«جاس ساقشى» قۇقىقتىق ءتارتىپتى ساقتاۋ جاساعىنىڭ قاتارى ونداعان كومانديرمەن تولىقتى. استانا قالاسى ىشكى ىستەر دەپارتامەنتىنىڭ جەرگىلىكتى پوليتسيا قىزمەتى جانە قالالىق قوعامدىق دامۋ ىستەرى باسقارماسى «ساقشى» جاساق جۇمىسىنىڭ رەسمي اشىلۋ سالتاناتىن وتكىزدى.
بيىل – ەلوردانىڭ 20 جىلدىق مەرەيتويى. دەمەك, مەرەكە قارساڭىندا كوپتەگەن شارالار ۇيىمداستىرىلماق. وسى ورايدا جەرگىلىكتى پوليتسيا قىزمەتكەرلەرىنە جاس ءتارتىپ ساقشىلارى كومەككە كەلىپ, قالاداعى تىنىشتىقتى قامتاماسىز ەتۋگە اتسالىسادى. جاسوسپىرىمدەر اراسىنداعى قۇقىق بۇزۋشىلىق پەن قىلمىستىڭ الدىن الۋ شارالارىمەن اينالىساتىن جاس ساقشىلار ارنايى ىرىكتەۋدەن ءوتتى. ولار جاسى 16-دان اسقان, ءوز ىسىنە جاۋاپكەرشىلىكپەن قارايتىن ءارى سوتتالماعان بولۋى كەرەك.
قوعامدىق دامۋ ىستەرى باسقارماسىنىڭ باسشىسى دانيار ەسيننىڭ ايتۋىنشا, ساقشىلار كەشكى ساعات 7-دەن باستاپ تۇنگى 10-11-لەرگە دەيىن رەيدتىك شارالارعا قاتىسادى. جاسوسپىرىمدەردىڭ جول-قاۋىپسىزدىك ەرەجەلەرىن ساقتاۋى دا جاس ينسپەكتورلارعا مىندەتتەلدى. ماسەلەن, بىلتىر 1200-دەن استام اكىمشىلىك-قۇقىقتىق زاڭنامالىق انىقتاما تولتىرىلىپ, ارنايى ايىپپۇل سالىندى.
ايتا كەتەيىك, جاساق جۇمىسى قىركۇيەك, قازان ايلارىنا دەيىن جالعاسادى.
