ەلوردانىڭ «الەمنىڭ تسيفرلىق ەليتا» قاتارىنان كورىنۋى ءۇشىن يننوۆاتسيالىق دامۋ قارقىنىن ارتتىرىپ, ونىڭ دەڭگەيىن جوعارىلاتۋ كەرەك. پروگرەسسيۆتى نارىققا يننوۆاتسيانى ەنگىزۋدىڭ مۇنداي جىلدامدىعى تەحنولوگيالىق پروگرەستىڭ ءساتتى دامۋىنىڭ ۇلگىسى بولا الادى. تسيفرلانعان ەلورداعا اينالۋ ءۇردىسى بىرنەشە ساناتتار بويىنشا جۇزەگە اسىرىلىپ, سول ارقىلى ول قىزمەتتەردىڭ بىرنەشە سالاسىن قامتيدى. ورتالىق ازيانىڭ تسيفرلىق حابىنا اينالۋ ءۇشىن استانادا قانداي جۇمىستار جۇرگىزىلۋدە؟
استانا قالاسى تسيفرلاندىرۋ جانە مەملەكەتتىك قىزمەتتەر باسقارماسىنىڭ باسشىسى مەيرامبەك اشىربەكوۆ الدىمەن قالاداعى بەينەباقىلاۋ جۇيەلەرىنىڭ جاعدايىنا توقتالدى. سەبەبى قاۋىپسىزدىكتى قامتاماسىز ەتۋ – ەلوردانىڭ ءساتتى دامۋىنىڭ كەپىلى. سوندىقتان قالا اكىمدىگى بۇعان ەرەكشە كوڭىل بولەدى.
– بۇگىندە ەلوردادا ءارتۇرلى ورىنداردا ورناتىلعان 27 659 بەينەكامەرا بار. سونىڭ ارقاسىندا قىلمىس پەن اكىمشىلىك قۇقىقبۇزۋشىلىق دەڭگەيى تومەندەپ, جول-كولىك وقيعالارى كەزىندە بولاتىن ادام ءولىمى 48 پايىزعا ازايدى. بارلىق كامەرالار استانا قالالىق پوليتسيا دەپارتامەنتىنىڭ جەدەل باسقارۋ ورتالىعىنا شىعارىلعانىن ايتا كەتۋ كەرەك. قوعامدىق قاۋىپسىزدىك دەڭگەيى بويىنشا كورسەتكىشتەردى سينگاپۋر, دۋباي, ابۋ-دابي, لوندون سياقتى قالالارمەن بىردەي ەتىپ ارتتىرۋ كوزدەلىپ وتىر, – دەيدى باسقارما باسشىسى.
تسيفرلاندىرۋدىڭ تاعى ءبىر ماڭىزدى سالاسى – پروتسەستەردى اۆتوماتتاندىرۋ. زاماناۋي الەمدە ۇيىمداردىڭ ءبارى ءوز سالاسىندا وزىق بولۋ ءۇشىن بىرتىندەپ تسيفرلىق ترانسفورماتسياعا ۇمتىلۋدا. پروتسەستەردى اۆتوماتتاندىرۋ كومپانيالاردىڭ تەز وزگەرىپ جاتقان نارىققا بەيىمدەلۋىنە جانە باسەكەگە قابىلەتتى بولىپ قالۋىنا ىقپال ەتەدى. بۇگىندە ەلوردادا اكىمدىكتىڭ قۇرىلىمدىق بولىمشەلەرىنىڭ 100 قىزمەتىن اۆتوماتتاندىرۋ بويىنشا جۇمىستار جۇرگىزىلۋدە. 2027 جىلعا دەيىن تۋريزم, ءبىلىم بەرۋ, سپورت, جەر قاتىناستارى, الەۋمەتتىك قورعاۋ جانە ينۆەستيتسيا سالاسىندا 500-دەن استام قىزمەتتى اۆتوماتتاندىرۋ جوسپارلانۋدا.
«Smart Astana» ءموبيلدى قوسىمشا بويىنشا 60-تان استام سەرۆيس جۇمىس ىستەپ تۇر. ال قوسىمشانى جۇكتەپ الۋشىلار سانى 300 مىڭ ادامنان استى
«Smart Astana» ءموبيلدى قوسىمشاسىندا شۇعىل قىزمەتتەردەن پۋش-حابارلاما الۋ, سۋ تۇتىنۋ كورسەتكىشتەرىن بەرۋ, اۆتوبۋستار قوزعالىسىن باقىلاۋ, سونىمەن قاتار وقۋ جانە سپورت مەكەمەلەرى مەن ۇيىمدارى جانە باسقا دا سەرۆيستەر تۋرالى انىقتامالىق اقپارات الۋ قولجەتىمدى. قازىرگى تاڭدا قالادا وسى قوسىمشا بويىنشا 60-تان استام سەرۆيس جۇمىس ىستەپ تۇر. ال قوسىمشانى جۇكتەپ الۋشىلار سانى 300 مىڭ ادامنان استى. بۇل رەتتە ءبىر ايداعى بەلسەندى قولدانۋشىلار سانى 8-10 مىڭ ادامدى قۇرايدى.
– استانادا سونىمەن قاتار بۇۇ تۇراقتى دامۋ ماقساتتارى اياسىندا بەلسەندى جۇمىستار جۇرگىزىلەدى. ەلوردا ءۇشىن سونداي ماڭىزدى قادامداردىڭ ءبىرى – حالىقارالىق باعا الۋ. ماسەلەن, بيىل استانا Smart21 community of 2023 Intelligent Community Forum ەڭ اقىلدى قالالاردىڭ رەيتينگىندە 21 ۇزدىك قالالار قاتارىنا كىردى. سونىمەن بىرگە Smart Centres Index اقىلدى قالالار رەيتينگىندە ماسكەۋ, ۆارشاۆا جانە ءريمدى باسىپ وزىپ, 64-ورىنعا تۇراقتادى. زەرتتەۋ توبى قالاداعى يننوۆاتسيانى قولداۋ دەڭگەيىن جوعارى باعالاپ, وعان 650 بالل بەردى, بۇل بالل توكيو, سەۋل, پەكين, سيەتلعا قاراعاندا جوعارى. سوعان قوسا بيىل «قوعامداستىقتاردى تۇراقتى دامىتۋ – قالالىق قىزمەتتەر مەن ءومىر ساپاسىنىڭ كورسەتكىشى» ISO 37120 ستاندارتىن ەنگىزۋ بويىنشا جۇمىستار باستالدى. ءبىر ايتا كەتەرلىگى, مۇنداي حالىقارالىق ستاندارتتار قالالاردى تۇراقتى دامىتۋعا باعىتتالعان جانە ءومىر ساپاسىن, باسقارۋ تيىمدىلىگىن, قالالاردىڭ دامۋى مەن تۇراقتىلىق دەڭگەيىن انىقتايدى, – دەپ اتاپ ءوتتى مەيرامبەك اشىربەكوۆ.
بيىل استانا Smart21 community of 2023 Intelligent Community Forum ەڭ اقىلدى قالالاردىڭ رەيتينگىندە 21 ۇزدىك قالالار قاتارىنا كىردى
ەلوردانى تسيفرلاندىرۋ بويىنشا يننوۆاتسيالىق ەكوجۇيەنى دامىتۋدىڭ دا ماڭىزى زور. استانادا يننوۆاتسيالىق دامۋعا قولايلى جاعداي جاسالىپ, كاسىپكەرلەر مەن ستارتاپتارعا قاتتى قولداۋ كورسەتىلەدى. سونىمەن قوسا قالادا ءتۇرلى ءىت-ستارتاپ بويىنشا جاستاردىڭ ءوزارا پىكىر مەن يدەيا الماسىپ, ىنتىماقتاستىقتىڭ جاڭا مۇمكىندىكتەرىنە جول اشاتىن ءىس-شارالار مەن فورۋمدار
ۇيىمداستىرىلادى. جىل سايىن عىلىم مەن تەحنولوگيالارعا, ينجەنەريا مەن ماتەماتيكاعا قىزىعۋشىلىعى بار وقۋشىلار مەن ستۋدەنتتەر ءۇشىن STEM-وليمپيادالار وتكىزىلەدى. بۇل بولاشاق ءىت ماماندارىن قالىپتاستىرۋعا سەپتىك ەتەدى.
iKOMEK109 ورتالىعى – اقىلدى قالانىڭ اجىراماس بولىگىنە اينالعان قىزمەت, مۇندا قالا تۇرعىندارىنىڭ قاۋىپسىزدىگى مەن جايلىلىعىن قامتاماسىز ەتۋگە ارنالعان قىزمەتتەردىڭ كەڭ اۋقىمدى سپەكترى بار. اتالعان قالالىق ورتالىق اشىلىپ, جۇمىس ىستەگەلى بەرگى كەزەڭدە حالىقتان 11 ملن-نان استام حابارلاما, ءوتىنىم كەلىپ تۇسكەن. سونىڭ ىشىندە 81 پايىزى بويىنشا ماسەلەلەر «ءبىرىنشى قوڭىراۋ» كەزىندە-اق قارالىپ, جۇزەگە اسىرىلىپ جاتادى. وتكەن جىلى 13517 قۇقىقبۇزۋشىلىق انىقتالعان. بيىل جىل باسىنان بەرى بۇل ستاتيستيكا 14 مىڭعا دەيىن ارتقان.
iQala قىزمەتى بولسا, بىرىڭعاي تەرەزە قاعيداتى بويىنشا تۇرعىن ءۇي-كوممۋنالدىق سەكتور ۇيىمدارىنىڭ قىزمەتتەرىن ۇسىنادى. استانالىق iQala – ەلىمىزدەگى بىرەگەي قىزمەت ءتۇرى. ونى ۇلگى ەتىپ, ەلىمىزدىڭ وڭىرلەرىندە «كوممۋنالدىق حقكو» اشىلا باستادى. ورتالىق جۇمىسى باستالعاننان بەرگى ۋاقىتتا 150 ءتۇرلى قىزمەت جۇزەگە اسىرىلىپ, 550 مىڭنان استام قىزمەت كورسەتىلگەن.
