شاتتىققا تولى شاڭىراق

جاقىندا قالالىق «مەرەيلى وتباسى» بايقاۋىنىڭ سوڭعى سىنى وتەدى. وعان ەلورداداعى كوپ وتباسىلار قاتىسىپ جاتىر. سولاردىڭ ءبىرى – تولەگەنوۆتەر اۋلەتى.

بۇل شاڭىراقتىڭ يەسى – ءالىباي تولەگەنوۆ. «قازاقستان تەمىرجولى» ۇلتتىق كومپانيا­سىندا جيىرما جىلدان بەرى جۇمىس ىستەيدى. ماماندىعى – مەحانيك. تەحنيكانىڭ قۇلاعىندا وينايدى. سودان با, ارىپتەستەرى ونى قاتتى قۇرمەتتەيدى. ءالىباي اعامىز كوپ سوزگە جوق. وعان قاراعاندا كۇلزيرا جەڭگەمىز اشىقتاۋ ەكەن. بارىن جايىپ سالدى. ۇيدەگى وتاناسىنىڭ ماماندىعى – جوعارى ءبىلىمدى پەداگوگ-تاربيەشى. «نۇرلى جۇرەك» الەۋمەتتىك قىزمەت كور­سەتۋ ورتالىعىندا ەڭبەك ەتەدى. بۇل ورتالىقتا مۇمكىندىگى شەكتەۋلى بالالار ەم الادى. كۇلزيرا اپاي­دىڭ ءوزى بالاجان. بالا دەسە ەمى­رەنىپ تۇرادى. سول مەكەمەدە 20 جىلدان بەرى ابىرويلى قىزمەت ىستەپ كەلەدى. «الەۋمەتتىك سالانىڭ ۇزدىگى» دەگەن بەلگىمەن ماراپاتتالعان. «مۇمكىندىگى شەك­تەۋلى جەتكىنشەكتەرمەن جۇمىس ىستەۋ وڭاي ەمەس. ەرتەمەن قىزمەتكە كەلىپ, بىردەن بالالاردىڭ قاسىنان تابىلامىن. ولاردى جۋىندىرىپ, تاماقتاندىرامىز. ساباق ۇيرەتەمىز. العاشىندا قينالعام. قازىر ۇيرەنىپ كەتتىم» دەيدى اپاي جىميىپ.
تولەگەنوۆتەر وتباسى باس شاھارعا 1997 جىلى قونىس اۋدارعان. نەگىزى, ەكەۋى دە اقمولا وبلىسى اقكول اۋدانىنداعى ورنەك دەگەن اۋىلدان بولادى. بالا كۇندەرىنەن ءبىر-ءبىرىن جاقسى بىلەدى. 1981 جىلى ەكى جاس وتباسىن قۇرادى. 1982 جىلى تۇڭعىش ءسابيى بيبىگۇل دۇنيە ەسىگىن اشادى. قازىر ول دا ءۇش بالانىڭ اناسى. «AL-STAR» جشس-تە كاسسير بولىپ جۇمىس ىستەگەن. بۇگىندە ۇيدە ۋاقىتشا بالا كۇتىمىمەن وتىر. ەكىنشى بالاسى – بەيبىت 1984 جىلى تۋعان. س.سەيفۋللين اتىنداعى قازاق مەملەكەتتىك اگروتەحنيكالىق ۋنيۆەرسيتەتىن بىتىرگەن. جوعارى ءبىلىمدى مامان. ونىڭ دا ەكى بالاسى بار. كەنجەسى بەيىمبەت 1990 جىلى ومىرگە كەلگەن. قازىر ول قالالىق ءورت ءسوندىرۋ سالاسىندا ىستەيدى.
«اقمولا استانا بولعاندا قاتتى قۋاندىق. سودان وسىندا كوشىپ كەلدىك. بىردەن جولداسىم ەكەۋمىز جۇمىسقا ورنالاستىق. بالالار ەرجەتتى. ولار جوعارى وقۋ ورنىندا وقىدى. قازىر ۇشەۋى دە ومىردەن ءوز جولدارىن تاپتى. نەمەرەلەرىم ءوسىپ كەلەدى. اسىرەسە, ۇلكەن نەمەرەمنەن ءۇمىت كۇتەمىن. ەسىمى – دياس شالاباەۆ. قازاق ۇلتتىق ونەر ۋنيۆەرسيتەتىندە وقيدى. ۆيولونچەل اسپابىندا وينايدى. تالاي حالىقارالىق كونكۋرستاردا توپ جارعان. جاقىندا تۇركيادا وتكەن بايقاۋدان جۇلدەگەر بولىپ ورالدى. جولداسىم ەكەۋمىز كوپبالالى وتباسىندا وستىك. ءوزىم وسكەن ۇيدە ون بالا بولدى. اكەم – سوعىس ارداگەرى. قازىر ارامىزدا جوق. انام بار. سەڭگىرلى سەكسەننەن اسقان. ءبىزدىڭ بار قىزىعىمىزدى كورىپ, ورتامىزدا وتىر» دەدى كۇلزيرا يسلامقىزى.
مىنە, ەلىمىزدەگى شاتتىققا تولى شاڭىراقتىڭ ءبىرى… ال مۇنداي بەرەكەلى وتباسىلار جۇزدەپ ەمەس, مىڭداپ سانالاتىنى انىق.

ازامات قۇسايىن