ديماشتىڭ دارىنى مەن سۇندەتتىڭ سىنى
داۋىسى ەرەكشە ونەرپاز, بىرنەشە رەسپۋبليكالىق جانە حالىقارالىق فەستيۆالدەردە توپ جارعان دارىندى ءانشى ديماش قۇدايبەرگەن ماسكەۋدەگى «بولشايا وپەرا-2016» بايقاۋىنا قاتىسقان وپەرا ءدۇلدۇلى سۇندەت بايعوجينگە قولداۋ كورسەتىپ, ونىمەن بىرگە تاياۋدا ءان سالعان ەدى. ديماشتىڭ ءوزى دە قاراشا ايىندا قىتاي ەلىندە باستالعان «I am a singer» – «مەن ءانشىمىن» اتتى بايقاۋعا بارىپ كەلدى.
ءانشىنىڭ حابارلاۋىنشا, حالىق ءانى «دايديداۋ» مەن شەتەل تىلىندە ەكى ءاندى ورىنداعان ونىڭ ونەرىن قازىلار القاسى جوعارى باعالاپ, فينالدىق كەزەڭگە وتكىزدى. جالپى العاندا, فينال الداعى جىلدىڭ قاڭتار-ءساۋىر ايلارىنىڭ ارالىعىندا وتەدى. وندا التى قىتايلىق ءانشى مەن وزگە ەلدىڭ ءبىر ونەرپازى باعى مەن بابىن سىنايدى. سول جالعىز ونەرپاز – ءوزىمىزدىڭ ديماش قۇدايبەرگەن بولىپ وتىر.
بۇل بايقاۋعا قازاق ءانشىسىن قر مادەنيەت جانە سپورت مينيسترلىگى اتتاندىردى. ديماش فينالدا ورىندايتىن اندەردى قازىلار القاسى بەلگىلەيدى. بايقاۋ ۇيىمداستىرۋشىلارى دا ادىلدىكتى كوزدەپ, قازىلار القاسىنىڭ قۇرامىن قاتىسۋشىلاردان جاسىرىن ۇستاۋدا. الدىنداعى كەزەڭدەردەن سۇرىنبەي ءوتكەن ديماش قۇدايبەرگەن قازىر دايىندىققا كىرىسىپ كەتتى. وعان ءساتتىلىك تىلەپ, كەلەسى جىلدان اقجولتاي جاڭالىقتى كۇتەمىز.
«استانا وپەرا» مەملەكەتتىك وپەرا جانە بالەت تەاترىنىڭ جەتەكشى ءسوليسى سۇندەت بايعوجينگە كەلسەك, وكىنىشكە قاراي, ول «بولشايا وپەرا-2016» بايقاۋىنىڭ فينالىنا وتە المادى. ون ءبىرىنشى كەزەڭگە دەيىن جەتكەن ول سوڭعى تۋردا دجواككينو ءروسسينيدىڭ «سەۆيل شاشتارازى» وپەراسىنان فيگارو كاۆاتيناسىن جانە كومپوزيتور سەرافيم تۋليكوۆتىڭ «رودينا» ءانىن ورىندادى. ال, جالپى العاندا, بايقاۋ بويى قازاق ءانشىسى قازىلار القاسىن ونەرىمەن ءتانتى ەتىپ كەلدى. سونىڭ ىشىندە احمەت جۇبانوۆ پەن لاتيف ءحاميديدىڭ «اباي» وپەراسىنداعى ۇلى اقىننىڭ ارياسىن وتە اسەرلى ورىندادى.
جالپى العاندا, «بولشايا وپەرا-2016» بايقاۋىنا 7 مەملەكەتتەن 12 ءانشى قاتىستى. فينال 26 جەلتوقسان كۇنى ماسكەۋدىڭ ۇلكەن تەاترىندا وتەدى. وعان تيگران وگانيان, كسەنيا نەستەرەنكو جانە يۋري گورودەتسكي اتتى ءۇش ءانشى ءوتتى. 2014 جىلى بۇل بايقاۋدا «استانا وپەرا» تەاترىنداعى سۇندەتتىڭ ارىپتەسى سالتانات احمەتوۆا توپ جارعانىن ەستەرىڭىزگە سالا كەتەيىك. ال سۇندەتتىڭ وزىنە مويىماۋىن ءتىلەيمىز. وسىعان دەيىن تالاي ەلدى ونەرىمەن باعىندىرعان ءانشىنىڭ الار اسۋلارى ءالى الدا دەپ بىلەمىز.
امانعالي قالجانوۆ