استانا قالاسى ءدىن ىستەرى جونىندەگى باسقارماسىنىڭ قولداۋىمەن اكىمدىكتىڭ ءدىن پروبلەمالارىن زەرتتەۋ ورتالىعى ءدىني ەكسترەميزم مەن تەرروريزم يدەيالارى تارالۋىنىڭ الدىن الۋ بويىنشا سەمينار وتكىزدى.
استانا قالاسى ءدىن ماسەلەلەرى جونىندەگى اقپاراتتىق-ءتۇسىندىرۋ توبى مۇشەلەرىنە ارنالعان بۇل شارا «قازاقستان حالقى بىرلىگىن نىعايتۋداعى ءدىننىڭ ءرولى» دەگەن تاقىرىپپەن ءوتتى.
اتالمىش توپ ءدىني ەكسترەميزم مەن تەرروريزمگە قارسى ءىس-قيمىل جونىندەگى 2013-2017 جىلدارعا ارنالعان مەملەكەتتىك باعدارلامانى ىسكە اسىرۋ اياسىندا قۇرىلىپ, ءوز جۇمىسىن باستاعان ەدى. توپ كۇشىمەن وسى كۇنگە دەيىن قالا كولەمىندە 24 مىڭنان استام ادامدى قامتىعان 203 كەزدەسۋ وتكىزىلدى. وسى رەتتە ءدىن تۇرعىسىندا مەملەكەتتىك ساياساتقا حالىقتىڭ سەنىمىن ارتتىرۋعا ىقپال ەتىپ, قوعامدىق كەلىسىم مەن تۇراقتىلىقتى ساقتاۋعا تۇرعىنداردىڭ ازاماتتىق ۇستانىمىن قالىپتاستىرۋدا وڭ تاجىريبە جيناقتاپ كەلەدى.
سەمينارعا قاتىسۋشىلار الدىندا ءسوز العان استانا قالاسى ءدىن ىستەرى جونىندەگى باسقارما باسشىسىنىڭ مىندەتىن اتقارۋشى نۇرداۋلەت ءالمۇحانوۆ حالىقپەن تىعىز جۇمىس جاساي وتىرىپ, ولاردىڭ كوكەيىندە جۇرگەن سۇراقتارعا تىكەلەي جاۋاپ بەرەتىن قۇرامىندا ءدىنتانۋشىلار, پسيحولوگتار جانە اكىمدىكتىڭ ءدىن پروبلەمالارىن زەرتتەۋ ورتالىعىنىڭ وكىلدەرى بار توپتاردىڭ بىلىكتىلىگىنە كوپ نارسە بايلانىستى ەكەنىن ايتتى.
پارلامەنت ءماجىلىسىنىڭ دەپۋتاتى باقىتبەك سماعۇل قانداي قيىندىق بولسا دا وسى ۋاقىتقا دەيىن قول جەتكىزگەن جەتىستىكتەرىمىز – تۇراقتىلىق پەن تىنىشتىقتىڭ, سان ءتۇرلى ۇلت پەن دىن وكىلدەرىنىڭ جاراسىمى مەن تاۋلىعىن نىعايتا ءتۇسۋ كەرەكتىگىن ايتتى.
قمدب نايب ءمۇفتيى, «نۇر استانا» ورتالىق مەشىتىنىڭ باس يمامى ناۋرىزباي تاعانۇلى سوڭعى كەزدە ورىن العان وقيعالارعا تالداۋ جاسادى. ول «تۇنىعىمىزدى لايلاعىسى كەلەتىن كۇشتەرگە قارسى تۇرار, حالىقتىڭ ىنتىماعى مەن يمانىن بەكىتۋدىڭ جولى ءداستۇرلى ءدىني قۇندىلىقتاردى ءدارىپتەي بىلۋدە جاتىر» دەدى.
ءدىن ماسەلەلەرى جونىندەگى اقپاراتتىق-ءتۇسىندىرۋ توبى مۇشەلەرى وڭ ءتاجىريبەلەرىمەن الماسا كەلە, الداعى مىندەتتەرىن ايقىندادى.
ايگۇل ۋايسوۆا
