كىرگىزبەيدى جانە 3 جىل ەمتيحان بەرۋ مۇمكىندىگىنەن ايىرادى. ءتىپتى كەرەك بولسا, قىلمىستىق ءىس قوزعاپ, سوتتاپ تا جىبەرۋگە پەيىل. ال ءبىزدىڭ ەلدە كوشىرگەندەردى جازالاماق تۇگىل اقتاپ تا جاتادى. وتكەن جىلى حيميا ءپانىنىڭ فورمۋلاسىن مينەرال سۋ قۇتىسىنىڭ قاعاز جاپسىرماسىنا جازىپ كىرىپ ۇستالىپ قالعان تالاپكەردى جازعىرعانى سول, ونىڭ تاپقىرلىعىنا ءبىلىم جانە عىلىم مينيسترلىگىنىڭ قىزمەتكەرلەرى رازى بولىپ, ماقتاۋ ايتقانى – انە سونىڭ ايعاعى. ەندەشە, وتكەن جىلعى وسىنداي بىلىقتى كورگەن بيىلعى تۇلەكتەر نە وڭادى؟ ولار دا كوشىرۋدىڭ ءارتۇرلى امالىن جاسايتىنى انىق. ال قارالدىق جۇرگەن جەردە ادالدىق تا, تازالىق تا بولمايدى. سۋ ءدال وسىلاي بۇلاق باسىنان بىلعانىپ جاتسا, ولاردىڭ ەرتەڭىنەن نە قايىر؟! ءتۇبىن قۋساڭ بۇل ۇلتتىڭ, مەملەكەتتىڭ بولاشاعىنا بالتا شاپقاندىق ەمەس پە؟! ويلاناتىن ماسەلە…
