ساكەن ءجۇنىسوۆ – ونەردە دە, ادەبيەتتە دە جارقىن ءىز قالدىرعان قالامگەر. بيىل تۋعانىنا سەكسەن جىل تولاتىن جازۋشىنىڭ مەرەيتويىنا وراي استانا قالاسى تىلدەردى دامىتۋ باسقارماسى ىرگەلى شارا ۇيىمداستىردى.
ق.قۋانىشباەۆ اتىنداعى قازاق دراما تەاترىندا وتكەن «ءتىل ونەرى جانە تۇلعا» اتتى كوشە مەرەكەسىنە پارلامەنت سەناتىنىڭ دەپۋتاتى جابال ەرعاليەۆ, اقىن سەرىك تۇرعىنبەكۇلى, حالىق ءارتىسى قايرات بايبوسىنوۆ, ءداستۇرلى ءانشى ەرلان رىسقالي جانە باسقا دا زيالى قاۋىم قاتىستى. ولار باسقوسۋدا ەل ىشىندە سەرى اتانعان قالامگەردىڭ بىرەگەي بولمىسى, شىعارماشىلىعى, ونەرى جايىندا ەستەلىكتەر ايتىپ, اڭگىمە قوزعادى. جيىنعا س.ءجۇنىسوۆتىڭ ۇلى – جانبوتا, نەمەرەلەرى – ءامىر مەن ءاليحان جانە قارىنداسى روزا قوناق بولدى.
مەرەكە بارىسىندا كوپشىلىك تەاتر ارتىستەرىنىڭ سومداۋىمەن ساكەننىڭ «قىسىلعاننان قىز بولدىق» دراماسىنان جانە جازۋشى تۋرالى تۇسىرىلگەن دەرەكتى فيلمنەن ءۇزىندى تاماشالادى. سونىمەن قاتار, قالامگەردىڭ كىتاپتارىنان كورمە ۇيىمداستىرىلدى.
دينارا جاقسىلىققىزى
