«استانا اقشامى» گازەتىندە جاريالانعان وتباسىلىق قۇندىلىقتار تۋرالى ماقالالار مەن وسى تاقىرىپتى وربىتكەن مامانداردىڭ سۇحباتىن وقىپ وتىرامىن. جاريالانىمداردىڭ ءبارى وتباسىلىق قۇندىلىقتاردىڭ كۇيرەپ بارا جاتقانىن قال-قادىرىنشە جەتكىزە ايتىپ ءجۇر. دەگەنمەن وسى ۇردىسكە قارسى تۇرار قايران بار ما دەگەن سۇراق كوپشىلىگىمىزدى مازالايدى.
جالپى, ادامداردىڭ قارىم-قاتىناسى – كۇردەلى نارسە. ءومىردىڭ تۇيتكىلدەرىنىڭ بارىنە ورتاق ەرەجە بولا بەرمەيدى. تاڭداۋ ەركىندىگىن تاعى ەسكەرۋىمىز كەرەك. بىراق قالىپتاسقان قاعيداتتارعا, ءبىلىم مەن ءومىردىڭ تاجىريبەسىنە سۇيەنە وتىرىپ, مامان رەتىندە ءوز ويىمدى بىلدىرگىم كەلەدى.
ەرلى-زايىپتى اجىراسقاندا «ءدام-تۇزىمىز جاراسپادى» دەيدى. «ءدام-تۇزدىڭ» ىشىندە نە جوق دەيسىز. الدانعان ارمان, ۇزىلگەن ءۇمىت, سۋىعان كوڭىل… وعان ەكى بۇيىردەن قىسقان جوقشىلىقتى قوسىڭىز. شاڭىراق شايقالعاندا ايەل مەن ەركەكتىڭ ەكەۋى بىردەي قاتتى كۇيزەلىستى باستان كەشىرەدى. ەكەۋىنىڭ دە قالىپتاسقان تىرلىگى ءبىر ساتتە وزگەرىپ, بۇلىڭعىر بولاشاعى ۇرەيلەندىرىپ, جالعىزدىقتى جان كۇيىمەن شىن سەزىنەدى.
وسىعان دەيىنگى ۇرىس-جانجال, توگىلگەن كوز جاسىنان جۇرەكتىڭ كەگى باسىلماي, ءبىر-ءبىرىن كىنالاپ, ارازدىعى ارتا بەرەدى. جۇيكەلەرى جۇقارىپ, كۇيزەلىسكە تۇسەدى. ايدىڭ اشىق كۇنىندە اداسقان ەرەسەكتەردىڭ اۋىر كۇناسىن ارقالاعان بالالارى تۋرالى نە دەيمىز؟! ولاردىڭ جاس پسيحيكاسىندا وسى كەزەڭ ماڭگىگە تاڭبالانىپ, ءومىر بويى وزىمەن بىرگە الىپ جۇرەتىن اۋىر جۇگى بولىپ قالادى. ويتكەنى كوز الدىندا وتكەن قورقىنىش ءومىر بويىنا بوساتپايدى. بىراق بۇگىنگى اڭگىمەمىز اجىراسۋدىڭ سالدارى ەمەس. اجىراسپاۋعا جەتكىزبەيتىن امالداردى قاراستىرۋعا تىرىسامىز.
ءاربىر احاج-دا دارىگەر مەن پسيحولوگتىڭ كابينەتى كەرەك
ەكى جاس تابىسىپ, تاڭداۋىن جاساعاندا نەكەسىن زاڭداستىرۋ ءۇشىن تۇرعىلىقتى جەرىندەگى احاج-عا ارىز تاستاسا بولدى. ايعا جەتپەي كوك كۋالىك قولعا تيەدى. وسى ورتادا اتا-انالارى تويدىڭ قامىمەن باسى قاتىپ, جاستاردان تۇرمىستىڭ يىرىمىنە بويلاي الاسىڭدار ما دەپ سۇراپ جاتقان ەشكىم بولمادى.
وسىدان وتىز جىل بۇرىن-اق نەكەگە تۇراتىندار ەرلى-زايىپتىلاردى فيزيولوگياسىنا قاتىستى دارىگەر كەڭەسىن تىڭداپ, جاس وتباسىنىڭ مەكتەبىنەن وتۋگە مىندەتتەيتىن. بۇگىندە مۇنداي جاقسى ءداستۇردى ەشكىم ەلەمەيدى. بەدەۋلىك بەلەڭ العان زاماندا ەكى جاستان نەكەگە تۇرار الدىندا دەنساۋلىعى تۋرالى انىقتامانى تالاپ ەتسە دە ارتىقتىعى جوق. مۇنىڭ ءبارى فيزيولوگيا تۇرعىسىندا. ال ادام جانىنىڭ جايىنا كەلسەك, وندا ءبىرىنشى كەزەكتە پسيحولوگقا جۇگىنىپ, اقىل سۇراۋدىڭ قاجەتتىگى بار.
ماماندار جاستاردىڭ مىنەزدەرىنىڭ سايكەستىگىن انىقتايتىن ءتۇرلى پسيحوتەست, ترەنينگتەر جۇرگىزە الادى. سول ارقىلى ەكى جاس وزدەرىنىڭ جاقىن بولاشاقتاعى مۇمكىندىگىن ءبىلىپ, مەنتاليتەتىن تۇسىنەر ەدى. نەكەگە تۇرار الدىندا پسيحولوگيالىق تەستتەن ءوتىپ, ساۋالدارعا جاۋاپ بەرۋ ارقىلى تۇپكى ويىن, قۇندىلىقتارىن, اسىل مۇراتىن باعامدايتىن بولادى. ەگەر ەكەۋىنىڭ دە ۇستانىمدارى, تاربيەسى ءبىر جەردەن شىعىپ جاتسا, وندا الداعى ومىرىندە كوپ بەلەستەن قينالماي وتە الادى. ويتكەنى ولار ءبىر-بىرىنەن نە كۇتەتىنىن بىلەدى. پسيحولوگيانىڭ تەحنولوگياسى ارقىلى مەنتاليتەتىن تۇسىنەدى, سۇيىكتىسى ءۇشىن وزگەرگىسى كەلە مە, جوق پا؟ جاقسىسى, ويلانۋعا ۋاقىتى بار.
«وبحودنوي» تولتىرۋعا اسىقپاڭىزدار
قىزمەتتەن كەتىپ جاتساڭىز نە ءبىر وقۋ ورنىن بىتىرسەڭىز, «وبحودنوي پاراعىن» وتكىزەتىن ءداستۇر بار عوي. اجىراسۋعا كەلگەندەردى دە «وبحودنوي» تولتىرىپ, ءبىر شەشىمگە كەلمەس بۇرىن نەگە تاعى ءبىر ويلاندىرماسقا؟ وسىنداي تاجىريبە پسيحولوگيادا بار. ول ءۇشىن پسيحولوگ اجىراسۋعا بەل بايلاعان بەس-التى جۇپتى قاتار قابىلدايدى. ارقايسىسىنان قالاي تابىسىپ, ايىرىلىسۋىنا نە سەبەپ بولعانىن سۇرايدى. ولار اڭگىمەلەپ وتىرعاندا تىڭداپ وتىرعاندارى ىشتەرىنەن «تۋ, وسىنداي دا نارسەگە اجىراسا ما ەكەن؟» دەپ ويلاۋى زاڭدى. ويتكەنى ادامدار ەگويست قوي, وزدەرىنىڭ باسىنداعى جاعداي بارىنەن قيىن ءارى كۇردەلى دەپ ويلايدى. جەمە-جەمگە كەلگەندە كوڭىلى سۋىنا سەبەپ بولعان بولماشى جايتتاردى انىقتايدى. وسىلايشا, ءوز قاتەلەرىن ءتۇسىنىپ, ارىزدارىن قايتىپ الىپ جاتادى. دەمەك, تىعىرىققا تىرەلگەندەردىڭ دە تۇيىقتان شىعاتىن جولى ارقاشاندا تابىلادى.
ايقىن دۇيسەمباەۆ, پسيحولوگ
