بۇگىنگى قاربالاس تىرشىلىكتە كەيدە ءوز ۇيىندە اسىڭدى اسىقپاي وتىرىپ ىشۋگە ۋاقىت تابىلا بەرمەيدى. ۇيقىدان ويانعان سوڭ اپىل-عۇپىل ىشە سالىپ, شىعا بەرەمىز. ءتىپتى, ورازامىزدى اشپاستان جۇرە بەرەتىن كەزدەرىمىز كوپ. تۇسكە قاراي قارنىن شۇرقىراي باستاپ, سونىڭ قاجەتتىلىگىن وتەيتىن جەر ىزدەيسىڭ. سونداي كەزدە جاقىنداۋ جەردەگى ارزانداۋ اسحاناعا نەمەسە قالتاڭداعى قارجىن جەتكىلىكتى بولسا, ءدامحانا, مەيرامحاناعا باس سۇعاسىڭ. قاتتى اسىعىپ تۇرساڭ, كوشەدە كەزىككەن جەڭىل-جەلپى تاعام ازىرلەيتىن ورىننان بىردەڭە الىپ, جەي سالاسىن. ول تاعامنىڭ ساپاسى تۋرالى ويلامايسىڭ دا. قازەكەمنىڭ «اۋرۋ – استان» دەگەن ءسوزى دە ەسىڭنەن شىعىپ كەتەدى. بار ماقساتىن – ىشكە ەل قوندىرۋ. كەيىننەن اناۋ نەمەسە مىناۋ جەرىن سىرقىراعاندا مىنا ناۋقاس قايدان كەلدى دەپ, باس قاتىراسىڭ. ونداي ۋاقىتتا عانا «نە جەپ قويىپ ەدىم؟» دەگەن سۇراقپەن ءوزىڭدى مازالايتىنىن بار.
مۇنداي ويعا بىزگە ەلوردادا قوعامدىق تاماقتانۋ سالاسىندا قازىردە قالىپتاسىپ وتىرعان جاعداي جەتەلەپ وتىر. رەسمي مالىمەتتەرگە جۇگىنسەك, بۇگىندەرى باس قالادا 140-تان استام وسىنداي ورىندار زاڭسىز جۇمىس ىستەپ تۇر. كوبىنەسە تاماق ساتاتىن كوشەدەگى دۇڭگەرشەكتەر يەلەرى سايكەس مەكەمەلەردىڭ رۇقسات قۇجاتتارىن رەتتەپ الماي, پايدا تابۋعا كىرىسكەن. سالىقتىق جانە كوشى-قون زاڭنامالارىن ساقتاماۋمەن قوسا, تازالىق تالاپتارىن دا ەسكەرە بەرمەيتىن سولار. قاراپايىم تۇتىنۋشىدا ولاردى تەكسەرۋ قايدان بولسىن, قارىن تويدىرعانىنا ءماز.
ارينە, كەشەگى وتكەن زاماندا «ارالاپ تالاي جەردىڭ ءدامىن تاتقان» ۇكىلى ىبىرايدىڭ تۇسىنە دە كىرمەگەن, نەبىر سىلەكەيدى اعىزاتىن ءتۇرلى تاعامدار – كاۋاپ, گريلل دەيسىز بە, اسىرەسە جاستار قىزىعاتىن سامسا, دونەر دەگەندەر كوشەدەگى دۇڭگەرشەكتەردە سامساپ تۇرىپ, تابەتىندى اشادى. ولارعا ءتۇبى ەۋروپالىق فاستفۋدتى قوسىڭىز. جانە كوشەدەگى بۇل تاعامداردىڭ باعاسى ءدامحانا, مەيرامحانالارداعى باعاعا قاراعاندا 3-4 ەسە ارزان. الايدا, سانى كوپتىگىنە قاراماستان ساپاسى ءتيىستى دەڭگەيدە بولمايتىن جاعدايلار ءجيى كەزدەسەدى.
ونى «ادىلەت» تۇتىنۋشىلار قۇقىعىن قورعاۋ قوعامدىق بىرلەستىگىنىڭ توراعاسى قابىكەن زاكاريانوۆ تا راستايدى. «وتكەن جىلى بىزگە 4 مىڭنان استام ارىز-شاعىم كەلىپ ءتۇستى. سولاردىڭ كوبىسى ساۋدا جانە قوعامدىق تاماقتانۋ ورىندارىنىڭ جۇمىسىنا قاتىستى بولدى» دەدى ول جاقىندا ۇيىم جۇمىسى جونىندە اڭگىمەلەسكەنىمىزدە.
بيلىك ورگاندارى دا قاراپ وتىرعان جوق. قالا اۋداندارىنىڭ اكىمدىكتەرى جانىنان قۇرىلعان جەدەل توپتار رۇقسات بەرىلمەگەن جەرلەردە ساۋدانى توقتاتۋ جۇمىستارىن جۇرگىزۋدە.
قالالىق تۇتىنۋشىلاردىڭ قۇقىقتارىن قورعاۋ دەپارتامەنتى كاسىپكەرلىك باسقارماسىمەن جانە كاسىپكەرلىك پالاتاسىنىڭ جەرگىلىكتى فيليالىمەن بىرلەسىپ, جەكە كاسىپكەرلەر مەن جەكە تۇلعالار اراسىندا تۇسىندىرمە جۇمىستارىن جۇرگىزدى. انىعىراق ايتساق, ۇساق بولشەكتىك ساۋدا ورىندارى مەن جىلدام قىزمەت كورسەتەتىن تاماقتانۋ نىساندارىندا استى دايارلاماي تاماق ونىمدەرىن ساتۋ جونىندەگى جادىنامالاردى تاراتتى.
ارينە, سول جادىنامالاردى العان قوعامدىق تاماقتانۋ ورىندارىنىڭ يەلەرى وندا كورسەتىلگەندى ەسكەرەدى دەپ سەنەمىز. ال, ءبىز ءوز تاراپىمىزدان دۇڭگەرشەكتەردىڭ جانىنان ءوتىپ بارا جاتقان قاراپايىم تۇتىنۋشىنىڭ كوزىنە بىردەن تۇسەتىن ولقىلىقتى دا ايتا كەتسەك دەيمىز. «جاننۇر» ساۋدا ۇيىنە قاراما-قارسى دۇڭگەرشەك ورنالاسقان. ونىڭ جوعارعى جاعىندا «تاۋىقتىڭ اياعى» دەگەن جازۋدىڭ تۇرعانىنا ءبىراز ۋاقىت بولدى. سونداعى تاۋىقتىڭ اياعى دەگەندى تاۋىقتىڭ سيراعى دەپ وزگەرتكەن ءجون بىزدىڭشە. ارينە, ەڭ باستىسى قوعامدىق تاماقتانۋ ورىندارىنىڭ تازالىق تالاپتارىن ساقتاۋى, تۇتىنۋشىلارعا ساپالى تاعامداردى ۇسىنۋى دەر ەدىك.
امانعالي قالجانوۆ
