بيۋدجەت ەسەبى بەكىتىلدى
قالالىق ءماسليحاتتىڭ كەزەكتەن تىس, وتىز ءتورتىنشى سەسسياسىندا استانا قالاسىنىڭ 2013 جىلعا ارنالعان بيۋدجەتىنىڭ ورىندالۋى تۋرالى ەسەبى بەكىتىلدى.
استانا قالاسى قارجى باسقارماسىنىڭ باسشىسى رۋسلان دوساەۆتىڭ ايتۋىنشا, وتكەن جىلدىڭ بيۋدجەتتىك ساياساتى ەلوردانىڭ دامۋ باعدارلاماسىنا جانە بيۋدجەتتىك باعدارلاما اكىمشىلەرىنىڭ ستراتەگيالىق جوسپارلارىندا بەكىتىلگەن ماقساتتار مەن مىندەتتەرگە قول جەتكىزۋگە باعىتتالدى.
2013 جىلى جەرگىلىكتى بيۋدجەتكە جوسپاردان تىس 4 802, 9 ملن تەڭگە مەنشىكتى كىرىس ءتۇسىپ, مەنشىكتى كىرىستەر بويىنشا جوسپار 103,5 پايىزعا ورىندالعان. اتاپ ايتساق, سالىق تۇسىمدەرى بويىنشا جوسپار 105,0 پايىز نەمەسە 5 751,8 ملن تەڭگەگە ارتىعىمەن ورىندالدى. سالىقتان تىس تۇسىمدەر بويىنشا جوسپارداعى 7 378,8 ملن تەڭگەنىڭ ورنىنا 9 628,8 ملن تەڭگە ءتۇسىپ, جوسپار 130,5 پايىزعا نەمەسە 2 250,0 ملن تەڭگەگە ارتىعىمەن ورىندالعان. ال, نەگىزگى كاپيتالدى ساتۋدان تۇسكەن تۇسىمدەر ەسەبىنەن بيۋدجەتكە 3 198,9 ملن تەڭگە ءتۇستى.
وتكەن جىلدارداعىداي, بىلتىر دا بيۋدجەتتىڭ تۇسىمدەرى نەگىزىنەن الەۋمەتتىك شىعىندارعا باعىتتالعانىن جەتكىزە كەلە, باسقارما باسشىسى سوڭعى بەس جىلدا ءبىلىم بەرۋ, دەنساۋلىق ساقتاۋ, الەۋمەتتىك كومەك, مادەنيەت, سپورت, تۋريزم سالاسىنا جۇمسالعان قاراجاتتاردىڭ ۋاقتىلى يگەرىلگەنىن ايتتى. 2008 جىلى اتالعان شىعىندار ءۇشىن 60,1 ملرد تەڭگە جۇمسالسا, 2013 جىلى ول 99,5 ملرد تەڭگەنى قۇراپتى.
ەكونوميكانى تۇراقتاندىرۋ بويىنشا داعدارىسقا قارسى شارالار شەڭبەرىندە رەسپۋبليكالىق بيۋدجەتتەن 8 481,6 ملن تەڭگە الىندى. ونىڭ 2 512,5 ملن تەڭگەسى «بيزنەستىڭ جول كارتاسى – 2020» باعدارلاماسى اياسىندا جەكە كاسىپكەرلىكتى قولداۋ جانە يندۋستريالىق ينفراقۇرىلىمدى دامىتۋعا, 506,2 ملن تەڭگەسى جۇمىسپەن قامتۋ قىزمەتىن, جەكە تۇلعالاردىڭ ەڭبەكاقى تولەمىن ءىشىنارا قارجىلاندىرۋدى, جاستار ساياساتىن جانداندىرۋ, كاسىپتىك دايارلاۋ, كادرلاردى قايتا دايارلاۋ جانە بىلىكتىلىگىن ارتتىرۋدى, اقپاراتتىق-تۇسىندىرمە جۇمىستارىن قامتاماسىز ەتۋ ءۇشىن «جۇمىسپەن قامتۋ – 2020», «بيزنەستىڭ جول كارتاسى – 2020» ءىس-شارالارىن ىسكە اسىرۋعا باعىتتالعان. ال, 5 462,9 ملن تەڭگە سوماسىنداعى كرەديتتىك قاراجات «قولجەتىمدى تۇرعىن ءۇي – 2020» باعدارلاماسىن ىسكە اسىرۋعا, تۇرعىن ءۇي قۇرىلىسى جيناق جۇيەسى ارقىلى تۇرعىن ءۇي سالۋعا نەمەسە ساتىپ الۋعا ءبولىندى.
ودان ءارى مەملەكەت مۇقتاجى ءۇشىن جەر ۋچاسكەلەرىن الۋعا بايلانىستى جەر ۋچاسكەلەرىن نەمەسە جىلجىمايتىن وزگە مۇلىكتەردى ساتىپ الۋ تۋرالى شارتتاردىڭ جوبالارى كەلىسىلىپ, استانا قالاسى ءماسليحاتىنىڭ 2012 جىلعى 6 ماۋسىمداعى «استانا قالاسىنىڭ الەۋمەتتىك ماڭىزدى باعىتتارىنىڭ تىزبەسىن بەكىتۋ تۋرالى» شەشىمىنە تولىقتىرۋلار, سونداي-اق, قالالىق ءماسليحاتتىڭ تۇراقتى كوميسسياسىنىڭ قۇرامىنا وزگەرىستەر ەنگىزىلدى.
گۇلبارشىن وكەشقىزى