ەلورداداعى Tse گالەرەياسىندا قالا اكىمىنىڭ ورىنباسارى ەرمەك امانشاەۆ ءوز قاتارىنان وزا شاۋىپ, كوزگە كورىنگەن ءبىر توپ استانالىق دارىندى جاستارمەن ەركىن فورماتتا كەزدەسۋ وتكىزدى.
بۇل شاراعا جاس كومپوزيتورلار, سۋرەتشىلەر, اقىن-جازۋشىلار, ارت-مەنەدجەرلەر, ستسەناريستەر, پروديۋسەرلەر, ديزاينەرلەر, قىسقاسى شىعارماشىلىق جاستار كەلدى. الدىمەن اكىم ورىنباسارى اتالعان گالەرەيادا ۇيىمداستىرىلعان دارىندى قىلقالام شەبەرلەرى عالىم مادانوۆ پەن زاۋرەش تەرەكبايدىڭ «CoolAge» اتتى كورمەسىن ارالاپ كوردى.
– مەن سىزدەرمەن ەركىن تۇردە پىكىر الماسۋعا كەلدىم. ويتكەنى بابالارىمىز «اقىل – جاستان, اسىل – تاستان» شىعادى دەپ بەكەر ايتپاعان. جىل سايىن شاھارعا 50 مىڭعا جۋىق ادام كەلەدى. ونىڭ سەبەبى – ەلوردانىڭ ءومىر ءسۇرۋ دەڭگەيى مەن مۇمكىندىكتەرىنىڭ جوعارى بولۋى. جاڭا جۇمىس ورىندارى دا كوپ. الايدا قالاعا رۋحاني دەم بەرەتىن شىعارماشىلىق ورتانىڭ ورنى بولەك. سىزدەر سەكىلدى تالانتتى جاستارمەن جۇزدەسكەندە وزىق يدەيالار پايدا بولىپ, ونى جۇزەگە اسىرۋعا مۇمكىندىك تۋادى. مىسالى, «جاۋجۇرەك مىڭ بالا» ءفيلمى وسىنداي باسقوسۋدان باستاۋ العان. سوندىقتان وزدەرىڭىز ىسكە اسىرسام دەگەن جوبالارىڭىزدى ايتىڭىزدار, ءبىز قاراستىرۋعا دايىنبىز, – دەدى ە.امانشاەۆ.
كەزدەسۋ بارىسىندا جاستار تاراپىنان ءتۇرلى يدەيالار ايتىلدى. ماسەلەن, «استانا قانداي سۋىق بولسا, ادامدارى دا سونداي سۋىق» دەگەن تۇسىنىكتى جويۋ ءۇشىن ادامداردىڭ ءبىر-بىرىمەن تانىسۋىنا باعىتتالعان جوبالار ءسوز بولدى. اسىرەسە, شاھارداعى كەز كەلگەن عيماراتتىڭ, كوپىردىڭ, ەسكەرتكىشتىڭ, تاعى باسقا وسىنداي ايتارى بار نىسانداردىڭ تاريحى, اۆتورى, قانداي ۇلگىدە, نە ماتەريالدان سالىندى دەگەن تولىق اقپارات الۋعا بولاتىن ءموبيلدى قوسىمشانى ىسكە اسىرۋعا بولاتىندىعىن جەتكىزدى.
شارا سوڭىندا ەلوردا اكىمىنىڭ ورىنباسارى جاستار ايتقان بىرنەشە جوبانى قۇپ الىپ, ولاردى بىرگە قاراستىرايىق دەگەن ۇسىنىس ايتتى.
ازامات ەسەنجول
