دارىگەردىڭ ايلىعى شايلىعىنا جەتە مە؟
استانا قالاسىنىڭ قوعامدىق كەڭەس مۇشەلەرى ەلوردانىڭ ەكى بىردەي دەنساۋلىق مەكەمەسىندە بولىپ, ونداعى قىزمەت كورسەتۋدىڭ ساپاسىمەن تانىستى. سونىمەن قاتار, دارىگەرلەردىڭ جالاقىسى مەن بىلىكتى مامانداردىڭ تاپشىلىعى ماسەلەسى قوزعالدى.
الدىمەن سول جاعالاۋدىڭ تۇرعىندارىنا قىزمەت كورسەتەتىن №9 ەمحاناعا ات باسىن بۇردى.
«ەمحانا 2015 جىلى اشىلدى. بارلىق تالاپتارعا ساي جابدىقتالعان. نەگىزىندە, 35 مىڭ ادامعا قىزمەت كورسەتۋىمىز كەرەك, الايدا قازىرگى ۋاقىتتا ەمحاناعا 71500 ادام تىركەلگەن. بىزدە 12 ءبولىم, ونىڭ ىشىندە
دياگنوستيكالىق قىزمەت كورسەتۋ, حيرۋرگيا, پسيحولوگيالىق جانە الەۋمەتتىك كومەك بەرۋ,
3 جالپى تاجىريبەلىك, 1 پەدياتر ءبولىمى مەن كۇندىزگى ستاتسيونار جۇمىس ىستەيدى» دەيدى مەكەمەنىڭ باس دارىگەرى ايگۇل جاقسىلىقوۆا.
ەمحانا قىزمەتكەرلەرىنىڭ باستى ماسەلەسىنىڭ ءبىرى – جالاقىنىڭ ازدىعى. باس دارىگەردىڭ ايتۋىنشا, مەكەمەگە ءتىر-
كەلگەن ءار ادام سانىنا بيۋدجەتتەن 897 تەڭگە بولىنەدى ەكەن.
«مۇنىڭ 85 پايىزى قىزمەتكەرلەردىڭ جالاقىسىنا جۇمسالادى. دارىگەرلەردىڭ ورتاشا ايلىعى – 45 مىڭ تەڭگە. بىراق قولدان كەلگەنشە جارتى ستاۆكادان قوسىپ بەرىپ, تاپشى ماماندارعا ۇستەمە قويىپ, ولاردىڭ كەتىپ قالماۋى ءۇشىن بارىنشا تىرىسامىز» دەيدى ول.
بەلگىلى بولعانداي, ەلوردا ەمحانالارىندا نورماتيۆتىك ىنتالاندىرۋ كومپونەنتى قاراستىرىلماعان, سول سەبەپتى ولاردىڭ جالاقىسى ايماقتاعى دارىگەرلەردىڭ ەڭبەكاقىلارىنان تومەن.
قوعامدىق كەڭەس مۇشەسى مارات مۇستافين بۇل ماسەلەنى رەسپۋبليكالىق دەڭگەيدە كوتەرۋ كەرەكتىگىن ايتتى. باس دارىگەردىڭ پىكىرىنشە, قالا ەمحانالارىنا بولىنەتىن قارجى كولەمى ادام باسىنا 1200 تەڭگەدەن بولسا, مۇنداي ماسەلە تۋىندامايتىنىن العا تارتتى.
استانا قالاسىندا ەمحانالاردان بولەك, «سالاۋاتتى استانا» وتباسىلىق-دارىگەرلىك امبۋلاتوريا جۇمىس ءىستەيدى. «ەرتەگى الەمى» تۇرعىن ءۇي كەشەنىندە ورنالاسقان جەكەمەنشىك مەكەمە مەملەكەتتىك تاپسىرىستى ورىندايدى. شاعىن امبۋلاتوريا 9 مىڭ تۇرعىنعا لايىقتالعان, ونىڭ 3,5 مىڭى – بالالار. دارىگەرلەردىڭ سانى – نەبارى 6.
«مۇندا كۇندىزگى ستاتسيونار, ەكپە سالۋ كابينەتى بار. ناۋقاستاردى قابىلدايتىن تەراپەۆت, پەدياتر, گينەكولوگ جۇمىس ىستەيدى. تۇرعىندارعا وتە ىڭعايلى جەردە ورنالاسقان. بۇل جوبا «100 ناقتى قادام» باعدارلاماسى اياسىندا جۇزەگە استى. مۇندا قىزمەت تەگىن كورسەتىلەدى» دەيدى «سالاۋاتتى استانا» جشس ديرەكتورى كۇلجان اناسوۆا. ونىڭ ايتۋىنشا, مەملەكەتتىك تاپسىرىس اياسىندا ءار ازاماتقا بيۋدجەت ەسەبىنەن 800 تەڭگەدەي بولىنەدى.
«ونىڭ 48 پايىزى جالاقىعا جۇمسالسا, 27 پايىزى دياگنوستيكالىق تەكسەرۋلەر جۇرگىزۋ ءۇشىن باسقا مەكەمەلەرگە تولەنەدى. ءبىر بولىگى مەكەمەنىڭ اي سايىنعى جالعا الۋ قۇنىنا جۇمسالادى. شىنىن ايتقاندا, 800 تەڭگەنى جەتكىزۋ قيىن. تىم بولماسا مەملەكەتتەن ادام باسىنا 1500 تەڭگەدەن بولىنسە, ءتاۋىر جالاقى تولەۋگە بولاتىن ەدى» دەيدى كۇلجان اناسوۆا.
بۇل ماسەلەلەردىڭ بارلىعى ەرتەڭ «تۇرعىندارعا مەديتسينالىق قىزمەت كورسەتۋدىڭ جاي-كۇيى جانە ەلوردانىڭ دەنساۋلىق ساقتاۋ جۇيەسىن دامىتۋ» ماسەلەسىنە ارنالعان قوعامدىق تىڭداۋ وتىرىسىندا كەڭىنەن تالقىلاناتىن بولدى.
گۇلميرا ايماعانبەت