ءازىربايجان مامبەتوۆ اتىنداعى مەملەكەتتىك دراما جانە كومەديا تەاترىندا «بوراندى بەكەت» دراماسىنىڭ پرەمەراسى ءوتتى. قويىلىم قازاقستاننىڭ حالىق قاھارمانى, كسرو جانە قازاقستاننىڭ حالىق ءارتىسى, كسرو مەملەكەتتىك سىيلىعىنىڭ يەگەرى, رەجيسسەر ءازىربايجان مامبەتوۆتىڭ 90 جىلدىعىنا ارنالدى. «عاسىردان دا ۇزاق كۇن» رومانىنىڭ جەلىسى بويىنشا قويىلعان قويىلىمنىڭ رەجيسسەرى – ۇلانمىرزا كارىپباەۆ.
«سپەكتاكل دايىندىعىنا 2,5 اي ۋاقىت كەتتى. وسى ۋاقىت ىشىندە كەڭ كولەمدە وسىنداي كەرەمەت قويىلىمدى الىپ شىقتىق. «بوراندى بەكەت» بۇكىل شىڭعىس ايتماتوۆتىڭ شىعارماشىلىعىن قامتىعان قويىلىم بولدى دەپ ايتار ەدىم. «عالامنىڭ ايتماتوۆى» بولعان جازۋشىنىڭ شىعارماسىنىڭ ءمانىن كورەرمەنگە جەتكىزە بىلسەك, بۇل – ءبىز ءۇشىن مارتەبە. بۇل جەردە ءبىز جازۋشىنىڭ ءار كەيىپكەرىنىڭ بەينەسىن جانە ماڭىزىن اشىپ كورسەتكىمىز كەلدى. رومانداعى ءابۋتالىپ-زاريپا – جازۋشىنىڭ اتا-اناسىنىڭ ءپروتوتيپى دەسەك, ماڭگۇرتتىك كەزىندەگى قازاق ەلىنىڭ قۇلدىق ساناداعى ءحالىن سۋرەتتەپ تۇر. كەڭەس ۇكىمەتى كەزىندە قازاق قايماقتارىنىڭ كوپشىلىگى رەپرەسسياعا ۇشىرادى. سونىڭ ءبارىن «بوراندى بەكەت» قويىلىمىندا قامتۋعا تىرىستىق, – دەدى رەجيسسەر ۇلانمىرزا كارىپباەۆ.
ءار تۋىندىسى الەمگە ايگىلى بولعان شىڭعىس ايتماتوۆتىڭ «عاسىردان دا ۇزاق كۇن…» رومانى – تاعدىردىڭ تارامىس جولدارىن سۋرەتتەگەن عاسىرلىق تۋىندى. ءبىر بويىنا بوراندى بەكەت, سارىوزەك, ەل ءىشى, جەر پلانەتاسى سىندى بىرنەشە اۋقىمدى كەڭىستىكتى سىيدىرىپ تۇرعان شىعارمانىڭ ايتارى مول. روماندا اۆتور ادام ساناسىنىڭ رۋحاني ازعىندىققا ۇشىراعانىن جازادى. قويىلىمدا نايمان-انانىڭ ماڭگۇرت بالاسىن سەندىرۋگە تىرىسقان ارەكەتى, اقىر اياعىندا اجال قۇشقانى وتە اسەرلى شىققان. دراما ارقىلى رەجيسسەر جاڭا داۋىردە ءبىر ادامنىڭ باسىنداعى تراگەديا جالپى ادامزاتتىق, ۇلتتىق تراگەدياعا اينالاتىنىن كورسەتە بىلگەن.
ايزادا جايىققىزى
