استانا قالاسىنىڭ مەملەكەتتىك مۇراعاتى مەكەمەسى كەڭەس اسكەرىنىڭ اۋعانستان سوعىسىنان شىققان كۇنىنە ارنالعان تاعىلىمدى شارا وتكىزدى.
1979-1989 جىلدار ارالىعىندا اۋعانستان جەرىندە اسكەري بورىشىن وتەپ, سوعىس زاردابىن باستان كەشكەن جاۋىنگەرلەرگە قۇرمەت ءبىلدىرۋ ماقساتىندا ۇيىمداستىرىلعان شاراعا مەملەكەتتىك جانە قوعامدىق ۇيىمدار وكىلدەرى, ستۋدەنتتەر مەن مەكتەپ وقۋشىلارى قاتىستى. شارانى جۇرگىزگەن استانا قالاسىنىڭ مەملەكەتتىك مۇراعاتى مەكەمەسىنىڭ ديرەكتورى بالقيا بايماعانبەتوۆا الدىمەن اۋعانستان سوعىسى جايىندا بايانداپ بەردى. سوعىستا قازا بولعان جاۋىنگەردىڭ اناسى نينا حالياۆكا, جاۋىنگەر-ينتەرناتسيوناليست, بەيبىت ومىردە قىزمەت بابىندا ەرلىكپەن قازا بولعان جانايدار جيرەنتاەۆتىڭ جۇبايى نازكەن مۇسىرەپجانقىزى, گەنەرال-مايور مارات نۇعىمانوۆ, استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەسىگىنىڭ توراعاسى سەرىك كەنجەبەكوۆ, قر ۇلتتىق ءارحيۆى رەسپۋبليكالىق مەكەمەسىنىڭ ديرەكتورى, جاۋىنگەر-ينتەرناتسيوناليست جانگەلدى ماحاشوۆ جاستار الدىندا ءسوز سويلەپ, اۋعانستان سوعىسىنىڭ تۋرالى, مايدانداس جاۋىنگەرلەردىڭ ەرلىگى جايىندا اڭگىمەلەدى.
كەزدەسۋ بارىسىندا مادەنيەت قايراتكەرى عاليا رامازانوۆا, №64 مەكتەپتىڭ ونەرپاز وقۋشىلارى ءان شىرقاپ, جينالعان قاۋىمنىڭ كوڭىلىن كوتەردى. شارا سوڭىندا قاتىسۋشىلار مەكەمە ىشىندە اشىلعان استانانىڭ 20 جىلدىعىنا ارنالعان كورمەنى تاماشالادى.
