كەشە نۇر-سۇلتان قالاسىندا ەلوردانىڭ دامۋىنا ۇلەس قوسقان الەۋمەتتىك قىزمەتكەرلەر, مۇعالىمدەر, پەداگوگ, مەديتسينا قىزمەتكەرلەرى, پوليتسەيلەر سالتاناتتى تۇردە ماراپاتتالدى.
نۇر-سۇلتان قالاسىنىڭ اكىمى التاي كولگىنوۆ قالانىڭ ءتۇرلى سالالارىنداعى قىزمەتكەرلەرگە, ونىڭ ىشىندە ەنەرگەتيكتەر, قۇرىلىسشىلار, ەكولوگتار, مۇعالىمدەر, دارىگەرلەر, پوليتسيا, ءورت سوندىرۋشىلەر جانە باسقا دا قىزمەتكەرلەرگە العىس حاتتار تابىس ەتتى.
قازاقستاننىڭ استاناسى تاۋەلسىزدىك جىلدارىندا ءبىزدىڭ مەملەكەتىمىزدىڭ الەۋمەتتىك-ەكونوميكالىق جانە ساياسي جەتىستىكتەرىن بەينەلەيدى, ەلىمىزدىڭ ءوسىپ كەلە جاتقان قۋاتىن جانە ونى ودان ءارى دامىتۋدىڭ جوعارى الەۋەتىن كورسەتەدى. 21 جىل ىشىندە ەلوردامىز تابىستى ەكونوميكالىق دامۋدىڭ ۇلگىسى عانا ەمەس, سونداي-اق حالىقارالىق ءتۋريزمنىڭ تارتىمدى ورتالىعى بولىپ تابىلاتىن الەمدىك الەۋمەتتىك, ەكونوميكالىق جانە مادەني دامۋدىڭ وزەكتى ماسەلەلەرى بويىنشا حالىقارالىق ديالوگتىق الاڭعا اينالدى.
وسى ورايدا, قالا اكىمى ەلوردامىزدىڭ سەرپىندى دامۋىنىڭ باستى كۇشى – ونىڭ تۇرعىندارى, ءارتۇرلى سالالارداعى قىزمەتكەرلەرى, ولاردىڭ شىعارماشىلىق جانە كاسىبي داعدىلارى ۇلكەن جەتىستىككە قول جەتكىزەتىنىن اتاپ ءوتتى.
«بۇگىنگى استانانىڭ ءاربىر جەتىستىگىنىڭ تۇبىندە سىزدەردىڭ ماڭداي تەر ەڭبەكتەرىڭىز بەن ەسەلى ەرلىكتەرىڭىز جاتىر. بۇل استاناعا دەگەن جان-جاقتى قامقورلىقتارىڭىزدىڭ ناتيجەسى» دەدى اكىم.
التاي كولگىنوۆ جۇمىسشىلارعا ولاردىڭ جۇمىسى مەن قالانىڭ دامۋى مەن وركەندەۋىنە قوسقان ۇلەسى ءۇشىن العىسىن ءبىلدىردى.
ماراپاتتاۋ راسىمىنەن كەيىن ەسترادا جۇلدىزدارى ونەر كورسەتكەن قاتىسۋشىلار ءۇشىن مەرەكەلىك كونتسەرت ۇيىمداستىرىلدى.
