«شابىت» قازاق ۇلتتىق ونەر ۋنيۆەرسيتەتىندە قازاقستان حالقى اسسامبلەياسىنىڭ ۇيىمداستىرۋىمەن ەل تاۋەلسىزدىگىنىڭ 30 جىلدىعىنا ارنالعان «قازاقستان – دوستىق الەمى» اتتى قازاقستان حالقى دوستىعىنىڭ XXII فەستيۆالى ءوتتى.
ءداستۇرلى دوستىق فەستيۆالىنىڭ ماقساتى – ۇرپاقتى ەتنوستاردىڭ مادەنيەتىن, سالت-داستۇرلەرىن قۇرمەتتەۋگە تاربيەلەۋ, ەتنومادەني بىرلەستىكتەردىڭ شىعارماشىلىق باستامالارىن ىنتالاندىرۋ. سوندىقتان وعان ەلوردالىق اسسامبلەياعا قاراستى ەتنومادەني ورتالىقتاردىڭ 17 شىعارماشىلىق ۇجىمى ءبىراۋىزدان بەلسەنە اتسالىستى.
سونداي-اق شاراعا پرەزيدەنت اكىمشىلىگى, قر پارلامەنتى, اقپارات جانە قوعامدىق دامۋ مينيسترلىگى مەن ەلشىلىكتەردىڭ وكىلدەرى قاتىسىپ, جينالعان كوپشىلىكتى تاۋەلسىزدىكتىڭ 30 جىلدىعىمەن قۇتتىقتاپ, فەستيۆال ۇيىمداستىرۋشىلارىنا العىس ءبىلدىردى.
«مادەنيەت, ونەر – حالىقتاردى ەڭ باستى بىرىكتىرۋشى دۇنيە. ول ۇلتقا, حالىققا, ەتنوستارعا بولىنبەيدى. سوندىقتان ءبىز وسىنداي ءار الۋان مادەني ەرەكشەلىكتەرىمىز ارقىلى بىرلىگىمىزدى كورسەتكىمىز كەلەدى. ەڭ باستى قۇندىلىعىمىز – سول بىرلىك پەن تاتۋلىق. بارشاڭىزدى بۇگىنگى ءداستۇرلى دوستىق فەستيۆالىنىڭ باستالۋىمەن قۇتتىقتايمىن» دەدى فەستيۆالدىڭ اشىلۋ راسىمىندە ءسوز سويلەگەن قالالىق ىشكى ساياسات باسقارماسىنىڭ باستىعى داۋرەن بابامۇراتوۆ.
قازاقستان حالقىنىڭ دوستىعىن پاش ەتكەن شارا اياسىندا ءان, قويىلىم, بي ارقىلى نەگىزىنەن, تاۋەلسىزدىگىمىزدى ۇلىقتايتىن, ماقتان ەتەتىن تۋىندىلار ساحنالاندى.
