ەلوردادا قازاق ۇلتتىق ونەر ۋنيۆەرسيتەتىنىڭ 20 جىلدىعى تويلاندى. سالتاناتتى كەشكە ەلباسى نۇرسۇلتان نازارباەۆ قاتىسىپ, ۋنيۆەرسيتەت ۇجىمىن, سونداي-اق, ونەرپاز قاۋىمدى مەرەيتويمەن قۇتتىقتادى.
«ەلدىڭ مادەني ومىرىنە شىعارماشىل قاۋىم ەلەۋلى ۇلەس قوسىپ كەلەدى. استاناعا بۇكىل قا-
زاقستاننان مادەنيەت سالاسىنىڭ ۇزدىك وكىلدەرىن شاقىردىم. ايمان مۇساقوجاەۆا – سونىڭ ءبىرى. الەمدە كوپتەگەن ۋنيۆەرسيتەت بار. بىراق ونەر ۋنيۆەرسيتەتى تەك استانادا عانا بوي كوتەردى. ونى باسقارعان ايماننىڭ جۇمىسىنا جوعارى باعا بەرەمىن. بۇگىندە ەلوردادا وپەرا جانە بالەت تەاترى, حورەوگرافيا اكادەمياسى, ورتالىق كونتسەرت زالى جانە باسقا دا مادەنيەت وشاقتارى اشىلدى» دەپ اتاپ ءوتتى ءوز قۇتتىقتاۋىندا مەملەكەت باسشىسى.
مەرەكەلىك كونتسەرتتە قازاق جانە شەتەل كومپوزيتورلارىنىڭ ءار جانرداعى تۋىندىلارى ۇسىنىلدى. لاتيف ءحاميديدىڭ «بۇلبۇل» ءانى, لەونارد بەرنستايننىڭ «ۆەستسايد تاريحى» ميۋزيكلىنەن «سيمفونيالىق بيلەر» جانە باسقا دا كوپتەگەن شىعارمالار «قازاقستان» ورتالىق كونتسەرت زالىن كەۋلەدى. «قازاقتىڭ موتسارتى» اتانعان تالانتتى كومپوزيتور, ۆۋندەركيند, «قازاقستاننىڭ 100 جاڭا ەسىمى» جوباسىنىڭ جەڭىمپازى راحات-بي ابدىساعىن كوپشىلىك الدىندا ونەر كورسەتتى.
ءبىر ايتارلىعى, وتكەن 20 جىلدا ۋنيۆەرسيتەتتىڭ 500-دەن اسا تۇلەگى حالىقارالىق كونكۋرستار مەن بايقاۋلاردىڭ لاۋرەاتى اتاندى. ولاردىڭ قاتارىندا ديماش قۇدايبەرگەن, سۇندەت بايعوجين سىندى دارىندى ونەرپازداردى ەرەكشە اتاپ ءوتۋ كەرەك. بۇگىنگى تاڭدا ۋنيۆەرسيتەتتە كوللەدج, باكالاۆريات, ماگيستراتۋرا جانە دوكتورانتۋرا بار. قازىرگى كەزدە اتالمىش وقۋ ورداسىندا 3 مىڭعا جۋىق ستۋدەنت ءبىلىم الىپ ءجۇر.
قارلىعا ايسانقىزى
