ەلىمىزدىڭ بيۋدجەت كودەكسىنىڭ نورمالارىنا سايكەس مەكتەپالدى دايارلىق مەكەمەلەرىن اۋدانداردىڭ اكىمدىكتەرى قارجىلاندىرادى. قالالىق ءماسليحات دەپۋتاتتارى ۇلتتىق ەكونوميكا مينيسترلىگىنە اتالمىش كودەكسكە وزگەرتۋلەر ەنگىزۋ تۋرالى, ياعني قارجىلاندىرۋدى اۋدان اكىمدىكتەرىنەن الىپ, ءبىلىم باسقارماسىنا بەرۋ ۇسىنىسىمەن شىقپاق. دەپۋتاتتاردىڭ پىكىرىنشە, بۇل جاعداي بيۋدجەت قارجىسىنىڭ يگەرىلۋىن باقىلاۋدى كۇشەيتەدى. بۇل تۋرالى وتكەن جىلدىڭ بيۋدجەتىنىڭ ورىندالۋىنا ارنالعان ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى, سونداي-اق, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيالارىنىڭ بىرلەسكەن وتىرىسىندا ايتىلدى.
ءماسليحات دەپۋتاتى قاراقات ابدەننىڭ سوزىنشە, بىلتىر مەكتەپالدى ءبىلىمدى قامتاماسىز ەتۋگە كوپ قارجى بولىنگەن. باعدارلامانىڭ اكىمشىسى اۋدانداردىڭ اكىمدىكتەرى بولعانمەن, باقىلاۋ شارالارى مەن مالىمەتتەردىڭ ەلەكتروندى بازاسىنا ءبىلىم باسقارماسى جاۋاپتى. وسى جاعدايدا اۋدان اكىمدىكتەرى بيۋدجەت قارجىسىن يگەرىلۋ, يگەرىلمەۋىن قالاي تەكسەرەتىنى تۇسىنىكسىز. «مالىمەتتەر بازاسىن اۋدان اكىمدىكتەرىنە نەمەسە قارجىلاندىرۋدى باسقارماعا بەرۋدى ۇسىنامىن» دەدى دەپۋتات.
تەكسەرۋ كوميسسياسىنىڭ ءتوراعاسى عالىمجان مولداش دەپۋتاتتىڭ ۇسىنىسىن قولدادى. ونىڭ ايتۋىنشا, بۇل – بۇرىننان شەشىلمەي كەلە جاتقان ءتۇيتكىل. مەكتەپالدى دايارلىق مەكەمەلەرىن قارجىلاندىرۋدى باسقارما اتقارۋى ءتيىس. ولاي بولماعان سوڭ, بالاباقشالار باسقارما مەن اۋدان اكىمدىكتەرىنە ەكى رەت بىردەي ەسەپتى تاپسىرادى. نەگىزىنەن, اۋدان اكىمدىكتەرى شارۋاشىلىق ماسەلەلەرىمەن اينالىسقانى دۇرىس ەدى. بۇل كوميسسيا اتالمىش ماسەلە بويىنشا ۇلتتىق ەكونوميكا جانە ءبىلىم جانە عىلىم مينيسترلىكتەرىنە ءتيىستى ۇسىنىسپەن شىققان ەكەن, الايدا ولاردىڭ جاۋاپتارىندا بيۋدجەت كودەكسىندەگى نورماعا سىلتەمە جاسالعان.
ءماسليحات دەپۋتاتتارى استانادا جىلدان-جىلعا بالالاردى مەكتەپالدى مەكەمەلەرمەن قامتۋ كورسەتكىشى ءوسىپ جاتقانىن, ارينە, قارجىلاندىرۋ دا ۇلعاياتىنىن اتاپ ءوتىپ, بۇل جاعدايدا قارجىنىڭ جۇمسالۋى باقىلاۋسىز كەتۋ مۇمكىندىگىن جەتكىزدى. دەپۋتات ميراس شەكەنوۆ بيۋدجەت كودەكسىنە ءتيىستى وزگەرتۋلەردى ەنگىزۋ ءۇشىن اكىمدىك پەن ءماسليحات جاعىنان تىكەلەي ۇكىمەتكە شىعۋدى ۇسىندى. ونىڭ پىكىرىنشە, قازىر زاڭدارعا وزگەرىستەر مەن تولىقتىرۋلار كوپ ەنگىزىلۋدە. سوندىقتان زاڭدىق تۇرعىدان وسىنى شەشۋگە بولادى.
ءبىلىم باسقارماسى ءتيىستى ۇسىنىستارمەن جوعارى جاققا شىققان ەكەن. الايدا ازىرگە ەش ءناتيجە جوق. باسقارما وكىلى اۋدان اكىمدىكتەرى ىشىنەن ءبىلىم بولىمدەرى قۇرىلعانىن, وندا مەكتەپالدى ءبىلىمنىڭ جايى كەزەڭ-كەزەڭىمەن سارالاناتىنىن جەتكىزدى.
