نۇر-سۇلتان قالاسىنىڭ اكىمى باقىت سۇلتانوۆ بەلگيانىڭ رەسمي دەلەگاتسياسىمەن كەزدەستى, دەپ حابارلايدى ەلوردا اكىمدىگىنىڭ رەسمي سايتى.
ىنتىماقتاستىقتىڭ پەرسپەكتيۆالىق باعىتتارى, بەلگيالىق جانە استانالىق بيزنەستىڭ ءوزارا ءىس-قيمىل مۇمكىندىكتەرى تالقىلانعان كەزدەسۋ بارىسىندا ەلوردا باسشىسى نۇر-سۇلتان قالاسىن دامىتۋدىڭ باستى باعىتتارى تۋرالى اڭگىمەلەدى. «بۇگىن ءبىز قالانىڭ ستراتەگيالىق دامۋ كەزەڭىندە تۇرمىز. نەگىزگى باعىتتار ينۆەستيتسيالاردى تارتۋعا, «استانا» حالىقارالىق قارجى ورتالىعىن, بيزنەس-ءتۋريزمدى, ساندىق تەحنولوگيالاردى, IT-ستارتاپتاردى دامىتۋعا باعىتتالادى» دەدى قالا اكىمى. سونداي-اق قازاقستان استاناسىنىڭ بەلگيالىق بيزنەسپەن ءوزارا ءتيىمدى ىنتىماقتاستىققا دايىندىعىن ءبىلدىردى. بەلگيا كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى الەكسيس دە كرومبريۋگحە دە پيكەندال دەلەگاتسيا قۇرامىندا قازاقستاندىق بيزنەسپەن بايلانىس ورناتۋعا قىزىعۋشىلىق تانىتىپ وتىرعان 20-دان اسا بەلگيالىق كومپانيا بار ەكەنىن اتاپ ءوتتى. ءوز كەزەگىندە ەكسپورت جانە ينۆەستيتسيالار جونىندەگى ۆاللون اگەنتتىگىنىڭ (AWEX) جانە WBI اگەنتتىگىنىڭ باس ديرەكتورى پاسكال دەلكوممينەت دەلەگاتسيا قۇرامىنداعى كومپانيالار قازاقستان ءۇشىن ۇلكەن قىزىعۋشىلىق تۋدىرۋى مۇمكىن سالالاردا جۇمىس ىستەيتىنىن جەتكىزدى. «ولاردىڭ اراسىندا دەنساۋلىق ساقتاۋ, ينفراقۇرىلىم, ەنەرگەتيكا, اۋىل شارۋاشىلىعى, ونەركاسىپتىك جابدىقتار, اعىن سۋلاردى قايتا وڭدەۋ سالالارى بار. ميسسيا ەكسپورتتى بولىپ ەسەپتەلەدى. بەلگيالىق كومپانيالار قازاقستانداعى ىسكەر سەرىكتەستەردى ىزدەۋگە قىزىعىپ وتىر» دەدى ول. كەزدەسۋ بارىسىندا بەلگيا كورولدىگىنىڭ كونسۋلى دەننيس ۆان دەن ۆەيك ەلورداعا قۇرمەتتى كونسۋلداردىڭ حالىقارالىق كونفەرەنتسياسىن وتكىزۋ جوسپارلانىپ وتىرعانىن ايتتى. «بىزدە ولاردىڭ الدىندا قازاقستاننىڭ ينۆەستيتسيالىق الەۋەتىن اشۋ مۇمكىندىگى بولادى. ءىس-شارا باعدارلاماسى اياسىندا قوناقتار «استانا» حالىقارالىق قارجى ورتالىعىنا بارادى. سونىمەن قاتار دۇنيەجۇزىلىك قۇرمەتتى كونسۋلدار بىرلەستىگىنىڭ پرەزيدەنتى ءوزىنىڭ قاتىسۋىن راستادى. فورۋمعا قاتىسۋشىلاردىڭ تۋريستىك باعدارلامالارى بولعانىن قالايمىن, ولار الىستان ۇشىپ كەلەدى, بىرنەشە كۇن ەلوردادا بولادى» دەپ اتاپ وتكەن دەنيس ۆان دەن ۆەيك قالا بيلىگى تاراپىنان كونفەرەنتسياعا قولداۋ كورسەتۋگە ءۇمىت ءبىلدىردى. ءوز كەزەگىندە ەلوردا اكىمى قولداۋ بىلدىرۋگە دايىن ەكەندىگىن ايتىپ, بيزنەستى قۇرۋ مەن دامىتۋدىڭ جانە قالاعا ۇزدىك تەحنولوگيالاردى تارتۋدىڭ ماڭىزدىلىعىن اتاپ ءوتتى. «ءبىزدىڭ قالانىڭ ءبىر ەرەكشەلىگى – كليماتتىق جاعدايى وڭاي ەمەس. سوندىقتان ءبىز قالالىق شەشىمدەرگە قاتىستى جاڭا تەحنولوگيالاردى دامىتۋعا مۇقتاجبىز» دەپ تۇيىندەدى كەزدەسۋدى قالا اكىمى.
