شىعارماشىلىق بىرلەستىكتە تالاي تاماشا ءان تۋدىرعان ەرلى-زايىپتى اقىن نيكولاي دوبرونراۆوۆ پەن كومپوزيتور الەكساندرا پاحمۋتوۆا وتكەن عاسىردىڭ 60-جىلدارى سول كەزدەگى تسەلينوگراد قالاسىندا بولدى. تىڭ يگەرۋشىلەر سارايىندا (قازىرگى «استانا» كونتسەرت زالى) وتباسىلىق جۇپتىڭ اندەرى شىرقالعان كونتسەرت ءوتتى.
سايىن دالانىڭ سارىارقاسى پاحمۋتوۆاعا جات ەمەس ەدى. ەكىنشى دۇنيەجۇزىلىك سوعىس جىلدارى, ناقتى ايتقاندا, 1942 جىلدىڭ تامىزىنان 1943 جىلدىڭ كۇزىنە دەيىن ءجاسوسپىرىم ساشا قاراعاندى قالاسىندا تۇرىپ, جەرگىلىكتى مۋزىكا مەكتەبىندە (بۇگىنگى تاتتىمبەت اتىنداعى ونەر كوللەدجى) وقىدى. ارادا جيىرما جىل وتكەندە, تسەلينوگرادقا كەلگەن ونەرلى جۇپتى جۇرت قۇرمەتتەپ, قوشەمەتتەپ قارسى الدى. سول ساپاردان فوتوسۋرەتتەر ەستەلىك بولىپ قالدى. ءبىز ۇسىنىپ وتىرعان سونىڭ ءبىرىن ميحايل انتونيۋك تىڭ يگەرۋشىلەر سارايىنىڭ جانىندا ءتۇسىرىپ العان.
مۇندا ومىرگە ريزا كەيىپتە, ءماز-مەيرام بولىپ وتىرعان ونەرلى جۇپ ونەگەلى وتباسىنىڭ, شىعارماشىلىقتاعى بەرەكەلى شاڭىراقتىڭ ۇلگىسىن كورسەتتى دەسەك قاتەلەسە قويماسپىز. ەكەۋى 1956 جىلى وتاۋ قۇرىپ, 67 جىل تاتۋ-ءتاتتى ءومىر ءسۇردى. بىرەر اپتا بۇرىن نيكولاي دوبرونراۆوۆ 95 جاسقا قاراعان شاعىندا ومىردەن ءوتتى.
