ەلمار بورىباەۆ «استانا وپەرا» تەاترىنىڭ ديريجەرى. ول – قازاقستاندىق كلاسسيكالىق مۋزىكا سالاسىنداعى جاڭا ەسىم. رۋمىنياداعى وپەرالىق-سيمفونيالىق ديريجەرلەر كونكۋرسىنىڭ ديپلومانتى. دجۋزەپپە ۆەردي اتىنداعى ميلان كونسەرۆاتورياسىن جانە قر پرەزيدەنتى جانىنداعى مەملەكەتتىك باسقارۋ اكادەمياسىن اياقتاعان.
بولگاريا, رۋمىنيا, يتاليا ەلدەرىنىڭ وركەسترلەرىندە ديريجەرلىك ەتكەن. 2022 جىلى دج. ءپۋچچينيدىڭ «بوگەما» وپەراسىمەن مانچينەللي تەاترىندا (ورۆيەتو, يتاليا) دەبيۋتى ءوتتى. ەلمار بورىباەۆ «استانا وپەرا» تەاترىنىڭ سيمفونيالىق وركەسترىنە جەتەكشىلىك ەتۋ اسقان جاۋاپكەرشىلىك دەپ سانايدى. «استانا وپەرانىڭ» كاسىبي بىلىكتىلىگى وتە جوعارى. بيىك شىعارماشىلىق بەلەستەردى باعىندىرارى ءسوزسىز. جۋىردا ديريجەرمەن ارنايى بارىپ سۇحباتتاسقان ەدىك.
– ەلمار اسقارۇلى, مۋزىكا سىزگە انا سۇتىمەن, اكە تاربيەسىمەن دارىدى, جانىڭىزعا جاقىن ونەر قالايشا ومىرلىك ىسىڭىزگە اينالدى؟ وسى تۋرالى ايتساڭىز.
– مەن كاسىبي مۋزىكانتتار وتباسىندا دۇنيەگە كەلگەندىكتەن, ەرتەدەن كەلە جاتقان وسى داستۇرگە ساي ءبىلىم الدىم. اۋەلى كۇلاش بايسەيىتوۆا اتىنداعى مۋزىكا مەكتەبىندە ۆيولونچەلدەن ساباق السام, الماتىداعى كونسەرۆاتوريادا وپەرا-سيمفونياعا ديريجەرلىك ەتۋ ماماندىعى بويىنشا ءبىلىم الدىم, ودان سوڭ ميلان كونسەرۆاتورياسىن ءبىتىردىم.
– البەتتە, سىزگە باسقا دا ءبىلىم كوزدەرى قولجەتىمدى بولعان شىعار؟
– ءيا, ماعان, نەگىزگى كونسەرۆاتوريالىق ءبىلىم الۋدان بولەك, لوندون, بەرلين, سانكت-پەتەربوردا جانە تاعى باسقا قالالاردا حالىقارالىق شەبەرلىك ساعاتتارىنا قاتىسۋدىڭ ءساتى ءتۇستى. بۇدان بولەك, ۇزدىك تەاترلار مەن كونتسەرت زالدارىنداعى كونتسەرتتەر مەن سپەكتاكلدەردەن العان زور اسەر, تاجىريبە كاسىبي قورجىنىمدى تولىقتىرىپ, بايىتىپ وتىردى. لا سكالا تەاترىنداعى زامانىمىزدىڭ ەڭ اتاقتى سوليستەرىمەن جانە ديريجەرلەرىمەن وتكەن سپەكتاكلدەر مەن دايىندىقتاردى ۇدايى تاماشالاۋ ماعان زور مۇمكىندىك سىيلاپ, تالابىمدى ۇشتاي ءتۇستى.
– وكىنىشكە قاراي, بارلىعىنىڭ شەتەلگە شىعاتىن مۇمكىندىگى جوق. ءسىزدىڭ ويىڭىزشا, قازاقستاندا جاقسى ديريجەرلىك ءبىلىم الۋعا بولا ما؟
– ءبىزدىڭ ەلىمىزدە كلاسسيكالىق مۋزىكالىق ءبىلىم بەرۋ لايىقتى دەڭگەيدە وقىتىلۋدا جانە ديريجەردى دايىنداۋ ءىسى دۇرىس جولعا قويىلعان دەپ سانايمىن. قۇرمانعازى اتىنداعى قازاق ۇلتتىق كونسەرۆاتورياسىندا ن.جاراسوۆ, ب.جامانباەۆ سەكىلدى تەرەڭ تەوريالىق, سونىمەن بىرگە زور پراكتيكالىق بىلىمگە يە شەبەرلەر ءدارىس بەرگەنىن ەرەكشە اتاپ وتكىم كەلەدى جانە قازىر دە ولار مىقتى مۋزىكانتتاردى تاربيەلەۋدەن سىرت قالعان ەمەس.
– تەوريالىق جاعىنان وركەسترمەن جۇمىس بارىسىنا ءوز دۇنيەنىڭىزدى قوسقىڭىز كەلە مە؟
– ديريجەر ماماندىعى – بۇل شىعارماشىلىق قىزمەتتىڭ جاڭارتۋلارعا, وزگەرىستەرگە ەڭ از ۇشىرايتىن سالاسى. ماقسات ءاردايىم وركەستر مۋزىكانتتارىنىڭ بىرگە, ءبىر قارقىندا, ۇيلەسىمدى ويناۋى بولدى جانە قازىر دە سولاي. ال مۋزىكانىڭ ىشكى تولىسۋى تۋىندىنى وقۋدان, ارينە, ەرەكشەلەنەدى, ماسەلەن, 50 جىل بۇرىن باسقاشا بولعان. ءبىز, ححI عاسىر مۋزىكانتتارى, زاماناۋي تەحنيكالىق مۇمكىندىكتىڭ ناتيجەسىندە وسى نەمەسە باسقا تۋىندىنىڭ ورىندالۋىنىڭ ونداعان, ءتىپتى جۇزدەگەن نۇسقاسىن تىڭداي الامىز. مۇنداعى ماقسات – وزىمىزشە پايىمداۋدى مەڭگەرىپ, وركەستردى سوڭىمىزدان ەرتۋ, ءوز ينتەرپرەتاتسيامىزدىڭ دۇرىس ەكەنىنە كوپشىلىكتى سەندىرۋ.
– وركەستر مۋزىكانتتارىنىڭ سەنىمىنە يە بولۋ قيىن با؟
– وركەستردىڭ سەنىمى كەز كەلگەن شىعارماشىلىق وداقتىڭ ماڭىزدى قۇرامداس بولىگى دەپ ويلايمىن. ەگەر ديريجەر جەتەكشى رەتىندە سالماقتى, كاسىبي بولسا, سەنىم ماسەلەسى وڭتايلى شەشىلۋى ءتيىس. مۇنداي سەنىمگە كۇن ەمەس, اي ەمەس, جىلدار بويى قول جەتكىزۋ مۇمكىن بولمايتىن جاعدايلار كەزىگەدى.
