كەشە «استانا تاڭداۋى-2014» بايقاۋىنا قاتىسۋشىلارعا داۋىس بەرۋ رەسمي تۇردە اياقتالدى.
ەندى بەرىلگەن داۋىستاردىڭ سانى ەسەپتەلەدى. ال ونىڭ قورىتىندىسى بويىنشا ۇزدىك دەپ تانىلعان مامانداردىڭ, اتاپ ايتقاندا, پەداگوگتىڭ, قوعامدىق كولىك جۇرگىزۋشىسىنىڭ, ۋچاسكەلىك پوليتسيا ينسپەكتورىنىڭ, دارىگەردىڭ, ەنەرگەتيكتىڭ, جول جوندەۋشىنىڭ جانە قۇرىلىسشىنىڭ ەسىمى جاريالانادى. بۇل تۋرالى astana.kz سايتىنا «بايتەرەك» حالىقارالىق مەديا ورتالىعىنان حابارلادى.
بيىلعى بايقاۋعا قاتىسۋعا وتىنىمدەر ءساۋىر ايىنىڭ باسىنان مامىر ايىنىڭ سوڭىنا دەيىن قابىلداندى. جالپى بايقاۋعا 250 ءوتىنىم كەلىپ ءتۇستى, سونىڭ ىشىندە 195 ۇمىتكەر ىرىكتەلىپ, داۋىس بەرۋ كەزەڭىنە ءوتتى.
بايقاۋ ەرەجەلەرىنە سايكەس, 20 كۇن بويى ءار ادام الەۋمەتتىك سالاداعى ۇزدىك مامانعا ءوزىنىڭ داۋىسىن بەرۋ مۇمكىندىگىنە يە بولدى.
بايقاۋدا ۇسىنىلعان ساناتتاردىڭ ىشىندە مۇعالىمدەر سانى كوپ بولدى – 65, ەكىنشى ورىندا ەنەرگەتيكتەر – 39 ۇمىتكەر, ءۇشىنشى ورىندا دارىگەرلەر – 31 ۇمىتكەر. قۇرىلىسشىلاردان 25 ادام, 14 جۇرگىزۋشى, 13 ۋچاسكەلىك پوليتسيا ينسپەكتورى, سونداي-اق, 8 جول جوندەۋشى بايقاۋعا قاتىسۋعا نيەت ءبىلدىردى.
«استانا تاڭداۋى» بايقاۋىندا توپ جارعان جەڭىمپازدار استانا قالاسى اكىمىنىڭ كۋبوگى جانە ديپلومىمەن ماراپاتتالىپ, حالىقتىڭ تانىمىنا يە بولادى. سونداي-اق, رەسپۋبليكالىق ارنالاردان «استانا تاڭداۋى-2014» بايقاۋىنىڭ جۇلدەگەرلەرى تۋرالى شاعىن فيلمدەر كورسەتىلەدى.
