«گۇل وسسە جەردىڭ كوركى» دەگەندەي, جاقىندا گۇل ەگۋ ناۋقانى باستالادى. كوشەلەردى قىزىلدى-جاسىلدى گۇلمەن كومكەرۋ اسەم شاھاردىڭ شىرايىنا شىراي قوسىپ, ادەمىلىگىن ارلەي تۇسەتىنى انىق.
«استانا-زەلەنستروي» مەكەمەسىنىڭ جىلىجايىنا ارنايى بارىپ, مامانداردان قالانىڭ قالاي گۇلدەنەتىنىن سۇراپ بىلدىك. اتالمىش كومپانيانىڭ باس اگرونومى باقتيار شايمۇحانبەتوۆ پەن گۇل ءوسىرۋشى ماريا تسارەۆا ءوزدەرىنىڭ جۇمىستارى جايلى كەڭىنەن اڭگىمەلەدى. ولاردىڭ سوزىنە سۇيەنسەك, بيىلعى ماۋسىمدا قالاداعى گۇل باقتارى مەن ساياباقتارعا, كوشەلەرگە, جولداردىڭ جيەكتەرىنە 5,5 ملن ءتۇپ گۇل ەگىلەدى. وسىنشاما گۇل قالانىڭ 15-16 گەكتار جەرىن قامتيدى ەكەن.
– گۇل كوشەتتەرىن وتىرعىزۋ ناۋقانىن مامىردىڭ 20-نان باستاۋدى جوسپارلاپ وتىرمىز. بيىلعى ناۋقاندى اۋا رايىنىڭ قولايسىزدىعىنا بايلانىستى جىلداعى ۋاقىتتان شامامەن 5-7 كۇنگە كەشتەۋ باستايمىز. وتكەن جىلمەن سالىستىرعاندا ۇيرەنشىكتى پايدالانىلاتىن گۇل تۇرلەرىنەن بولەك ميكسبوردەر وتىرعىزۋ تەحنيكاسى قولدانىلادى. بۇل – وزىندىك كۇردەلى كوپقاتارلى جانە كوپقاباتتى وتىرعىزىلعان وسىمدىكتەردەن تۇراتىن, ەرتە كوكتەمنەن باستاپ قوڭىر كۇزگە دەيىن ۇزدىكسىز گۇلدەنۋدى قامتاماسىز ەتەتىن گۇل باعى. سونىمەن قاتار بيىل بىرنەشە جاڭا راۋشانگۇل سۇرىپتارىن قولدانىسقا ەنگىزۋ ويىمىزدا بار, – دەيدى باقتيار شايمۇحانبەتوۆ.
باس اگرونومنىڭ ايتۋىنشا, قالاداعى گۇلزارلارعا بيىل دا ادەتتەگىشە پەتۋنيا, تاگەتەس, وستەوسپەرمۋم, پەلارگونيا, پورتۋلاك, لۆيننىي زەۆ سياقتى ءبىر جىلدىق گۇلدەردىڭ 50-دەن اسا ءتۇرى مەن حوستا, بولىنگەن رۋدبەكيا, ەشولتسيا, باقشا تۇيمەداعى, باقشا پيونى, ليلەيلى, ءىرى گۇلدى كورەوپسيس, قوڭىراۋ گۇلتىعىز سىندى كوپجىلدىق گۇلدەردىڭ 30-دان اسا ءتۇرى ەگىلمەك. قازىرگى ۋاقىتتا جىلىجايدا 90 ادام جۇمىس ىستەيدى. ولار جەتى كۇن بويى تاڭعى ساعات 7-دەن كەشكى 7-گە دەيىن گۇل كوشەتتەرىنىڭ كۇتىمىمەن اينالىسۋدا. ال گۇلدەندىرۋ ماۋسىمىنداعى قىزۋ ناۋقان كەزىندە شامامەن مىڭعا جۋىق جۇمىسشى جۇمىلدىرىلماق. ەگۋ ناۋقانى ماۋسىم ايىنىڭ سوڭىنا دەيىن سوزىلاتىنىن ايتادى ماماندار.
