نۇر-سۇلتان قالاسى ءماسليحاتىنىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيا وتىرىسىندا قالالىق ورتانى رەگەنەراتسيالاۋ باسقارماسىنىڭ باسشىسى ارجان بۇعىباەۆ دەپۋتاتتاردى قالاداعى ماڭىزدى نىساندار قۇرىلىسىمەن, سەرۆيستىك جوبالارمەن جانە ءتيىستى جوبالاردى باسقارۋ تاسىلدەرىمەن تانىستىردى.
ونىڭ ايتۋىنشا, قازىرگى كەزدە شاھاردا 21 نىسان سالىنىپ جاتىر. اتاپ ايتقاندا, ءتورت مەكتەپتىڭ, مەكتەپتەرگە جاپسارلاس سەگىز عيماراتتىڭ, ەسىل وزەنى ارناسىنىڭ بەس ۋچاسكەسى مەن سارىبۇلاق ارناسىنىڭ ەكى ۋچاسكەسىنىڭ, قاڭعىباس يتتەر مەن مىسىقتار پاناسىنىڭ, كورۋ قابىلەتى ناشارلاعان بالالارعا ارنالعان بالاباقشانىڭ قۇرىلىسى جالعاسۋدا.
جەتى مەكتەپ, مەكتەپكە جاپسارلاس ءبىر عيمارات, ەسىل وزەنى ارناسىنىڭ ءبىر ۋچاسكەسى, ءۇش ءورت ءسوندىرۋ دەپوسى, دارىگەرلەر مەن مۇعالىمدەرگە ارنالعان ءۇش جاتاقحانا, بارلىعى ون بەس جوبا جوبالانۋ ۇستىندە. سونداي-اق ءبىر ءورت ءسوندىرۋ دەپوسى قۇرىلىسىنا كونكۋرس جاريالاندى.
وتكەن جىلى مەملەكەتتىك-
جەكەمەنشىك ارىپتەستىك اياسىندا ەلوردا اكىمدىگىنە كولىك قىزمەتىن كورسەتۋ جوباسى قولعا الىندى. جوبانى جۇزەگە اسىرۋدىڭ سەگىز ايىنىڭ قورىتىندىسى وڭ ناتيجەلەردى كورسەتتى. بۇدان بۇرىن بۇل قىزمەتكە جىلىنا 500 ملن تەڭگە جۇمسالسا, بيىل وعان 300 ملن تەڭگەدەن كەم سالۋ جوسپارعا ەنگىزىلدى. قازىرگى كەزدە ۇنەمدەۋ 58 پايىزدى قۇرادى. بۇعان قوسا, شاعىن ورتا بيزنەس پەن استانالىق تاكسي قىزمەتى دامىپ جاتىر.
مەملەكەتتىك-جەكەمەنشىك ارىپتەستىك شەڭبەرىندە جۇزەگە اسىرىلا باستاعان جوبالاردىڭ قاتارىندا پاراليمپيادالىق جاتتىعۋ ورتالىعى مەن «تارلان» مۇز ايدىنى ارەناسى دا بار. اتالمىش جوبالاردى ىسكە اسىرۋ وسى جىلدىڭ باسىنان باستالدى. كاپيتالدىق شىعىنداردان باس تارتۋ ەسەبىنەن 1,5 ملرد تەڭگە كولەمىندەگى بيۋدجەت قارجىسى ۇنەمدەلدى.
بىلتىر «كوكتال» تۇرعىن الابىندا «قايسار» سپورت كلۋبىنىڭ قۇرىلىسى باستالدى. جوبانىڭ جالپى قۇنى – 4,7 ملرد تەڭگە. قازىرگى كەزدە كلۋبتى ودان ءارى كۇتىپ-ۇستاۋعا جىلىنا قوسىمشا 300 ملن تەڭگە قاجەت.
قالالىق ورتانى رەگەنەراتسيالاۋ باسقارماسى بيۋدجەت قارجىسىن ۇنەمدەيتىن قالانى كوگالداندىرۋ جوباسىن دا ازىرلەدى. بۇل ىرعاي ءتارىزدى كوپجىلعى بۇتالاردى وتىرعىزۋ جانە شاعىن جانە ورتا بيزنەس وكىلدەرى اراسىندا اشىق كونكۋرس وتكىزۋ جولىمەن جۇزەگە استى. كونكۋرستى ءۇش جەكە كاسىپكەر جەڭىپ الدى. ناتيجەسىندە ۇنەمدەۋ جىلىنا 185,2 ملن تەڭگەنى قۇرايدى.
Sen Jasa قوسىمشاسى دا بيۋدجەت قارجىسىن ۇنەمدەيدى. بۇل قوسىمشا ارقىلى ۇساق جۇمىستار دەلدالدارسىز كونكۋرستىق نەگىزدە تىكەلەي ورىنداۋشىعا تاپسىرىلادى. سول كەزدە ۇنەمدەۋ 50 پايىزعا دەيىن جەتەدى دەپ جوسپارلانۋدا. اتالمىش قوسىمشا نازارباەۆ ۋنيۆەرسيتەتىنىڭ Astana Business campus يننوۆاتسيالىق كلاستەرمەن بىرلەستىكتە ازىرلەندى
