– مەملەكەت باسشىسىنىڭ پارلامەنت پالاتالارىنىڭ بىرلەسكەن وتىرىسىندا سويلەگەن ءسوزىن باستان-اياق تىڭداپ شىقتىم. حالىققا وتە قاجەتتى ءبىراز ماسەلەنىڭ كوتەرىلگەنى شىندىق.
اسىرەسە, بىلتىر ءسوز ەتكەن «ۇلتتىق قور – بالالارعا» باستاماسىن جۇزەگە اسىرۋعا دايىندىق جۇرگىزىلىپ جاتقانى, سونداي-اق مەملەكەت مۇقتاج جاندارعا اتاۋلى الەۋمەتتىك كومەك كورسەتۋدى جالعاستىرا بەرەتىنى كوكەيگە قۋانىش ۇيالاتتى. ويتكەنى بۇل ءوزى ۇرپاق قامىن ويلاعان ۇتىمدى باعدارلاما ەكەنى داۋسىز.
ەلىمىزدىڭ بولاشاعى – بالالارعا مەملەكەتتىڭ قامقورلىعى, جان-جاقتى جاعداي جاساۋى وتە ماڭىزدى. وسى ورايدا مەملەكەت باسشىسىنىڭ «ۇلتتىق قور – بالالارعا» اتتى جاڭا باعدارلاماسىن حالىق ۇلت بايلىعىنىڭ ۇلەسىن سەزىنەر ۇلكەن باستاما ساناپ, ءۇمىت ارتىپ, قۋانا قابىلدادى.
سونداي-اق پرەزيدەنت الەۋمەتتىك تۇرعىدان وسال توپتاعى ازاماتتاردى قولداۋ باستى مىندەتتىڭ ءبىرى ەكەنىن باسا ايتتى. «قيىندىققا تاپ بولعان جاندار ەش كومەكسىز قالماۋى كەرەك. مەملەكەتتىڭ ادىلدىگى مەن قوعامنىڭ جاناشىرلىعى وسىندايدا كورىنەدى. اسىرەسە, انا مەن بالانى قورعاۋعا ايرىقشا كوڭىل بولىنۋگە ءتيىس. مەنىڭ تاپسىرماممەن بيىل بالا كۇتىمىنە جاردەماقى بەرۋ مەرزىمى 1 جىلدان 1,5 جىلعا ۇزارتىلدى. تۇرمىسى تومەن وتباسىنداعى 1 جاستان 6 جاسقا دەيىنگى بالالارعا بەرىلەتىن الەۋمەتتىك كومەك قايتا قارالدى. ەندى 100 مىڭنان استام بالا بۇل كومەكتى اقشالاي الاتىن بولادى» دەدى قاسىم-جومارت توقاەۆ.
ارينە, مەملەكەت باسشىسىنىڭ ەرەكشە قاجەتتىلىگى بار ازاماتتارعا ازىق-تۇلىك پەن ءدارى-دارمەك باعاسىنىڭ قىمباتتاۋى وڭاي ءتيىپ وتىرماعانىن, سوندىقتان ولارعا جانە سونداي ادامداردىڭ كۇتۋشىلەرىن قولداۋ شارالارىن كۇشەيتۋ قاجەتتىگىن ەرەكشە اتاپ وتكەنى ەرتەڭگى كۇنگە دەگەن سەنىمىمىزدى نىعايتتى. ەلىمىزدە كوپبالالى وتباسىلارعا دا ايتارلىقتاي قولداۋ كورسەتىلىپ جاتقانى قۋانتادى.
مايرا الىمحانقىزى,
ينتەرناتسيونالنىي تۇرعىن الابى ارداگەرلەر كەڭەسىنىڭ ءتورايىمى, ەڭبەك ارداگەرى
