«استانا بالەت» تەاترىنىڭ ساحناسىندا قازىرگى زامان ءبيىنىڭ داۋىلپازى يرجي كيلياننىڭ «جولدان تايعاندار» حورەوگرافيالىق مينياتيۋراسىنىڭ پرەمەراسى ءوتتى. قويۋشى-حورەوگراف – ستەفان جەرومسكي, مۋزىكا اۆتورى – ستيۆەن رايح.
«بۇل – «استانا بالەت» تەاترىنىڭ 2022 جىلعى العاشقى پرەمەراسى. الەمنىڭ ايگىلى تەاترلارى چەح حورەوگرافىنىڭ بالەتىن رەپەرتۋارىنا قوسۋعا اسىق. سوندىقتان كيليان تۋىندىسىنىڭ رەپەرتۋارىمىزعا ەنگەنى – ءبىز ءۇشىن زور قۇرمەتپەن قاتار, وراسان جاۋاپكەرشىلىك ءارى بالەت ترۋپپاسىنىڭ كاسىبي شەبەرلىگىن مويىنداۋدىڭ بەلگىسى. ونىڭ ونەر تۋىندىلارى ينتەرناتسيونالدى ءارى وزەكتىلىگىن جويماعان زاماناۋي دۇنيەلەر» دەدى «استانا بالەت» تەاترىنىڭ ديرەكتورى الەكساندر سوۆوستيانوۆ.
«جولدان تايعاندار» تۋىندىسىندا داۋىلپاز سوققىسىمەن ساحناعا اتىپ شىققان بيشىلەر وسى ىرعاقتىڭ اسەرىمەن قيمىلداپ, كورەرمەن قاۋىمدى ۇيىتىپ اكەتەدى. ساحناداعى كورىنىستەن ەشكىم كوز الا الماي قالادى. بيشىلەر ساحنانىڭ تۇبىنەن مۋزىكاسىز ادىمداپ باسىپ, العا قاراي شىعادى. سودان سوڭ داۋىلپازدىڭ سوققىلارى ەستىلىپ, وسى اۋەن مەن بيشىلەر كۇرەسكە تۇسەتىن سەكىلدى كورىنەدى. داۋىلپازدىڭ ءار سوققىسى – ىشكى يمپۋلس ىسپەتتى. داۋىلپازدىڭ سان سوققىسىنىڭ ىشىنەن ءبىر ىرعاقتى تاپقانداي كورىنگەندە, ول ءۇزىلىپ كەتىپ, باسقا اۋەن باستالادى.
«استانا بالەت» تەاترى سيمفونيالىق وركەسترىنىڭ مۋزىكانتتارى جاسۇلان قابيموللا, جاندوس قۇدايبەرگەن, ياروسلاۆ سەرەديچ جانە سايات ەلەۋسىننىڭ دە وراسان ەڭبەگىن اتاپ وتكەن ءجون. ستيۆەن رايحتىڭ Drumming part 1 كومپوزيتسياسى ورىندالۋى جاعىنان وتە كۇردەلى شىعارما سانالىپ, ورىنداۋشىلاردىڭ ءمىنسىز تەحنيكاسىن تالاپ ەتەدى.
«اتاقتى حورەوگرافتىڭ اسسيستەنتى ستەفان جەرومسكيدىڭ جەتەكشىلىگىمەن تەاتر ارتىستەرى قىسقا مەرزىم ىشىندە وزىندىك «كيليان ءستيلىن» مەڭگەرىپ الدى. ول كلاسسيكالىق شەڭبەردەن تىس شىعىپ, ءبىزدىڭ ارتىستەر ءۇشىن ۇيرەنشىكتى ءبيدىڭ فورماسىنان اسىپ تۇسكەن. بيشىلەر كۇردەلى حورەوگرافيانى مەڭگەرىپ قانا قويعان جوق, وزدەرىنىڭ دەربەس كەلبەتىن دە ساقتاي الدى. ءسويتىپ, وسى قويىلىمنىڭ تارتىمدىلىعىن ارتتىرا ءتۇستى» دەيدى تەاتردىڭ كوركەمدىك جەتەكشىسى نۇرلان كانەتوۆ.
«مەنىڭشە, بۇل بالەت ايەل تابيعاتىن جان-جاقتى زەرتتەيتىن ءتارىزدى. ولاردىڭ ارەكەتىن بولجاۋ قيىن, مىنەزدەرى سان-قيلى, ىشكى بولمىسى دا ءتۇرلى. بۇل قويىلىم دەربەستىك تۋرالى. سەبەبى «جولدان تايعان» پەرىشتە نە ىستەسە دە, ءوز ەركى. ولار الدەبىرەۋلەردىڭ سۇرانىسىن, ولاردىڭ قالاۋىن ورىنداۋعا, سوعان سايكەس بولۋعا مىندەتتى ەمەس. مەنىڭشە, كورەرمەن قاۋىم دا بيشىلەردى وزگە قىرىنان تانىپ, كورگەنىنە, وسى ارقىلى قويىلىمدى دا باعالاي العانىنا ىشتەي قۋانىپ وتىردى» دەدى حورەوگراف ستەفان جەرومسكي.
ساحنادا مينيماليزم. ەڭ باستىسى – مۋزىكا مەن ءبيدىڭ ۇندەستىگى. «استانا بالەت» ارتىستەرى وزدەرى ءۇشىن جاڭا حورەوگرافيادا بي ورنەكتەرىن مەڭگەرىپ, زاماناۋي بي جاۋھارىنا بالانعان قويىلىمنىڭ ىشكى تىلسىم كۇشىن كورسەتە ءبىلدى.
«يرجي كيليان – كەمەڭگەر. ونىڭ ءار تۋىندىسى – دەربەس دۇنيە. ول ەشقاشان قايتالانباي, ءاربىر كەزەكتى تۋىندىسىندا مۇلدەم بولەك تەحنيكا مەن پلاستيكانى جاساۋعا كۇش سالادى. «جولدان تايعاندار» تۋىندىسىندا ەڭ اۋەلى ءمىنسىز مۋزىكاسىن اتاپ وتەر ەدىم. ءار قىزدىڭ سولو پارتياسى بار. ال ءبارىمىز قوسىلىپ كوپشىلىك ءبيدى ورىنداعاندا شاتاسىپ قالماس ءۇشىن, ىشتەي ساناپ وتىرۋ قاجەت. تاعى ءبىر ايتا كەتەرلىگى, كوپشىلىك ءبيدى ورىنداعاندا دا ارقايسىمىز دارالىعىمىزدى ساقتاپ تۇرامىز. بۇل ءبيدى ورىنداۋ ءۇشىن فيزيكالىق تۇرعىدا دايىندىق قاجەت. بۇل ناعىز شەدەۆر» دەيدى «استانا بالەت» تەاترىنىڭ جەتەكشى ءسوليسى تاتيانا تەن.
بايان اسىلبەكوۆا
